1 Yéesu meyohha daama, aawwa dëkcaa bok ga gohaa Yúudée ee hanoh húlúwaa Yúrdeŋɗa gaaɗa. Ɓuwaa ɓiyewin haysissa, nëgírukohussa ga yahaaci. Ee ya enissaɓa kijëgíꞌ fodaa ya meereeka kitumɗa.

2 Laakka Fërísiyeeŋcaa hayu bi gari kifíꞌti, ɓa meekissari an:

- Waasiiruu onin ƴaal kifasiꞌ ɓeticine?

3 Yéesu meekissaɓa ɓan an:

- Móyíis nakeerúu ya kitum?

4 Ɓa taassa an:

- Móyíis oneera ƴaal kibín këyít kiteewoh an sëyaa tasin ee ya foñ ɓetici.✡10: 4 Malkat Dëteronom 24: 1.

5 Yéesu nak woꞌꞌaɓa an:

- Móyíis bínɗinndúu iñaa ya nakkúu yaama ndaga dii ɗú súɓ ga keeñɗa. 6 Wayee ga kiɗewaa, ga waa Kooh sak ëldúnaɗa «Ya tummba ɓoꞌ, ƴaal na ɓeti✡10: 6 Malkat Sënees 1: 27; 5: 2.. 7 Kërí tah bi ƴaal hay kifoñ paamci na eeci, ya aboh na ɓetici, 8 ee ɓa ɓanak, ɓa en ɓoꞌ yíinoo»✡10: 8 Malkat Sënees 2: 24.. Fodaama ɓa enissii ɓanak, wayee ɓa en yíinoo. 9 Kon ɓoꞌ hanat kihëgísoh iñaa Kooh akitohin.

10 Waa ɓa leꞌꞌa kaan, tëelíbéecaa meekisussa Yéesu iñaa aaw ga iñaama. 11 Ya taassaɓa an:

- Binaa ɓoꞌ kaal ɓetici, pañ ɓeti yiliisaa, ya ɗúkin ɓetifaagari fiɗewaafaa, ya faanukka na ɓeti filiis. 12 Fodaama ɓan, binaa ɓeti foñ ƴaalci, pajuk ga ƴaal yiliisaa, ya ɗúkin ƴaalaagari yiɗewaayaa, ya faanukka na ƴaal yiliis.

13 Ɓiɓoꞌ haydohɗussa Yéesu tuꞌoomaa, ya tík yahcaagari ga ɗookɓa. Wayee tëelíbéecaa ɓaa ñaꞌ ɓuwaama. 14 Daa Yéesu hotee iñaama, keeñci tammba ga, ya woꞌꞌa tëelíbéecaa an:

- Íisat tuꞌoomaatii, ta hay garoo! Kaa hoonohatɓa ndaga Nguurii Kooh wuu ɓuwii man naɓaɗa. 15 Mi woꞌꞌúuka ee kayoh; ɓaa fu tookkii Nguurii Kooh fodii kuꞌoomaanaa, fu aasoo ga.

16 Lëehíꞌta ya ɓeɓpa oomaacaa, ya tíkka yaa en ɓéeɓ yah, barkeellaɓa.

17 Daa Yéesu enee na kimeƴ kiƴahɗa, laakka ɓoꞌ yiƴaal yaa hay gari na jaaꞌ, ya ƴíꞌꞌa ga fíkíici, meekissari an:

- Jëgírohii yijófíꞌyii, mi tuman na bi mi laak ɓakkoo ga kipeskaa leehoo taaꞌɗa?

18 Yéesu woꞌꞌari an:

- Iñii tah ya fu woꞌ kijof garoo? Ken joffii, enndii Kooh rekaa. 19 Fu ínohin iñii Waasii Móyíis nakoh kitumɗa: «Kaa laŋ kumuun ɓoꞌ; kaa ɗúk ɓetifu wala ƴaalfu, fu faanuk na ɓoꞌ yiliis; kaa lok; kaa seediꞌ saboh; kaa tooñ mooroomfu; kelohɗaa paamfu na eefu.»*10: 19 Malkat Eksoot 20: 12-16; Dëteronom 5: 16-20. Kaa tooñ ɓoꞌ: woꞌeencuma bokkii ga iñcaa cidaaŋkaahcaa Móyíis nakohee kitumɗa. Ee ɓan ca hotukkii ga woꞌeencaa taaboh naca Mëccëe bín na Lúkkaaɗa.

20 Ɓaa taassari an:

- Jëgírohii, mi taabukin iñciima tóoh ga kiꞌoomaaroo bi wati.

21 Yéesu malakka ɓaa, waaꞌtari. Ya woꞌꞌari an:

- Laakin iñaa tesohhaa kitum: kara, toonnaa iñaa fu laakɗa tóoh, fu onwa nduulcii. Fodaama fu hay kilaak alal ga ɗook. Lëehíraa haya, fu taabukkoo.

22 Ɓaa nak enee ɓoꞌ yiyéwíníꞌ alal, ee daa ya kelohee woꞌeenaama, ya súuñɗukka lool, keeñci leehha ga tak, ya yaa ƴah.

23 Yéesu malakka ɓuwaa wíilliɗa, woꞌꞌa tëelíbéecaagari an:

- Kiꞌaaskaa haꞌ-alal ga Nguurii Kooh daal, yoowanndii!

24 Tëelíbéecaa Yéesu waaruꞌussa lool ga woꞌeencaagari. Ee ya tíkissa ga an:

- Ɓiƴaay, kiꞌaas ga Nguurii Kooh daal yooɓpii! 25 Geeleem paaf ga noŋ kúuc, kërí wëñ kiyooɓ daa haꞌ-alal aasan ga Nguurii Kooh.

26 Tëelíbéecaa wëñussa kiwaaruꞌu. Ɓa ɓaa meekisoh ga díkaantiɓa an:

- Kon baanaa, ɓii mín kimúc ɓa?

27 Yéesu malakkaɓa, woꞌꞌa an:

- Iñaama wooñ ɓoꞌ, wayee wooñnjii Kooh, ndaga iñaa en ɓéeɓ mínkin ga Kooh.

28 Peeꞌ nak dalla kiwoꞌ an:

- Malka, ɗí, ɗí foñin tóoh, ɗí taabukinndaa.

29 Yéesu taassari an:

- Mi woꞌꞌúuka ee kayoh; ɓaa mi tahhaa kifoñ, mi na Hewhewii winéwíꞌwii, kaan wala ɓikëmëeŋkímun ɓiƴaal na ɓiɓeti, wala ɓiyaakmun ɓiƴaal na ɓiɓeti, eemun wala paamun wala towu, wala yoon, 30 fu hay kilaak dii, iñaa wëñ iñcaama bes citéeméeꞌ: kaan ciyewin, na ɓikëmëeŋkímun ɓiƴaal na ɓiɓeti na ɓiyaakmun ɓiƴaal na ɓiɓeti, ɓiꞌeemun, towu na yoon ciyewin. Iñcaama taaban na kihatalu ga ngëm; ee fayuraa fu laak kipeskaa leehoo taaꞌɗa. 31 Ɓiyewin ga ɓuwii ɗeɓ watiɗa ɓërí mëeñjohan ee ɓiyewin ga ɓuwii mëeñjohɗa ɓërí ɗewan.

32 Waa ennda ɗa, ɓa ammba waasaa aaw Yéerúsaleemɗa. Yéesu hanohee fíkíi. Tëelíbéecaagari, helcaagaɓa daléeríi dara ee ɓuwaa ɓíinoo taamsee ga fenoociɗa niikussa. Yéesu ɓaysissa ɓidaaŋkaah na ɓanakɓaa haŋ, ya yaa woꞌɓa iñaa ƴahanndi kidalɗa. 33 Ya woꞌeeɓa an:

- Súkúrukat, ɗu ɓii ƴah Yéerúsaleem, ee Kowukii ɓii hay kitíku ga yah sarahohcaa ɓiyaakɓaa na jëgíroh-waascaa. Ɓa hayyi kiꞌattiꞌ kikaan, ɓa tíkki ga yah yiifaꞌcaa. 34 Ɓaama hayyi kiñaawalsoh, ɓa toossohhi, ɓa típpi laawoo, ɓa appi. Lëehíraa, bes kaahay tík ganaa ya mílís.

35 Saak na Saŋ, towutaa Sebedee, deeyussa ga Yéesu, woꞌussari an:

- Jëgírohii, ɗí waaꞌ fu tumiꞌtíi iñii ɗí ƴahhaa kikíimɗa.

36 Yéesu meekissaɓa an:

- Ɗú waaꞌ ya mi tumiꞌtúu?

37 Ɓa taassa an:

- Binaa fu en ga ndamaagaraanaa, onaaríi ɗí mín kiyuŋ ga yahaafu, yii hanoh yahfu ñaam, yíinoo hanoh yahfu seŋ.

38 Yéesu woꞌꞌaɓa an:

- Ɗú ínohoo iñii ɗú meekisohɗa. Ɗú mínin kiꞌan ga kaas-coonii mi ƴah kiꞌanɗane, wala kibëtísiꞌuk ga mesiklaat fodii dii mi ƴah kibëtísiꞌukɗane?

39 Ɓa taassa an:

- Ee ɗí míninka.

Yéesu woꞌꞌaɓa an:

- En kiꞌenaa, ɗú hay kiꞌan ga kaasii mi ƴah kiꞌanɗa ee ɗú hay kibëtísiꞌuk ga mesiklaat fodii dii mi ƴah ga kibëtísiꞌukɗa.✡10: 39 Mëdírohat na Tumeen 12: 2. 40 Wayee en iñaa aaw ga kiyuŋ ga yahhoo ñaam wala ga yahhoo segaa, enndii mi jomka kiwoꞌ. Ɓuwaa Kooh waayukiꞌ ɓakcaamaɗa ɓërí ƴahca kiꞌeru.

41 Daa tëelíbéecaa tesɗa kelohsee iñaama, ɓa dalla kiꞌayluk Saak na Saŋ. 42 Yéesu dallaɓa kiɓay, woꞌꞌaɓa an:

- Ɗú ínohin an, ɓuwii tíku haꞌ-kúl ga ëldúnaɗa, ɓërí teewi ɓuwii an ɓa hanoh ɓéeɓ ɗook , ee haꞌ-doolicii tumlukohi ɓuwii ga iñaa neɓɓa. 43 Iñaa manɗa hanat ɗa kilaak ga ɗuuƴcúu. Wayee laak ɓaa waaꞌ kiꞌen ɓoꞌ yiyaak ga ɗuuƴcúunaa, ya joman kiꞌen súrgarúu, 44 ee ɓaa waaꞌ garúu kikuliyukaa, ya joman kiꞌen ñaam ɓuwaa tóohɓa. 45 En kiꞌenaa, kiheel súrga tahhii Kowukii ɓii kihay, wayee ka hay kiꞌen súrga ɓuwii, na kiꞌeroh kumuunci doo ya laas tumuun ɓoꞌ ɓiyewin.✡10: 45 Mëdírohat na 14: 24; 1 Tímotée 2: 6.

46 Yéesu na tëelíbéecaagari leꞌussa Yéríkóo. Waa ɓa meyoh ga teeraama na ɓiɓoꞌ ɓicaakíꞌ, laakka búumíraa teeku Bartímée, kowu Tímée, yugin ga yahaanaa waasaa, yaa sarahtuk. 47 Daa ya kelohee an Yéesu Nasareet yaa hay, ya yaa fiip an:

- Yéesu, kucaasamunkii Dëwít, yërëmaaroo!

48 Ɓuwaa ɓaa ñaꞌti, an doo ya ɗekoh. Wayee ya yaa wëñ kifiip an:

- Kucaasamunkii Dëwítóo, yërëmaaroo!

49 Yéesu tuukka, woꞌꞌa an:

- Ɓayatti.

Ɓuwaa ɓayya búumíraa, ɓa ɓaa woꞌꞌi an:

- Dëlɗaa heliigaraa, kolka, ya yii ɓayyaa.

50 Búumíraa dalla kijaf paltaagari, ya kolukka bërít, yaa hay ga Yéesu.

51 Yéesu meekissari an:

- Fu waaꞌ ya mi tumiꞌtaa?

Búumíraa taassari an:

- Jëgírohii, tumɗaaroo bi mi mín kihot.

52 Yéesu woꞌꞌari an:

- Tíida, ngëmiigaraa wëkɗinndaa.

Ga saasi búumíraa mínnda kihot, lëehíꞌta ya yaa taabuk Yéesu ga waasaa ya am kiƴahɗa.