1 Babi nii bɔmbɔtɛ, kɔkpana nle mmle nkyesee ye alɛ bilaabla okpile. Kafɔɔ nse otii owo lɛbla okpile yi, bukpe otii owo nin-yɛ wo ni kaanya ootikiti Yaa lekoto anta wo nii. Nnwɔɔ ninle Yesu Kristo wɔ ninle ni tininitɛ nɛ. 2 Nnwɔɔ suoto di Yaa lefe ɛɛyɔ sikpile loo ɛɛkyɛ wo nɛ. Diele sikpile loo lete, kafɔɔ ku batii bamuu kaayi sikpile.

3 Nse buoole Yaa afiofa, ni buofũ buonu bulɛ buye nwɔ. 4 Nse otii owo kobuɛ alɛ “N-ye Yaa,” kafɔɔ onoole nwɔ afiofa, ni laatɛ ale, nwaako ole diesi nwɔ kaamɛ. 5 Kafɔɔ otii wɔ ninkyɔɔ nwɔ ni ɔlaa atoko, ni lɛbɔmbɔ le akpe ɛɛta ni Yaa lewo nimu. Nle bubayɔ muntofo bulɛ kubio buɔbla ni onwii ku Yaa ninle alɛ, 6 otii wɔ nikobuɛ alɛ ɛɛbla ni onwii ku Yaa, dikpe nii ansiɛ nkpa fɛ mmle okle di Yesu Kristo lasiɛ nii.

7 Babɔmbɔtɛ nii, diele kufiofa fɔle kɔkpana nkyesee ye. Kafɔɔ nko biye ni diɛyɔ ni bia kaasɔ kakyekɔ. Nkũ ninle ɔlaa wɔ bitoonu ni kofokofoko nɛ. 8 Kafɔɔ nunua kufiofa ko kɔkpana nkyesee ye nii, kubio kɔfɔle kule, diekye nwaako wɔ ninsi ni kaamɛ ntoodiki suoto kuotuo di Kristo kamɛ ku aye kafɔɔ kamɛ. Diekye ditunu nfɛ kɔwaalɛ ninfe, lɛkpa nwu nimu nimu nfɛ kɔkpa kofokofoko.

9 Otii wɔ nikobuɛ alɛ asi ni lɛɛkpa nwu kamɛ, kafɔɔ eekyidi ni owo nɔɔ, ni eekple asi di ditunu kamɛ bia miɛ. 10 Otii wɔ nimbɔmbɔ ni owo nɔɔ, ni asi di lɛkpa nwu kamɛ, ni lɛsalɛsaa diesi nwɔ kaamɛ nimata owo nɔɔ mbla ni okpile. 11 Kafɔɔ otii wɔ niekyidi ni owo nɔɔ, asi di ditunu nwu kamɛ, akyɛ ni kaamɛ ananye ni nfũ oofe nii, diekye ditunu nwu nkpo ntoobiɛ nwɔ anu.

15 Bitambɔmbɔ kayi ka mmle, ee lɛsaa le ninle ni kayi ka mmle lele. Diekye nse otii owo mbɔmbɔ kayi ka mmle, ánwɛ lɛbɔmbɔ kuniwii aata Teete nwu nkpo. 16 Diekye kayi ka mmle asaa kpile ya amuu ninklee ni otii ɔkɔnsɔ, asaa kpile ya di otii nnya amiɛ alɛ awɛ nya nii, ku asaa ya suoto di otii nkanta ni kaayi ka mmle kamɛ, kuninwii lɛnya diekye Teete nwu nkpo nfũ, kayi ka mmle kamɛ eekye. 17 Kayi ka mmle ku akɔnsɔkleesaa lɛnya amuu nfɛ kofe. Kafɔɔ otii wɔ nimbla ni Yaa dibiesaa kamasiɛ nkpa dinaa ni kaloo.

18 Babi nii, kayi kalookɔ ntɔɔtɛɛtɛɛ! Buatɔkɔ ye bulɛ Lo wɔ nimayila ni di Kristo suoto kamawa. Nunua balo kpinwu ba nin-yɛ ni di Kristo suoto nfɛ nkpe, nkpo oso buye bulɛ kayi kalookɔ ntɔɔtɛɛtɛɛ nɛ. 19 Nwaako batii ba mmle baale dikudi loo le mmle kamɛ basiɛtɛ, nkpo oso beedie wo kaamɛ nɛ. Nse dikudi loo le mmle kamɛ basiɛtɛ bale yi, nse baadie. Nkpo oso odie lɛma kaamɛ loo ntodiki dietuo klekle alɛ kuonwii lɛma diele wo ole.

20 Kafɔɔ aye Kristo ntɔnyɛɛnɛ Ninwuna Klekle eekpete ye di suoto, nioso bamuu lee nfɛ biye nwaako ɔlaa nwu. 21 Kɔkpana ye kukũ ko mmle, diele alɛ bieye ni nwaako ɔlaa nwu oso, kafɔɔ mmle biye nwu ni ku mmle biye bilɛ sɛlaa kuafunu diele ni nwaako ɔlaa nwu.

22 Ni owe nfɛ ninle laatɛ nwu? Nnwɔɔ ninle otii wɔ nikobuɛ alɛ Yesu diele ni Kristo wɔ di Yaa lapɛ ni ɔfɔɔ nɛ. Otii nwu nkpo ninle Kristo Lo nɛ. Nnwɔɔ niesĩ Teete nwu nkpo ku Obi nɛ. 23 Diekye otii wɔ niesĩ ni Obi nwu nkpo, eesĩ Teete nwu kafɔɔ. Otii wɔ niefũ ni Obi nwu, ni eefũ Teete nwu kafɔɔ nɛ.

24 Bilolaa binyu bilɛ ɔlaa wɔ bianu ni bia kaasɔ kayekɔ, biemufũ nwu bieklee siitu lee kamɛ. Nse biemufũ ɔlaa nwu nkpo bieklee, ni obe lele bibabla onwii ku Obi nwu ku Teete. 25 Lɛsaa le di Kristo labuɛ aatɛ alɛ abata wo ni ninle nkpa be ninnaa ni kaloo.

26 Ta batii ba nikokpee kɔnyaabe alɛ bɔɔkyɔnkyɔ ye ni oso kɔkpana ɔlaa wɔ mmle nkyesee ye. 27 Kafɔɔ aye yi, Kristo lɛnyɛɛnɛ Ninwuna nɔɔ eekpete ye di suoto. Di obe wɔ di Ninwuna nɔɔ nsi ye ni kaamɛ, otii kuonwii diefĩ ye alɛ aatuo ye asaa. Diekye Ninwuna nɔɔ kotuo ye lɛsaa biala. Asaa ya kafɔɔ ootuo ye nii nte nkpo, diele sɛlaa sele. Nkpo oso bikyɔɔ Ninwuna nwu asaa otuo atoko, biesiɛ di onwii ɔbla kamɛ ku Kristo.

28 Babi nii bɔmbɔtɛ, nwaako bisiɛ di onwii ɔbla kamɛ ku Kristo obe lele alɛ nse eekple ɛɛwa, buafuo nwɔ oyila di anu ku sɛkambi alɛ sinunsɔ dilaakpɛ ye di dii nwu nkpo suoto. 29 Biye bilɛ Kristo nte tinini, nkpo oso bitofo bilɛ otii wɔ nimbla ni asaa tinini, Yaa obi ale.