24
God sauawa badowa ualeide
3 Tane Iawe God anaanawa ita gagalowa uduudu Moses wanena alene apana diamono eteiena. Ita apana uduudu sipoasane waienase, “No dewa uduudu Iawe God wana rua dewamota.”
4 Mape Moses Iawe God gagalowa ita anaanawa uduudu wamona girumalen. Ita imonemba tadina bedewe me enenwisene wadi atowe pulo sumpa watawa dewasan. Ita do me seu uduudu 12 debamau eueuwa baiwa Israelwa damba ruaulene endomon. 5 Ita me Israelwa bedeuwo apana sanaau waaubamono antone pue Iawe God mampe pulontopua baiwa bomone sumoiena. Ita do mo wanwan euda me do deantoiena pulowa pue kau otamone pulonton. 6 Tane Moses pue osinau moawa laukai bedewe aine en ita moawa da wadene pulo amonantoie suia bolawa butasane alen.
7 Ita me saua badowa girumalala wadene wisialeno apana uduudu eteiena. Ita waienase, “Oa, no Iawe God gagalo uduudu wana aiawa ruantate dewasata.”
8 Ita Moses osina laukai bedewe winedia wadene apana uduudu osouwo uwakokosane ita wanase, “Ewane, osina ema ipa Iawe God anaanawa me sauawa badowa✡Matiu 26.28; Mak 14.24; Luk 22.20; 1 Korint 11.25; Ibru 10.29 ema enalena mampe me do deaitena ipawanasadie badosade.”✡Ibru 9.19,20
12 Iawe God Moses mampe gagalolene wanase, “E wadiwa ode winewo wainenta. Ne anaanana ita gagalona seu nata tabatabau osowe girumantape eneepo aite apana waeuwamono etompe ruawantompa.”
13-14 Mape Moses ita me sauwa apana Iosua nata a baiwa imaanton. Me apana eiau diamone wanase, “E mape wanlempo no antate leuntate winta. Aron ita Ea e do mape wainilana, apana mida empuempuntompa mo mampo wimopuo dodomanamopu.” Ita Moses Iosua nata a uwantone God wadiwa iwe odane anton.
15 Tane Moses God wadiwa odene aidalen ita giou dubaia wisene wadi boden. 16 Ita Iawe God sapawa debamaia wadi Sainai osowe ien. Tane giou wadi sa bodene winedio walama 6 dialen. Ita walama 7 bedewe God giou sawanaida bedewe Moses apasana mampe wimpi. 17 Tane Israel apanawa wadi atowe waimoie pisiwane Iawe God sapawa debamaia ia debamaia impa rua wadi iwa osowe eweiena. 18 Ita Moses giou taunbolenawo odene alene waina walama 40 ita tadina 40 dialen.