8 Iawe God Moses diene wanase, “E apana diamowo ape kakaiwa ne baina wadapuo ita ne wimpe mo waimoia bedeuwo wainepina. 9 E ape kakaiwa ita bedewe nitu uduudu aleupu mape euwaepo ewaa ruawaida dewasaa.”

10 “Mo ia akeisia mampe bokis dewasapu. Ita daumawa 110 sentimita wadepi ita debamalepia sentimitawa 66 ita odepi alepia 66 sentimita wadepi. 11 Tane etepa uduudu bedewe ita onape goldida os mampe rupusana ita moawa iawa gold os mampe wadadosana. 12 Ita rin uduudu 4 gold mampe dewamone bokis wawa deadea osouwo teamona. 13 Tane kewa ia akeisia mampe dewasana ita gold os mampe rupusana. 14 Ita e kewa sa rin bedewe neanamowo bokis waiwa dauwo wimopu awanempaa baiwa. 15 E kewa sa rin bedewe aimoe ea, mai teinaubaitaa, dia. 16 Ne sauana badowa girumalala seu tabataba nata osouwo girumalala wineia eneepo bokis ema bedewe aimoa.

17 Ita e bokis enabodawa ebowa; kadi insempadabuasampa goldida os mampe dewasaa, daumalepia sentimitawa 110 wadepi ita debamalepia sentimitawa 66 wadepi. 18 Tane e nitu nata ensel rua mabupu dola ebowa kerubim gold mampe nata dewamoa. E ama mampe gold epamowo kerubim inainambu rua segantopu 19 ita kerubim dea wade baida da osowe itua ita da baida dauwo ituwo ita enabodawa do deantopu. 20 Mo nata mabupu lalantopue bokis enabodawa enapubodapu. Ita enabodawa sa onapeinta danau deasapue itupue ewompa.✡Ibru 9.5 21 Tane e saua badowa seu nata tabataba osowe girumalala wadee bokis bedewe ana, ita enabodawa bokisiwa iwa osowe itua. 22 Ita kerubim nata mabupu sawanauwo ita kadi insadabuasampa enabodawa onape sawano saua badowa bokisiwa winediawo ne donepina, ita sape ne anaanana uduudu eneepina Israel apanawa baibu.”