34
Iawe God euda dewasadia sasawa
Walama dea Dawid Abimelek danawe dewalena ewaewa abo oopa rua, sa baiwa me wanaubeno alen. Dewa ema aupe Iawe God Dawid sausana insene ita sasa ema girumalen.
1 Ne walama uduudu Iawe God wadaposisapina
ita me asowa wapina.
2 Ne me ebowa debamasapina,
e apana ituaisilala gagalo ema etane nuaeuitana.
3 Iawe God wadaposisata,
no awodea me ebowa debamasata!
4 Ne Iawe God mampe rauparinteno ita me ne sipoanen,
apana sa ne sauntedina mampo me inanen.
5 Apana mida sau baiwa Iawe God mampentoia,
mo nuaeuntoi,
me walama uduudu mo saumompa.
6 Ne poka uara mainawo wimoieno
tane Iawe God mampe rauparinteno etanen,
ne poka etedino me inanen.
7 Apana mida Iawe God wiwirawantoia,
me enseliwa mo oniamode,
me mo gonaamodio do waimoi.
8 Sa baiwa e Iawe God mampeitane
ita me euwaa dauwaida etana.
Naita e me onialepia baiwa mampe aitana,
e nuaeuitana.✡1 Pita 2.3
9 E sumanailala Iawe God ebowa debamasana.
Apana mida me ebowa debamasaia
mai dima abolawantopu.
10 Walama isiwa pue laion omana tomodio lai,
tane mida Iawe God sumanaiwantoia nitu uduudu mampe rua os waimoi
mai nitu da abolawantopu, dia.
11 Ne obaina, mainawo winlene gagalona etana.
Ne waeuwalepo Iawe God wiwirawaitonuna.
12 E wanwan daumawa ita do
wanwan euda waina menalempa,
13 mai apana wakadisamonuna
do mai laga wanuna.
14 Kadiwa dewasailana ene tane euda dewasana,
ita apana saumono wanwan euda obasa wampu.
15 Iawe God emawa apana dewa dodomana dewasaia osouwo winede,
mo sau baiwa me mampe iririntoio etamode.✡1 Pita 3.10-12
16 Tane kadi dewasaia apanawa mampo
me namba nambesade,
mo bontopuo ando mai mida mo umanau wapi, dia.
17 Iawe God apanawa me mampe sau baiwa iririntompo etamopi,
me mo poka uduudu bedewe saumopie inamopi.
18 Apana mida insaisau omaomala
Iawe God ipa mo do,
ita mo mida nuabolantoie insaisau omedia
me saumopie insaisau badosapi.
19 Dewa dodomana dewasaia apanawa
poka saiwa uara donsai,
tane Iawe God walama uduudu mo saumodie inamode.
20 Me emawa mo osouwo,
sa baiwa mai neaipu da tewapi.✡Ion 19.36
21 Tane kadi dewalala, mo muba kadiwa dewasaia kadimopi,
ita apana mida dodomana dewasaio emalawoamoia
matangelawa mo wadapu.
22 Tane Iawe God me nolawa dewalala inamode.
Apana mida Iawe God saumopie inamopia baiwa
me mampe antoia mai matangela donsapu, dia.