51
Kadi insadabua raupariwa
Warere Dawid apana ebowa Uria manainapa ebowa Besiba nata ninanton. God perowetawa Natan wisene aia badowa mampe Dawid diaidasan. Me aia ema etene dewawa kadiwa insene ita nuawa pareleno sasa ema girumalen.
1 O God, e nuawadawadaa mai diala,
sa baiwa nuaparenaite saunea.
E walama uduudu apana nuapareuitiana,
sa baiwa kadiwana inseadabuasaa.
2 Kadina mitaaubea,
ita mitanee eunea.
3 Ne ateina dewa kadiwa dewasana,
nainanepe winedio walama uduudu insedina.
4 Ne kadiwa e manawo dewasana, dea e os manawo;
e emaawo ne eueuwana ipa kadiwa.
Sa baiwa e ne diane waanase, “E kadiwa dewasaana!”
E ulaipa waiana.
E ne matangelanea, sa e dewa dodomana dewasaiana.✡Rom 3.4
5 Ne muntena walamawe odene ita tauma ne ipa kadi dewalala,
Ne inana bupa bedewe kadi do wainedine.
6 Tane e meneedia ne nuana bedewe ulaipa nopesapi
sa baiwa nuana bedewe insaisa eubu teamoa.
7 Ne kadiwana mitaaubee ita eunea
ita sapaida wapa.
8 Ne kadina inseiadabuasaiana umanawa wawo etape
ita ulaipa mampe nuaeuntapa;
e ne dewaneano neaina nonosinton
tane osowe dewaneawo nuaeutapa.
9 Ne dewana kadiwa mai ewamona
wade nambeidomoa.
10 O God, ne nuana mitee sanaasaa
ita ulaipa mampe ne waroroepa.
11 Ne mai waaubaneawo eepe anteapa!
E Aleua Kakaiwa bedenawo mai wadaaubea!
12 Dewaneawo osowe nuaeunteapa, bauta inaneano nuaeutena rua,
Ne dewaneawo e aiaa ruawantepina dewawa menaneampa.
13 Ita kadi dewalala mampo e intaa ne waeuwamopina
ita mo leuntopue e manawo wimpu.
14 O God, e ne inanea,
saunee inawana oniea
ita ne nuaeu mampe e dewaa dodomana sasawa wapa.
15 O Tatana, sauneawo moana wadapaaubepe wadaposiepa.
16 Ne pue supe pulonteapa e manawo,
tane e mai meneeipona.
E mai pulo inainamba sa iririwa waipona, dia.
17 Ne neba ituaisinteape iririepo kadina inseadabuasaa,
e pulo inainamba ema meneede.
O God, ne kadiwana dauwa etane nuaparentene
manawo rauparintedina mai leunea.
18 O God, bola Saion nuaparewaitee sausaa;
me gonaawa tewana osowe wadawo enepi.
19 Ita apana amonau nuau dodomana mampe e manawo dewasampo nuaa eulempa;
mo pulou daitada sumpe e nuaa eusampa ita kau mona e oltaa osowe pulontompa.