Maktubu dɨnə Mãr̰ĩ duwa 1 Tesalonik 5

1 Chamranin, gwale gɨ ɨrɨm dara mani nə ta di, wála day me dawa day dɨ cendi ha àlala lə me da, ùr dara ba nə jangɨnangnin gwale day maktubu lə bədə. 2 ꞌYeni gang kaw, anə ꞌwocn̰ com dara wála gɨnə Aba ciri duwa di ha dɨmə dɨdəndɨ lə jisgɨ ya mẽ de gɨ changa dwar̰ɨ. 3 Wála gɨ nare ha waya da: «Caga ka da, mana hɨlal le ɗɨm me, də damang i labiya pəgɨn̰» mwom da, wála gɨ ta lə dog, mani nə wome woni myanda nare ha dɨmə dɨdəgɨ lə ya wamani gɨ yàa ba àl gɨ deme ta de. Wála gɨ ta lə da, gun mɨn ha biyə sɨw bam dwalɨn̰yə bədə.

4 Ɗɨm da, chamranin, ꞌyeni da, anə i nare nə anə dam dilɨmmə bədə. Yande da, wála gɨ ta di ha dɨmə dɨdəngə ya mẽ de bədə. 5 Dara ꞌyeni pad dannə, anə dam i mana gɨ ácn̰eyə me, anə àl mani dan daa dawa dɨrədɨ lə ɗən̰ me ca. Nendɨ da, də ꞌyang i nare nənə changa dɨra bədə me, dilɨm dɨra bədə me ca. 6 Yande da, inandɨ nuni ya nare nə ɗang de bədə. Damnandɨ dɨrəndɨ bɨ̀ra me, damnandɨ dɨrəndɨ pəgɨn̰ pɨrang me ca. 7 Nare woni ꞌya nuni da, cendi i i gɨ changa me, woni widɨbə gani kaw, cendi widɨbɨ i gɨ changa me ca.

8 Ɗɨm da, nendɨ nə də damang mana gɨ waleyə da, damnandɨ dɨrəndɨ pəgɨn̰ pɨrang. Kalnandɨ dusɨrəndɨ Mãr̰ĩ dɨwə me, ùrnəndɨ sɨdəndɨ me, dara dusi ɨnda dɨ kala Mãr̰ĩ dɨwə me, ùrə ɨnda gɨ sɨdəndɨ me da, wun ya gare gɨ ɗore gaba jara say de. Me kala gɨ ɨrmə bɨlə dɨwə da, wun ya jagɨwa dɨ idɨ say dɨ gun ɨbɨ dɨwə de me ca. 9 Mãr̰ĩ ꞌwagandɨ dara àla ganandɨ sariya bədə me, i dara ꞌyàndɨ bɨlə gɨ Aba ciri ɨnda gɨ Jesu Kris sumɨw. 10 Jesu Kris di gɨra mar dara darandɨ, ba də damnang i dɨrəndɨ bɨ̀ra labaa, ba də marnang le kaw, ba də hanang damna gandɨw. 11 I dara ta di me, wi wi kaw, hurnaw jaw abnani dusɨwə me, wanaw jaw lə dara dusi dan dɨ kala di jwarna hana pii pii, ya anə àlgɨ nɨm de ɗɨm.

Gɨsəni

12 Chamranin, nə amsangnin dara anə banə àlnagɨ nare woni ɗɨbə dɨrəngə gɨləng gwale gɨnə Mãr̰ĩ duwa horɨmbə. Nare woni ɗɨbə dɨrəngə gɨsəng me, ɗangr̰ang me ta di, i Aba ciri gɨ Mãr̰ĩ me ꞌyàgɨ́ dwana, an̰ju. 13 Yɨnəgɨ gɨ dwani nan̰ me, bwanagɨ sɨdəgɨ lə dara giyə day gɨ cendi àlɨw di me. Damna me kal hɨlala jwam ina lə dwar̰angə me ca.

14 Chamranin, nə wayangnin: Nare nə àl mani gɨ bɨrmə day bədə da, waynagɨ le me, nə dwana day ilə bədə da, wanagɨ lə me. Kal wi wi kaw, unəw jaw dɨw bam me ca. 15 Dwayna, gun gɨ jaw àlnaw àcn̰a da, kal a cwarna àlnaw àcn̰a me bədə. Gɨ wála wála, àlna mani nə lade dwar̰angə ꞌyeni me gɨ nare pad me ca.

16 Kal sɨdəng ꞌywalnange gɨ wála wála. 17 Amsɨna Mãr̰ĩ dɨban bwaa gɨ gwayni. 18 Ina i mani nə we weyə kaw, àlnaw Mãr̰ĩ dóche. Ta di me i mani nə an̰ji ùrgɨ dara nare nənə Jesu Kris duwa ba àlnagɨ di.

19 Kalna ɨmədɨ dúndi dɨnə Mãr̰ĩ duwa bɨrmə gaba àla giyə dɨra bam ɗi. 20 Gun gaba cɨmə Mãr̰ĩ bɨw wayna gwale da, kalna àla gwale duwa di ichɨn̰ ɗi. 21 Kan̰jɨna gwale di gɨndɨw yarna le do me, gɨ lade da, unəw àlna gɨ giyə. 22 Mani nə we we nə lamnang dara bwang àla gɨ àcn̰a lə da, gamna sɨdənge.

Amsa gɨ Mãr̰ĩ gɨnə Pol duwa me labiya duwa me

23 Kal Mãr̰ĩ gaba hɨlala jwam di gɨ sɨw duwa kɨdɨnəng nare nə dusɨrəgɨ wusɨbɨ her her me, gamna doni dan me, ɨrmə dan me, dúndɨrəng me ca, dara wála gɨ Jesu Kris cwara duwa lə da, gun ha àsang gwale dɨdəngə bədə. 24 Aba ꞌwagang di i gun gɨ ɨrmə duwa i mɨn. I an̰ji me ha àla mani nə ta di, an̰ju.

25 Chamranin, ꞌyeni kaw, amsɨna Mãr̰ĩ dara daranin me ca.

26 Àlnagɨ chamrandɨ pad labiya nan̰ me, yɨnə ɨsɨragɨ gɨ ɨsɨrang sɨr àlnagɨ gɨ labiya.

27 Nə amsangnin gɨ Aba ciri sumɨw, maktubu dɨ ta di, āsɨnadɨ daa chamrang dɨrəgɨ lə pad kalgɨ gɨ dwayna.

28 Kal Aba ciri ɨnda gɨ Jesu Kris piynə bɨw dɨdəngə.