Maktubu dɨnə Mãr̰ĩ duwa Kɨrara gɨ daa (Exode) 1

Maktubu dɨnə kɨrara gɨ daa kwaynaniyə

Maktubu dɨ ka dwar̰ɨ

Maktubu dɨnə «Kɨrara gɨ daa kwaynaniyə» da, way i dara dɨmə gɨnə nare nə Israyel day gɨ dɨmə nɨm bam kwaynaniyə sɨn̰a dɨ Ejibtɨ lə. Mana gɨ Maktubu dɨnə Mãr̰ĩyə da, maktubu dɨ ka di pam i maktubu dɨ «Diyə gɨ mani gɨndəgɨ» (Genèse) tardɨ. Nare nə Israyel di da, i mage nənə Abɨraham duwa me, Isak duwa me, Jakob duwa me. Jakob di, gɨ ꞌwogɨw sumɨw gɨ mɨn ɗang Israyel. Mãr̰ĩ biygɨ bii ba a ha hára gandagɨ ꞌyàgɨ́ sɨn̰a dɨ dùmbu me nãy me chow lə nan̰e. Pii da, nare nə Israyel gɨlə dɨrɨn̰ nan̰e aliya aru aru wodɨ dolgə nə Ejibtɨ ɨsɨragɨ lə. Me caga da, Mãr̰ĩ àl bɨw gɨ an̰ji wayɨw di me, dɨməgɨ bam sɨn̰a dɨ Ejibtɨ lə. An̰ji ùr ba a yɨ gandagɨ mɨlan dara cendi ba ꞌwacn̰ana sumɨw me ba mɨlawdɨnaw an̰ju mɨn tenene, an̰ju gɨ ba a i «Aba dama gɨ dɨrəw bɨr̰ɨn̰ gaba dɨməgɨ bam kwaynaniyə sɨn̰a dɨ Ejibtɨ lə di» (20.2).

Maktubu dɨ ta di, gɨ nem sabadɨ dodə korgɨn̰ jii. Tuldɨ dɨ pii da, i nare nə Israyel gɨlə day gɨ dɨrɨn̰ mana gɨ sɨn̰a dɨ Ejibtɨ lə. Me Mãr̰ĩ ba ꞌwogɨ Moyis i man dara dɨmə nare nə Israyel di bam sɨn̰a dɨ ta lə di me, mani nə dan̰a nə Mãr̰ĩ àlgɨ̀ dara dɨməgɨ nɨm bam sɨn̰a dɨ Ejibtɨ lə bɨraa ha gandagɨ mana gɨ kur̰a dɨ Sinay gɨndɨdɨ lə bá di mo? (ch. 1-18) Mana gɨ ta lə da, Mãr̰ĩ yɨ mɨlan gɨ nare nə Israyel dara cendi ba kɨdɨnə i nare duwa me, an̰ju ba a i Mãr̰ĩ day me. An̰ji ꞌyàgɨ́ bii duwa gɨ ꞌwoo me, cendi yɨ le. (ch. 19-24) Kur̰a dɨ Sinay dɨdə da, Mãr̰ĩ gɨlɨw Moyis ba i man me an̰ju ba ha ɗangr̰a kundi duwa gɨ ba a ha dama lə di me, mani nə woni àla giyə lə me, bɨraa wála gɨnɨn̰ wodɨ bá. (ch. 25-31) Me nare nə Israyel di nem gama Moyis cwara duwa bədə. Cendi ɗangr̰ɨ labe gɨ dwe dúndɨw ɨrmɨw ya Mãr̰ĩ day de me, hɨrwɨw me, way ba i an̰ji me ba dɨməgɨ bam sɨn̰a dɨ Ejibtɨ lə di. Mãr̰ĩ dusɨw so dɨdəgɨ lə nan̰e, me gɨra cor yɨ gandagɨ mɨlan bi dara an̰ji i aba yara nare n̰agɨni day. (ch. 32-34) Ɨr̰ɨ cendi ɗangr̰ɨ kundi gɨnə Mãr̰ĩ duwa me, wála gɨ kundi giyə duwa ꞌyen̰ bam mwom da, ꞌywagda gɨnə Mãr̰ĩ duwa chə́ə ya sawe de hára mu kundi di daa me wor dam lə. Ta di gɨl dara Mãr̰ĩ ba dam lə nare duwa dwar̰agɨ lə. (ch. 35-40)

Nare nə Israyel àl kwaynani mana gɨ sɨn̰a dɨ Ejibtɨ lə

1-4 Dwaynandɨ, Jakob gɨ sumɨw gɨ mɨn i Israyel dɨndaw nə ha gɨ abɨragɨ mɨn mana gɨ sɨn̰a dɨ Ejibtɨ me i ta: Ruben me Simiyõ me Lebi me Juda me Isakar me Jabilon me Benjami me Dan me Neptali me Gad me Aser me. Nare nə ta di, wi kaw wol nare duwa nə kɨrə daa hargɨ mɨn. 5 Jakob dɨndaw me mwàgɨraw me pad da, nem nare gɨnɨn̰ wurgɨsubu. Me Jakob gorndɨw gɨ Josep* da, ilə alə sɨn̰a dɨ Ejibtɨ lə pii ɗɨm.

6 Ɨr̰ɨ Josep me chamraw nə pad di me margɨ bam. Nare nə ta di mar ꞌyen̰ bam pad swaa dayyə. 7 Me nare nə Israyel di yə̀ dine ꞌyarbar nan̰ me gɨr̰ɨ ha gɨ dɨrəgɨ pii pii, me i nare nə àl dwana nan̰e me ca. Cendi ꞌyarbar ꞌwonbɨ sɨn̰a dɨ Ejibtɨ di dɨdɨ daa.

8 Caga da, i dole gɨ geche gɨ dɨrway me yala dam lam dwãr̰ĩ sɨn̰a dɨ Ejibtɨ lə an̰ju. Dole gɨ ta di ꞌwocn̰ Josep di bədə. 9 An̰ji waygɨ nare duwa ba da: «Yarna, nare nə Israyel di yala ꞌyarbar nan̰e me àl dwana nan̰ ɗoyndɨ bam me ca. 10 Kal də kan̰jang kojɨgə mɨn dɨ idɨ ɨməgɨ gɨr̰ə day gaba hára pii pii di bam. Də àlnang yande bədə da, ɗan̰ wála gɨ say dara ɨndara da, cendi ha bwara woni mar̰ande ɨnda gɨndəgɨ lə jara ganandɨ me ha ɓɨr̰ɨn̰ə hára kala sɨn̰a ɨnda di bam.»

11 Mwom da, nare nə Ejibtɨ di piy gechide woni yɨbə nare nə Israyel gɨ dwana dara ba àlna giyə gɨ wome gaba biyə dwana day bam. I yande me, nare nə Israyel awɨw nɨm gɨ dole gɨ Ejibtɨ di ciri dɨ gechide dɨ idɨ gama mani. Ciri dɨ ta di, gɨ ꞌwogɨdɨ Pitom me Ramses me. 12 Me mana gɨ gɨ gɨlgɨ gɨ nare nə Israyel dɨrəgɨ nan̰ yande kaw, cendi ꞌyarbar sɨn̰a dɨ Ejibtɨ lə ha gɨ dɨrəgɨ pii pii u sɨn̰a day di dɨdɨ bam pad. I dara ta di me nare nə Ejibtɨ di ɨlgɨ nɨm. 13 Mwom da, cendi àl nare nə Israyel di kwaynani nan̰ ɗoy bam bi. 14 Cendi gɨlgɨ dɨrəgɨ gɨ giyə gɨ wome nan̰ gaba bwariya jirbe me, piyə gɨ dirɨngəl me, giyə gɨ bam yiga lə gɨ dɨrəw jiga jiga pad me ca. Wamani gɨ ta di pad da, i dara àlagɨ̀ nɨm gɨ kwaynani.

Dole gɨ Ejibtɨ ùr ba a ꞌyə dine nə abje nə man̰ nənə nare nə Israyel day bam

15 Namde woni yàa kwandagɨ nənə nare nə Ebɨrə† day sɨr ilə. Namde nə ta di, dɨ mɨn gɨ ꞌwogɨdɨ Chipɨra me, dɨ mɨn ɗang gɨ ꞌwogɨdɨ Puwa me. Wála mɨn, dole gɨ Ejibtɨ di u bɨw waygɨ ba da: 16 «Mana gɨ anə dara yàa nare nə Ebɨrə namdagɨ da, yarna dwe di le. Dwe di ina i abe da, ꞌyánaw bam, me ina i deme da, kalnadɨ dɨ bɨlnə le.» 17 Me namde woni yàa kwandagɨ di lán̰ɨw Mãr̰ĩ le, cendi àl mani nə dole waygɨ di bədə, ꞌyə dine nə abje di bədə, kalgɨ pad bɨl.

18 Ɨr̰ɨ dole di ꞌwaga namde woni yàa kwandagɨ di sɨwə me ùrgɨ ba da: «Dana me anə àl yande mo? Dana me anə kal dine nə abje di bɨl mo?» 19 Namde woni yàa kwandagɨ di cow lə diiyə ba da: «Nare nə Ebɨrə namdagɨ da, i ya namde nənə nare nə Ejibtɨ day de bədə, cendi àl dwana nan̰e. Mana gɨ deme dɨ idɨ yàa kondɨdɨ ba dɨ hára dara yàdɨ le sɨn̰ da, tandi yə̀ bam pii dɨrədɨ lə ɗɨm.»

20 Mwom da, Mãr̰ĩ àl ladni gɨ namde woni yàa kwandagɨ di, me cor nare nə Israyel di ꞌyarbar ha gɨ dɨrəgɨ pii pii me, àl dwana nan̰ me ca. 21 Me mana gɨ Mãr̰ĩ yər dara namde woni yàa kwandagɨ di ba lán̰ɨw an̰ju gɨ Mãr̰ĩ di le mwom da, an̰ji ꞌyàgɨ́ dine di ꞌyarbar nan̰.

22 Me dole di u bɨw waygɨ nare duwa pad ba da: «Dine nə man̰ nə abje nə nare nə Ebɨrə ha yàgɨ pad da, bwanagɨ kurayyə, me nə namde pad da, kalnagɨ gɨ bɨlnə.»

*1:5 1.5 Josep Josep di, i Jakob gorndɨw gɨ mɨn gɨ an̰ji ùrɨw nan̰ me ca. Yarna maana duwa mana gɨ maktubu dɨ Diyə gɨ mani gɨndəgɨ lə (Diyə gɨ mani gɨndəgɨ (Genèse) 37–50).

†1:15 1.15 nare nə Ebɨrə Nare nə Ebɨrə da, i nare nə Israyel sumdəgɨ gɨ mɨn ɗang.