1 Ər̰ə Jesu day gə nə̂ woni gərsə̂ gwale duwa gərgə managə kuray gə ɓəle gə Galile dugədəw də alə̂ ta-lə̂, i wama gə Gerasa-lə̂. 2 Me managə Jesu chə dodə̂ bərwa dalawə̂ da, abe mən gə dundi də acn̰e widəbəw swa managə munəni-yə̂ hara ꞌyo Jesu. 3 Abe gə ta di, ciri duwa də dama i managə munəni-yə̂. Gun mən kaw neyem magədaw dodə̂ bə̂də̂. Gə sul kaw, gə neyem magədaw dodə̂ bə̂də̂. 4 Gə wala wala gə bow kaya-kaya gədawə̂ me sul əsawə̂ me kaw, an̰ji agədəgə bam. Ər̰ə gun gə ɗang gə neyem yə̂w biyə̂w bəw dodə̂, ilə̂ bə̂də̂. 5 Gə changa me gə dawa me an̰ji kədəbə̂r munəni-yə̂ me kur̰a dədə̂, me dosbə səw jarbe gə gəlale me sojəbə r̰ur̰u me ca.

6 An̰ji yara Jesu haralə̂ hə̂n̰ da, wada gəra piy gubərə̂w dodə̂ dərə̂wə̂. 7-8 Mwom da, Jesu waydə dundi də acn̰e ba da: «Dəm bam abe di səwə̂!» Me dundi də acn̰e di soy mar̰jadə daa nan̰: «Əjəm, Jesu gə Mãr̰ĩ gaba dama mani dədə̂gələ̂ pad gorəndəw, mə̂ ur i na sənə̂ mo? Nə̂ wayəm gə Mãr̰ĩ suməw: Gələn dərə̂n bə̂də̂!» 9 Mwom da, Jesu urdə ba da: «Gə ꞌogi man mo?» Tandi wayəw: «Gə ꞌogən ‹Gər̰ə̂›, dara nə̂ gər̰ənin nan̰e.» 10 Me tandi mərgəw Jesu dara ba ꞌywarnagə bwanagə hə̂n̰ bə̂də̂.

11 Mana gə ta-lə̂ di, gochə̂ng gəmə̂r ilə̂ wamalə̂ kur̰a tuldələ̂. 12 Dundi də acn̰e di wayəw Jesu da: «Kalnin nə̂ hanin gochə̂ng nə̂ ta di sədə̂gələ̂.» 13 Jesu waygə ba hana. Ər̰ə cendi dəm bam abe səwə̂, ha bwara gochə̂ng sədə̂gələ̂. Gochə̂ng ɓər̰in̰ daa kur̰a tuldələ̂ hir, wa bor managə kuray-yə̂, chə̂ nimi gəmaj gəmaj marbə bam. Gochə̂ng di neyem i ya dubu sər de.

14 Nare woni gama gochə̂ng di wada hara ciri də gechide-yə̂ me də dine-yə̂ me waygə nare gwale gə ta di, ər̰ə nare di wada dara yara mani nə̂ alal di. 15 Managə cendi gəra Jesu tuləwə̂ ib da, yə̂r abe gə dundi də acn̰e widəbəw nan̰ pii di dam lə̂ dodə̂, dərə̂w biyə̂r dodə̂, hurə̂ barge səwə̂, me cor lan̰a algə. 16 Nare woni yara mani nə̂ al abe me gochə̂ng me gə dərə̂gə da, kəbəgə kwandagə gwale di, 17 ər̰ə cendi mərgəw Jesu ba hana kalnagə sən̰a day ɗi.

18 Managə Jesu nagə dam bərwa-lə̂ dara hara ɗəm da, abe gə widəbə pii di amsəw ba kalnaw ba ha gandəw. 19 Me Jesu əməw hara gandəw bam me wayəw da: «Cor, ha ulay dəma-lə̂ ꞌywa war̰am me waygə mani nə̂ Aba ciri gə Mãr̰ĩ al gandəm me n̰agəni dəma də an̰ji yə̂r di me.» 20 Mwom da, abe di cor ha waya mani nə̂ Jesu al gandəw managə wama gə gə ꞌogəw «Ciri də mwaj» dalawə̂, ər̰ə nare dam yə̂r kə̂mə̂ duwa.

21 Managə Jesu day gə nə̂ woni gərsə̂ gwale duwa cwaragə bi gə bərwa gəra managə kuray gə ɓəle dugədəw də ka-lə̂ bi da, nare nan̰ dayar gandəw bi managə kuray di bəwə̂. 22 Mwom da, abe mən gə gə ꞌogəw Jayrus, an̰ji i geche gənə̂ kulə gaba amsa Mãr̰ĩ gənə̂ nare nə̂ Juwib day, swa hara. Me managə an̰ji bo dərə̂w ca yə̂r Jesu da, an̰ji əndər dodə̂ dərə̂wə̂ 23 me mərgəw nəm ba da: «Hare ɗe! Hare ɗe! Durmə̂n womə̂r nan̰e, ilə̂ dara mara le. Hare, mə̂ ha bwadə əsam dədə̂ dara kal də ꞌywana labiya me də damna nəm bəra.» 24 Me Jesu so ha gə abe di. Nare nan̰ bow ha gandəw me dəmdəw pə̂gin̰ mad mad managə haralə̂ di.

25 Managə nare nə̂ gər̰e nə̂ ta di dwar̰agələ̂ da, deme mən də bare ha sədə̂ neyem aliya mwaj dii sər kaw ilə̂ me. 26 Tandi hoy sədə nan̰ managə harba gə dogtə̂r sədə̂gələ̂, meyendə əsədə bam pad kaw, ꞌyo labiya bə̂də̂. Ər̰ə, bare di cor ha sədə̂ nan̰ bi. 27-28 Me managə deme di doy gwale gə gə way dara Jesu mwom da, tandi waya dusədələ̂ ba da: «Dee nə̂ ɓəlnə̂ i barge duwa məra kaw, nə̂ ha ꞌywa i labiya.» Yande da, deme di hara gə n̰ilanga Jesu tarəwə̂ nare dwar̰agələ̂ ɓəl gə Jesu barge duwa. 29 Mana gə ta-lə̂ dog, bare hara duwa di ɗəbə dodə̂ me ca. Tandi kaw ꞌocn̰ dog dara ba də ꞌyo i labiya ɗəm. 30 Me mana gə ta-lə̂ dog da, Jesu kaw ꞌocn̰ dara dwana duwa də yab ba gandə yaa bam. Ər̰ə an̰ji co dərə̂w tarəwə̂ bi yə̂r gə nare di me urgə ba da: «I wi me ɓəl barge ni mo?» 31 Me woni gərsə̂ gwale duwa cow lə̂ diyə̂ wayəw ba da: «Mə̂ yə̂r nare di gər̰ə nan̰e, cendi dəmdə̂r gandəm daa pə̂gin̰ mad mad ta me, mə̂ ur aba ɓələ̂m ɗang tug mo?» 32 Me Jesu kal səw ꞌwun̰bə̂ tulbə̂w dara gaa baa yə̂r gə gun gaba ɓələ̂w di. 33 Ər̰ə deme də idə ɓələ̂w di, lan̰a aldə*5.33 Managə pama gə bii gə ꞌwoo gənə̂ Moyis lə̂ da, nare nə̂ Juwib day-ə̂ da, deme wala dəra gaba yə̂ə̂ bare-yə̂ baa baa, labaa mwom gə bare hana sədə̂ da, deme di acn̰e nare nə̂ Juwib dərə̂gələ̂ (Lebitik 15.19-30). Bii gə ꞌwoo way ba da: Gun gə deme də ta di ɓəlnə̂ səw da, an̰ji kaw cor gə acn̰e me ca. I dara yande me deme neyem gaba ganda iche hara gə kwandadə bə̂də̂ managə bare ha nəm sədə sən̰. I dara yande me managə maana də ka di lə̂ da, deme di, algə mani nə̂ tandi dee neyem gaba alagə bə̂də̂ ta di: Tandi hurə̂r nare dwar̰agələ̂ me ha ɓələ̂ nəm gə gun gə urə̂ dəra ta di. I ya ta di me lan̰a aldə nəm nan̰e., sədə sadədə daa tag tag, dara tandi ꞌocn̰ mani nə̂ yala alal gandədə di, me tandi hara əndər dodə̂ Jesu dərə̂wə̂ me wayəw gwale dəra səw daa pad. 34 Me ər̰ə an̰ji waydə ba da: «Chidən ni, də̂ kala dusi dənə̂ yande da, də̂ ꞌyo bələ̂ ɗəm. Ha labiya, mwom diya di kaw kaliye ɗəm.»

35 Managə Jesu ilə̂ wayadə deme di gwale di lə̂ sən̰ da, nare nə̂ yab swa kərə̂ nə̂ Jayrus-lə̂, me cendi wayəw Jayrus ba da: «Durmə̂m di mare ɗəm. Hoy Aba gələ̂nin mani di haralə̂ pə̂gin̰ bə̂də̂.» 36 Me Jesu doy gwale day di com, me an̰ji wayəw Jayrus ba da: «Kal ala lan̰a ɗi me kal dusəm mən dənə̂.»

37 Me managə Jesu so dara hara kərə̂ nə̂ Jayrus-lə̂ da, an̰ji əmgə nare nə̂ dee bwaw di hara gandəw bam, me kal i nə̂ Piyer me Jak day gə chendəw gə Jã me məra ha gandəw. 38 Managə cendi hara yala managə ciri dənə̂ Jayrus-lə̂ ɗəm da, Jesu ꞌyo nare nə̂ mən ilə̂ nulə̂lə̂, me nə̂ yab da ilə̂ swaja wuyu me. 39 An̰ji gandə ha kərə̂ me waygə nare ba da: «I dana me anə̂ nul nan̰ yande mo? Dwe də more di mare bə̂də̂, me tandi i i nuni.» 40 Managə nare ba gə doy gwale gənə̂ Jesu duwa gə ta di da, cendi aləw mə̂ng. Mwom da, an̰ji ꞌyor nare nə̂ gər̰e di bam iche, me wol dwe di abadə day gə idə me woni gərsə̂ gwale duwa nə̂ subu di me məra, ha gandəw. An̰ji gandə managə dwe di gəndədələ̂. 41 An̰ji yə dwe di əsədə me waydə ba da: Talita kum! Gəndəw də biyə̂ way ba da: Dwe də more, nə̂ wayi: So daa! 42 Mana gə ta-lə̂ dog, dwe di so ha daa. Dwe di, aliya dəra i mwaj dii sər. Ər̰ə, nare pad nə̂ ilə̂ me yə̂r mani nə̂ dan̰a nə̂ Jesu algə di da, lan̰a algə nan̰e, me cendi ɗəbə yə̂r kə̂mə̂ duwa. 43 Me Jesu kaw yə̂gədə sumdə̂gə nan̰e dara cendi ba cəmnə̂w gun mani nə̂ baa algə ka di daa bə̂də̂. Me an̰ji waygə ɗang ba: «ꞌYanadə dwe di mani nə̂ wama.»