1-2 Wala mən ɗang bi da, nare nə̂ gər̰e nan̰ ɗang dayar Jesu tuləwə̂. Cendi al i wala subu gandəw me mani day nə̂ wama ꞌyen̰ bam. Mwom da, Jesu ꞌogə woni gərsə̂ gwale duwa di səwə̂ me waygə ba da: «Dərə̂n ꞌyə̂ngənne dara nare nə̂ gər̰e nə̂ ka di. Cendi i gandən laba wala subu pad, mani day nə̂ wama ilə̂ bə̂də̂. 3 Me nə̂ kalnagə cwarna bi gə cherni yande da, cendi ha gabdara i bam bərmə̂-lə̂. Nə̂ yab dwar̰agələ̂ da, swa i hə̂n̰.» 4 Mwom da, woni gərsə̂ gwale duwa di cow lə̂ diyə̂ ba da: «Me caga da, də̂ harang ꞌywa mapa di i woy mana gə bam ka di me də̂ harang ꞌyagə gə ha wama əbdə̂ nəm di mo?» 5 Jesu di cor urgə ba da: «Caga da, anə̂ i gə mapa əndi ilə̂ mo?» Cendi wayəw ba da: «Mapa wurgəsubu ilə̂.»

6 Yande mwom da, Jesu waygə nare di: «Damna dodə̂, sən̰a dədə̂!» An̰ji lay mapa gə wurgəsubu di daa əsə̂wə̂, me aləw Mãr̰ĩ doche lə̂ diyə̂, do me ɓolbə mapa di dodə̂, me u mapa di ꞌyagə woni gərsə̂ gwale duwa di dara ba əsənə̂gə nare di. Me woni gərsə̂ gwale duwa di yə mapa Jesu əsə̂wə̂ me əsgə nare nə̂ gər̰e di. 7 Goche nə̂ dine kaw ilə̂ ɓani, me Jesu lay goche di me piy bəw dədə̂gələ̂ me waygə woni gərsə̂ gwale duwa di ba da: «Əsənə̂gə nare di goche nə̂ ta di lə̂ diyə̂ me ca!» 8 Nare nə̂ gər̰e nə̂ ta di wom mapa gə ta di gə goche di əbdə̂ me ər̰ə gəndə̂gə wor bəl dodə̂ bi. Woni gərsə̂ gwale duwa di laya mapa me goche me nə̂ wor dodə̂ ꞌwonbə kərange wurgəsubu bi. 9 Nare nə̂ woni wama mapa gə goche nə̂ ta di, i nare dubu wodə. I yande do me Jesu di kalgə nare di cə̂gədə ha nəm ulay day-ə̂ sən̰. 10 Ər̰ə, an̰ji day gə nə̂ woni gərsə̂ gwale duwa di nagagə dam bərwa-lə̂ me hargə nəm managə wama gə Dalmanuta-lə̂.

11 Me nare nə̂ gə ꞌogəgə Parise hara ꞌyo Jesu me gagə gandəw gwale gaba gərsə̂w. Cendi urəw ba da: «Alnin mani nə̂ dan̰a mən nə̂ gəl dara i Mãr̰ĩ me giyə̂m an̰ju!» 12 Mwom da, Jesu bo goche gə geche me an̰ji waygə ba da: «I dara na me nare nə̂ caga di urən mani nə̂ dan̰a mo? I sədə. Dwayna, nə̂ wayang i gwale səw ɗang bi: Cendi ha yara mani mən nə̂ dan̰a nə̂ urgə di bə̂də̂.» 13 Me ər̰ə Jesu so kal nare nə̂ Parise di bam. Me an̰ji day gə nə̂ woni gərsə̂ gwale duwa di hargə naga bərwa-lə̂ bi me hargə nəm kuray dugədəw də alə̂ ta-lə̂.

14 Me woni gərsə̂ gwale gənə̂ Jesu duwa nəmə̂ laya gə mapa nan̰ əsəragələ̂ bam, cendi ꞌwoo i mapa mən məra asalə̂ bərwa di-lə̂. 15 Jesu duwa da, waygə dara mani nə̂ cendi ba alnagə: «Dwayna, asəna angal dan ladəle dara lebər gənə̂ nare nə̂ Parise day me gənə̂ dole gə Erod duwa me ca!» 16 Yande da, cendi wajə bulə̂ day-ə̂ gaa an̰ji ba way i dara mapa day ba ilə̂ bə̂də̂ di mo? 17 Jesu ꞌocn̰ ərmə̂ day di com me waygə ba da: «I dana me anə̂ wajə bulə̂ dan-ə̂ ba anə̂ i gə mapa ilə̂ bə̂də̂ di mo? Anə̂ wor ꞌwacn̰a mani gəndə̂gə sən̰ mo? Dədə̂ng woye ɓa? I dana me anə̂ gən̰ ꞌwacn̰a gə mani gəndə̂gə bam yande mo? 18 Dərə̂ng ilə̂ me anə̂ yə̂rgə mani bə̂də̂ yande mo? Sumdə̂ng ilə̂ me anə̂ doy gə gwale bə̂də̂, dana mo? Dusərə̂ng gwong daa managə mani-yə̂ bə̂də̂ mo? 19 Ərmənə̂: Pii, managə nə̂ ɓolba mapa gə jii me nə̂ əsə̂gə nare nə̂ dubu jii di me gəndəw wara dodə̂, anə̂ laya gəndəw də wara dodə̂ ꞌwanba kərange əndi na mo?» Cendi wayəw ba: «I mwaj dii sər.» 20 «Me managə nə̂ ɓolba mapa gə wurgəsubu dodə̂ me nə̂ əsə̂gə nare nə̂ dubu wodə di me gəndəw wara dodə̂ da, anə̂ laya gəndəw də wara dodə̂ di ꞌwanba kərange əndi na mo?» Cendi way ba: «I wurgəsubu.» 21 An̰ji waygə ba da: «Mani nə̂ ta di gəndə̂gə di, anə̂ ꞌocn̰ bə̂də̂ hurə̂g sən̰ mo?»

22 Managə Jesu day gə nə̂ woni gərsə̂ gwale duwa hargə gər managə Bedsada mwom da, nare walaw abe mən gə dərə̂w buu hara nəm, me cendi amsəw dara an̰ji ba ɓəlnə̂w gə əsə̂w. 23 Mwom da, Jesu yə abe gə dərə̂w buu di əsə̂w, woləw ha nəm ciri gogər dəra-lə̂, me an̰ji ɓəsəw lade managə dərə̂wə̂ me bo əsaw dəwə̂ me urəw ba da: «Gaa mə̂ yə̂r mani mo?» 24 Me abe gə dərə̂w buu di tin̰ dərə̂w daa me way ba da: «Nə̂ yə̂r i nare; nə̂ yə̂rgə wun ya habde de, me ilə̂ harbalə̂.» 25 Jesu di cor bo əsaw abe gə dərə̂w buu di dərə̂wə̂ ɗang bi, me managə abe di tin̰ dərə̂w bam ɗang bi da, an̰ji ꞌyo labiya me yə̂r mana ladə pərang me ca! 26 Me Jesu wayəw ba da: «Cor ha ulay dəma-lə̂ ɗəm, me u bərmə̂ gə ciri də Bedsada di dədə̂ bə̂də̂!»

27 Mwom da, Jesu day gə nə̂ woni gərsə̂ gwale duwa di sogə gandəgə dara hara managə ciri də dine nə̂ i ciri də gə ꞌogədə «Sesare dənə̂ Pilib» tulbə̂dələ̂. Me managə bərmə̂-lə̂ da, an̰ji so ur woni gərsə̂ gwale duwa ba da: «Caga da, nare di way ba nə̂ i wi ɓag mo?» 28 Me woni gərsə̂ gwale duwa di wayəw ba da: «Nare nə̂ mən da, way ba mə̂ i Jã gaba alagə nare batem; nə̂ yab da, way day ba mə̂ i aba cəmə̂ Mãr̰ĩ bəw gə Eli, nə̂ yab ɗang bi da way day ba mə̂ i woni cəmə̂ Mãr̰ĩ bəw nə̂ pii di gun day gə ɗang.» 29 An̰ji urgə ɗang bi ba da: «Me ꞌyeni dan da, anə̂ way ba nə̂ i wi ɓag di mo?» Ər̰ə Piyer wayəw ba da: «Əjəm da, mə̂ i Dole gə Mãr̰ĩ biyə̂w gə Kris di.» 30 Mwom da, Jesu yə̂gədə woni gərsə̂ gwale duwa sumdə̂gə dara cendi ba cəmnə̂w gun mən gwale gə ta di daa bə̂də̂.

31 Ɗang bi da, Jesu so waygə woni gərsə̂ gwale duwa di daa pərang ba da: «Əndi gə Gun gorəndəw di, nə̂ ha gələ̂ dərin̰ nan̰e. Gechide nə̂nə̂ nare nə̂ Juwib day me gechide nə̂nə̂ woni bwasa Mãr̰ĩ day me woni gələ̂ bii gə ꞌwoo gənə̂ Moyis duwa me ha urə̂n bə̂də̂, cendi ha ꞌyan bam, me wala gə subu-lə̂*8.31wala gə subu-lə̂Nare nə̂ Juwib asə wala da, asə i dawa. Dawa də mani alalna lə̂ da, cendi asə i wala mən ɗəm. I ta di me Jesu mar gə bandradi me dəm daa munə-lə̂ gə dəmas gə jomni da, cendi asə ba i wala subu ɗəm. da, nə̂ ha dəmə̂ daa nare nə̂ mare dwar̰agələ̂.» 32 Managə an̰ji waygə daa yande pərang mwom da, Piyer woləw ha nəm bam tulin̰-yə̂ hin̰e me ha swagədaw nəm. 33 Me Jesu cwa dərə̂w yə̂r woni gərsə̂ gwale duwa di me sogədəw Piyer ba da: «Ha bam ched tulənə̂, Sidan ga, ərmə̂ dəma da, wundə̂r gə ərmə̂ gənə̂ Mãr̰ĩ duwa bə̂də̂, me wundə̂r i gə ərmə̂ gənə̂ nare day.»

34 Ər̰ə Jesu ꞌogə nare nə̂ gər̰e day gə nə̂ woni gərsə̂ gwale duwa səwə̂ me waygə ba da: «Gun gə urnə̂ baa pamna tarən da, a ərmənə̂ dəw duwa-lə̂ gang bə̂də̂, me unə̂ habda duwa gə dagəla dəwə̂ me pamnan nəm.†8.34 unə̂ habda duwa gə dagəla dəwə̂ me pamnan nəm: Gəndəw də biyə̂ way ba da: Gun gə ta di, kal a ina ib dara urə̂ gə gələ̂ gə dərin̰ me made me ca. 35 Gun gə urnə̂ bələ̂ gə səw daa sən̰a dədə̂ ka da, an̰ji gən̰ bələ̂ gaba dama gə dərə̂w bər̰in̰ di bam. Me gun gə gən̰nə̂ bələ̂ duwa gə səw sən̰a dədə̂ ka bam daran əndi me dara Nõ də lade di me da, an̰ji ha ꞌywa bələ̂ gaba dama gə dərə̂w bər̰in̰ di le. 36 Gun da, dee ꞌywana mani nə̂ sən̰a dədə̂ ka pad le, me ꞌywana bələ̂ gaba dama gə dərə̂w bər̰in̰ bə̂də̂ da, ladni duwa ilə̂ woy mo? 37 Labaa, gun ha ꞌyaw Mãr̰ĩ i na dara kələ̂ gə bələ̂ duwa gaba dama gə dərə̂w bər̰in̰ di mo? 38 Nare nə̂ caga ka i nə̂ acn̰e, me nə̂ woni cwaw Mãr̰ĩ taragə me. Gun gə woy woy gə alna jawe dara daran əndi me dara gwale ni me managə nare nə̂ ta di dərə̂gələ̂ da, əndi gə Gun gorəndəw di kaw, sanga nə̂ ha alaw jawe yande di me wala gə nə̂ cwarne gə ꞌywagəda gənə̂ Aban me gə Paja duwa nə̂ daa me ca.»