1 Ər̰ə, Jesu day gə nə̂ woni gərsə̂ gwale duwa chidə yala ib gə ciri də dine də Bedpage me Betani me də i ib gə ciri də geche də Jursalem di. Cendi hargə əjə kur̰a də Olibe-yə̂. Mwom da, Jesu giy woni gərsə̂ gwale duwa sər pii dərə̂wə̂, 2 me waygə da: «Hana managə ciri də ꞌya dərə̂ngə̂ ta di! Anə̂ dara ganda lə̂ da, anə̂ ha ꞌywa kura gə dwe gə maw gə sade ɗəbə lə̂, dii mən kaw gun wor ajilaw sən̰. Awrənaw daa, hane nəm ꞌyanan. 3 Me gun urnə̂ng, anə̂ ba anə̂ al yande dana mo da, waynaw da: ‹I Aba ciri nin me ur an̰ju. An̰ji ha cwang gandəwe kalang me ca.›»

4 Woni gərsə̂ gwale duwa nə̂ sər di hargə me gəra ha ꞌywa kura gə dwe di gə maw ɗəbə lə̂ iche ciri bədə̂ bərmə̂-lə̂, me cendi awrəw daa. 5 Narje yab nə̂ ilə̂ ta di urgə da: «Anə̂ al i na yande mo? Dara na me anə̂ awr kura di mo?» 6 Ər̰ə cendi cogə gwale gə Jesu wayagə gandəw di mwom da, gə kalgə ha.

7 Woni gərsə̂ gwale gənə̂ Jesu di hara gə kura gə dwe di ꞌyaw. Cendi darbəw barge day tarəwə̂ me Jesu ajil dam lə̂ diyə̂. 8 Nare nan̰ da darbə barge day dodə̂ bərmə̂ dalawə̂, me nə̂ mən da, basə day baje baje nə̂ bəra nə̂ cendi sabagə bam ta di me. 9 Nare woni hara pii Jesu dərə̂wə̂ me woni pama tarəw me da sojə day r̰ur̰u ba da:

11 Ər̰ə Jesu yala managə Jursalem me gandə ha kulə gaba bwasa Mãr̰ĩ-yə̂. An̰ji yə̂rbə tulbə̂w tulbə̂w bam pad mwom da, an̰ji ha dara hara Betani gə woni gərsə̂ gwale duwa nə̂ mwaj dii sər di dara dawa ꞌyə̂n̰e ɗəm.

12 Sanga dəra da, cendi so kal Betani bam da, Jesu cherni aləw, 13 me an̰ji yə̂r dwaga alə̂ hə̂n̰ bajadə kubə ladə me da, ya yara gaa yaa dəra ba ilə̂ mo. Managə ba gəra dwaga di gəndədələ̂ ib da, yə̂r i bajadə məra dara i wala gənə̂ dwaga dəra gaba yaa bə̂də̂ sən̰. 14 Mwom da, Jesu sərgə dwaga di ba da: «Caga ka da, də ha neyama yaa bə̂də̂ bər̰in̰ ɗəm. Guni mən kaw ha ꞌywa yaa diya wama bə̂də̂ ɗəm!» Me woni gərsə̂ gwale duwa di doy gwale gə ta di.

15 Ər̰ə, Jesu day gə nə̂ woni gərsə̂ gwale duwa cwara yala Jursalem bi ɗəm. Jesu gandə ha kərə̂ ciri dwar̰ə də kulə gaba bwasa Mãr̰ĩ ilə̂ di. Mana gə ta-lə̂ di, an̰ji yə̂r nare woni kələ̂ mani bam me woni kələ̂ me ilə̂, me an̰ji so ilə̂ ꞌywaragələ̂. An̰ji togədəgə woni kəlanga gursə tabəl day bam me lesərəgə woni kələ̂ kogə̂l bam gagege day bam me ca. 16 Me an̰ji kal gun mən kaw u mani di cilangə nəm bə̂də̂. 17 Ər̰ə an̰ji ilə̂ gələ̂gə nare mani-yə̂ me waygə ba da: «Ɓag da, Mãr̰ĩ way gwale gə ta di managə Magtubu duwa lə̂ ga bə̂də̂ mo? An̰ji way da: ‹Gə ha ꞌwaga kulə ni di ba i kulə gaba amsa Mãr̰ĩ gənə̂ nare nə̂ gəndə̂gə jiga jiga pad day.›†11.17 Esayi (Esaïe) 56.7 Me ꞌyeni dan da, anə̂ cow dan mana gaba budə̂ gənə̂ miidi day‡11.17 mana gaba budə̂ gənə̂ miidi day: Jormi (Jérémie) 7.11..»

18 Gechide nə̂nə̂ woni bwasa Mãr̰ĩ day me woni gələ̂ bii gə ꞌwoo gənə̂ Moyis duwa me doy gwale gə ta di me kan̰jə bərmə̂ ba gə ha ala i man dara ꞌyaa gə Jesu mo? Cendi lan̰əwe dara gələ̂ duwa gə mani di əndə̂r nare di dusərə̂gələ̂ nan̰e.

19 Gə turgə dawa ɗwanda dəra-lə̂ da, Jesu day gə nə̂ woni gərsə̂ gwale duwa dəmgə bam ciri də Jursalem-mə̂ di.

20 Sanga gə jomni dəra da, cendi ha pədə̂ bərmə̂-lə̂ me yə̂r dwaga də ta di dama lə̂, me tandi woy bam bər̰in̰ ya sabradə-lə̂ ced. 21 Piyer dusəw guw dara mani nə̂ pii alal di, me wayəw Jesu da: «Aba gələ̂nin mani, yə̂r dwaga də tanga mə̂ sərgədə di cor woy bam bər̰in̰.» 22 Mwom da, Jesu way gə woni gərsə̂ gwale duwa ba da: «Kalna dusərə̂ng Mãr̰ĩ dəwə̂! 23 I sədə. Dwayna, nə̂ wayang i gwale səw ɗang bi: Managə gun waynadə kur̰a də ta di ba biyarna mana gə ka-lə̂ cəmnə̂ daa hana əndarna kuray gə geche dalawə̂, me an̰ji gagəna gwale dusəwə̂ bə̂də̂, me kalna dusəw Mãr̰ĩ dəwə̂ gwale gə ta di, ba ha alale da, Mãr̰ĩ ha alawe. 24 I dara ta di me nə̂ wayang nəm: Mani nə̂ woy woy nə̂ anə̂ amsəna Mãr̰ĩ dara ba alnange da, kalna dusərə̂ng dəwə̂ dara ba ꞌyang mani nə̂ ta di le ɗəm, me Mãr̰ĩ ha ꞌyang gandagə le. 25 Me managə anə̂ ɗəbənə̂ daa dara amsa Mãr̰ĩ me anə̂ ina gə gwale lə̂ gə gun da, kalna dusərə̂ng həlalna dəwə̂. Do me Abrang gə Mãr̰ĩ gaba dama daa di kaw ha kala dusəw həlala acn̰a dan dəwə̂ me ca. [ 26 Me anə̂ kalna dusərə̂ng həlalna kwandang acn̰a day dəwə̂ bə̂də̂ da, Abrang gə Mãr̰ĩ gaba dama daa di kaw ha kala dusəw həlala acn̰a dan dəwə̂ bə̂də̂ me ca.]»

27 Jesu day gə nə̂ woni gərsə̂ gwale duwa cwaragə hara Jursalem bi. Managə Jesu kədəbə̂r kərə̂ managə ciri dwar̰ə̂ də kulə gaba bwasa Mãr̰ĩ di ilə̂ di da, gechide nə̂nə̂ woni bwasa Mãr̰ĩ day me, woni gələ̂ bii gə ꞌwoo gənə̂ Moyis duwa me, gechide nə̂nə̂ nare nə̂ Juwib day nə̂ ɗang me, chidəbə̂ hara Jesu səwə̂ ib ib. 28 Ər̰ə cendi urbəw ba da: «I gə dwana gə woy me mə̂ al gə mani nə̂ ta di mo? I wi me ꞌyam bərmə̂ ba mə̂ alna mani nə̂ ta di mo?» 29 Jesu cogə lə̂ diyə̂ ba da: «Nə̂ ha urə̂ng gwale gə urə̂ mən tenene ka. Cwanan lə̂ diyə̂ do me əndi di kaw, nə̂ ha wayang dwana ni də nə̂ al gə mani nə̂ ta di sən̰. 30 I wi me giyə̂ Jã algə nare batem di mo? I Mãr̰ĩ, labaa i nare nə̂ gəsgə̂də mo? Cwanan lə̂ diyə̂.» 31 Mwom da, cendi ilə̂ wajəba gwale bulə̂ day-ə̂ ba da: «Də̂ cwanaw ənda lə̂ diyə̂ ba i Mãr̰ĩ da, an̰ji ha wayandə ba də̂ yə̂ng gwale gə Jã wayəw di bə̂də̂, dana mo? 32 Me də̂ cwanaw ənda ba i nare nə̂ gəsgə̂də mwom da, i na gaa ha alandə mo?» Cendi lan̰gə i nare nə̂ gər̰e di dara nare nə̂ pad di ərəm dara Jã Batis di ba i aba cəmə̂ Mãr̰ĩ bəw ꞌyang. 33 Mwom da, cendi cor wayəw Jesu di da: «Nə̂ ꞌocn̰nin bə̂də̂.» Me an̰ji waygə da: «Yande da, əndi di kaw, nə̂ ha wayang dwana ni də nə̂ al gə mani nə̂ ta di bə̂də̂ me ca.»