Ang Aklat ni
EZRA
Panimula
Ang Aklat ni Ezra ay karugtong ng mga Aklat ng Mga Cronica. Kasaysayan ito ng pagbabalik sa Jerusalem ng isang grupo ng mga Judio na dinalang-bihag sa Babilonia, at ng panunumbalik ng pamumuhay at pagsamba sa Jerusalem. Inilalahad ang mga pangyayaring ito sa mga sumusunod na yugto: (1) Sa utos ni Ciro na Emperador ng Persia, bumalik mula sa Babilonia ang unang pangkat ng mga ipinatapong Judio. (2) Muling itinayo at inihandog kay Yahweh ang Templo, at ang pagsamba sa Diyos ay muling isinagawa sa Jerusalem. (3) Pagkalipas ng ilang taon, may isa na namang pangkat ng mga Judio na bumalik sa Jerusalem sa pangunguna ni Ezra, isang dalubhasa sa Kautusan ng Diyos, na tumulong sa mga tao upang muling maisaayos ang kanilang buhay panrelihiyon at panlipunan sa layuning mapangalagaan ang espirituwal na pamana ng Israel.
Nilalaman
Ang unang pagbabalik buhat sa pagkabihag 1:1–2:70
Muling itinayo ang Templo 3:1–6:22
Bumalik si Ezra kasama ng mga iba pang itinapon 7:1–10:44
1
Pinabalik ni Ciro ang mga Judio
1 Noong unang taon ng paghahari ni Ciro sa Persia, natupad ang sinabi ni Yahweh sa pamamagitan ni Propeta Jeremias nang udyukan ni Yahweh si Ciro na isulat at ipahayag sa buong kaharian ang utos na ito:
2 “Ito ang utos ni Emperador Ciro, ng Persia: Ibinigay sa akin ni Yahweh, ang Diyos ng kalangitan, ang lahat ng kaharian sa buong daigdig at inatasan niya ako na ipagtayo ko siya ng templo sa Jerusalem na nasa Juda.
3 Kayo na kanyang bayan, patnubayan nawa kayo ng inyong Diyos sa pagbabalik ninyo sa Jerusalem upang muling maitayo roon ang Templo ni Yahweh, ang Diyos ng Israel, ang Diyos na sinasamba sa Jerusalem.
4 Sinuman sa inyo na nangingibang-bayan, kung nais bumalik doon, dapat siyang tulungan ng kanyang mga kababayan. Dapat siyang bigyan ng pilak at ginto, mga bagay na kakailanganin, at mga hayop, gayundin ng mga kusang-kaloob na handog para sa Templo ni Yahweh sa Jerusalem.”
5 Bilang tugon, agad na nagsipaghanda ang mga pinuno ng mga lipi ng Juda at Benjamin, gayundin ang mga pari at ang mga Levita, at ang mga iba pang inudyukan ng espiritu ng Diyos upang muling itayo ang Templo ni Yahweh sa Jerusalem.
6 Tinulungan sila ng lahat ng mga nakapalibot sa kanila. Binigyan sila ng mga pilak at gintong lalagyan, mga bagay na kakailanganin, mga hayop, iba pang mamahaling gamit, bukod pa sa mga kusang-kaloob na handog para sa Templo.
7 Ibinalik naman sa kanila ni Haring Ciro ang mga mangkok at tasa na dinala ni Haring Nebucadnezar sa templo ng kanyang mga diyos pagkatapos na kunin ang mga iyon mula sa Templo ni Yahweh.
8 Ipinagkatiwala ni Haring Ciro kay Mitredat na ingat-yaman ng kaharian ang pagbilang sa mga bagay na ibinalik. Ang mga ito'y binilang ni Metridat sa harap ni Sesbazar na tagapamahala ng Juda.
9-10 Ito ang bilang ng mga kagamitan:
| palangganang ginto | 30 |
| palangganang pilak | 1,000 |
| lalagyan ng insenso | 29 |
| mangkok na ginto | 30 |
| iba't ibang sisidlang pilak | 410 |
| iba't iba pang kagamitan | 1,000 |
11 Lahat-lahat, umabot sa 5,400 ang bilang ng mga lalagyang ginto at pilak na dinala ni Sesbazar nang bumalik siya sa Jerusalem mula sa Babilonia kasama ng iba pang mga dinalang-bihag doon.