LEVITICO
Panimula
Ang aklat na ito ay naglalaman ng mga tuntunin sa pagsamba at mga seremonyang panrelihiyon sa Israel noon, at tuntunin ng mga pari sa pagsasagawa nito.
Ang pangunahing paksa ng aklat ay ang kabanalan ng Diyos at kung paano nararapat manambahan at mamuhay ang kanyang bayan para mapanatili ang kanilang kaugnayan sa “banal na Diyos ng Israel.”
Matatagpuan sa 19:18 ang pinakakilalang pangungusap sa aklat na ito, na tinawag ni Jesus na pangalawang mahalagang utos: “Ibigin mo ang iyong kapwa gaya ng pag-ibig mo sa iyong sarili.”
Nilalaman
Mga tuntunin tungkol sa pagkakaloob at paghahandog 1:1–7:38
Ang pagtatalaga kay Aaron at sa kanyang mga anak bilang mga pari 8:1–10:20
Mga tuntunin sa paglilinis 11:1–15:33
Ang Araw ng Pagsisisi 16:1-34
Mga tuntunin sa kabanalan ng pamumuhay at sa pananambahan 17:1–27:34
1
Kautusan tungkol sa mga Handog na Sinusunog
1 Tinawag ni Yahweh si Moises, at mula sa Toldang Tipanan ay sinabi sa kanya,
2 “Sabihin mo ito sa mga Israelita: ‘Kung may maghahandog kay Yahweh, ang dapat niyang ihandog ay baka, tupa o kambing.’
3 “Kung baka ang kanyang handog na susunugin, kailangang ito'y lalaki at walang kapintasan. Dadalhin niya ito sa may pintuan ng Toldang Tipanan upang maging kalugud-lugod sa akin.
4 Ipapatong niya sa ulo ng hayop ang kanyang kamay at iyo'y tatanggapin bilang pantubos sa kanyang kasalanan.
5 Pagkatapos, papatayin niya ito sa harapan ko at ang dugo'y ibubuhos ng mga paring mula sa angkan ni Aaron sa palibot ng altar, sa may pintuan ng Toldang Tipanan.
6 Babalatan niya ang hayop saka kakatayin.
7 Ang mga pari nama'y maglalagay ng baga sa altar at iaayos sa ibabaw nito ang kahoy na panggatong.
8 Ihahanay nila nang maayos sa ibabaw ng apoy ang mga pira-pirasong karne, kasama ang ulo at taba.
9 Ngunit dapat muna nilang hugasan ang laman-loob at ang mga paa bago ilagay sa altar. Pagkatapos, ang lahat ng ito'y sama-samang susunugin bilang handog, upang ang usok nito'y maging mabangong samyo sa akin.
10 “Kung tupa o kambing ang ihahandog, kailangang ito'y lalaki rin at walang kapintasan.
11 Papatayin ito ng naghahandog sa harapan ni Yahweh sa gawing hilaga ng altar at ang dugo'y ibubuhos ng mga pari sa paligid ng altar.
12 Kakatayin niya ito at ihahanay ng pari sa ibabaw ng apoy sa altar ang mga piraso ng karne kasama ang ulo at taba.
13 Ang laman-loob at mga paa ay dapat munang hugasan bago ilagay sa altar. Pagkatapos, ang lahat ay susunugin upang ang usok nito'y maging mabangong samyo sa akin.
14 “Kung ibon ang handog na susunugin, ang dadalhin niya'y batu-bato o kalapati.
15 Ibibigay niya ito sa pari upang dalhin sa altar. Pipilipitin ng pari ang leeg ng ibon at ang dugo'y patutuluin sa paligid ng altar.
16 Aalisin niya ang balahibo't bituka ng ibon at ihahagis sa tapunan ng abo, sa gawing silangan ng altar.
17 Bibiyakin niya ang katawan nito ngunit hindi paghihiwalayin. Pagkatapos, susunugin niya ito sa altar bilang handog upang ang usok nito'y maging mabangong samyo sa akin.”