13
Usif Yesus natoon nain anmatoom nok Uisneno In Uim Onen Uuf ee in atseran
(Naiꞌ Mateos 24:1-2, Naiꞌ Lukas 21:5-6)
1 Rarit Naiꞌ Yesus nok In atoup noinꞌ ein anpoin naꞌkon Uim Onen Uuf. Oras sin npoin, In atoup noniꞌ tuaf es naruur Ee Uim Onen Uuf naan, ma naꞌuab am nak, “Bait Ho mkius miit ia feꞌ! Umi ia reokn ii kaah! Sin nbakin in faut kouꞌn ii reko ꞌmaten!”
2 Mes Naiꞌ Yesus nataah ee mnak “Uim Onen ia, ro namaas! Mes ka ꞌroo fa te, sin of anpukai natserab areꞌ fatun reꞌ ia.”
Neon amsoupt ein sin taanr ein
(Naiꞌ Mateos 24:3-14, Naiꞌ Lukas 21:7-19)
3 Rarit Naiꞌ Yesus sin nnaon neun aꞌtoꞌef Saitun, ma ntokon nbain ein anꞌanin Uisneno In Uim Onen Uuf. Rarit In atoup noinꞌ ein tuaf haa, neman ma naꞌuab nok Ne. Sin esan reꞌ naiꞌ Petrus, naiꞌ Yakobus, naiꞌ Yohanis, ma naiꞌ Anderias.
4 Sin nataan Ee mnak, “Aam! Bait Ho mutoon mufaniꞌ miit kai Ho uabam feꞌe na. Rekaꞌ te in oors ii ntea? Ma in taanr ein, onan reꞌ mee?”
5 Rarit Naiꞌ Yesus nataah am nak, “Asar hi mpanat mirek-rekoꞌ, he kais napoi naan ki.
6 Natuin of anmuiꞌ tuaf amfaun reꞌ neman ma npaas sin aꞌbaask ein am nak, ‘Au reꞌ ia, Kristus, Atoniꞌ reꞌ Uisneno nbaꞌan nain Je naꞌko unuꞌ.’ Onaim sin napoi naan tuaf amfaun.
7 Karu hi miit atoniꞌ anmakenan, aiꞌ hi mneen uab anin nak anmuiꞌ makenat et mee-mee, hi kais mimtau. Natuin areꞌ rasin naan ro he nboran, mes neon amsoupt ein ka ntea fa feꞌ.
8 Fin uuf es of anfeen ma nmaraban uuf es. Ma pah es of anmakeen nok pah es. Tainuuns ii anhasuꞌ anbi mee-mee. Amnaahs ii of maꞌtaniꞌ msaꞌ. Areꞌ rasin reꞌ ia anjarin tanar namnees on reꞌ bifee maꞌapuꞌ reꞌ nnaben meen mahoniꞌ.
9 Onaim hi arki ro he mpanat mirek-rekoꞌ. Sin of neman ma nheek ki, rarit anheer neik ki neu umi feek rais pirsait. Ma sin of anbeos ki nbi uim oen ein sin naank ein. Ma sin of anfuut neik ki neu areꞌ anaaꞌ apreent ein, natuin hi mituinaꞌ Kau. Mes rasin naan amsaꞌ, anjarin asraak he hi mitonan sin areꞌ rasi anmatoom nok Kau.
10 Fin Uisneno In aanh ein ro he nnaon ma natoon nahunun Au Rais Reko neun areꞌ uuf-uuf anbin pah-pinan ia, rarit naꞌ neon amsoupt ein antean.
11 Mimnau! Karu sin nfuut neik ki neu umi feek rasi, hi kais mimtau ma mitenab am mak, ‘Au he uꞌuab ꞌak saaꞌ? Aiꞌ au he utaah ꞌak saaꞌ?’ Karu in oors ii antea, hi miꞌuab mituinaꞌ saaꞌ reꞌ Uisneno In Asmaan Akninuꞌ natoon ee neu ki.
12 Anbi uim jes in nanan, karu tuaf es anpirsai neu Kau, of in orif-tataf sin es reꞌ namin ranan he nroor niis ne. Karu aanh ee es reꞌ anpirsai, of in aamf ee kuun es reꞌ neikn on anroor niis ne. Ma karu in ainaf-amaf anpirsai Kau, of sin aanh ein es reꞌ anroor niis sin.
13 Onaim of biak ein nsaken niis ki, natuin hi mpirsai meu Kau. Mes sekau es reꞌ naran tar antea namsoup, Uisneno ro nafeitn ee ma nfee ne ꞌhonis.”
Ampanat mirek-rekoꞌ natuin neon amsoupt ein anpaumaakn een
(Naiꞌ Mateos 24:15-28, Naiꞌ Lukas 21:20-24)
14 Naiꞌ Yesus naꞌuab ankono mnak, “Tuaf es reꞌ neik amreꞌut of he neem. In ntaam ma nhake nbi baer nuni nbi Uisneno In Uim Onen Uuf, reꞌ ka pantas fa neu ne, tar in nhaiꞌniis bare naan. Es naan ate, Uisneno annao nasaitan bare naan. Karu hi miit rasi naan, hi mpanat mirek-rekoꞌ! (Sekau es reꞌ anrees reꞌ ia te, ro he npaant on!) Naan anjair tanar nak neon suust ein anpaumakan reꞌ-reuꞌf een. Karu hi miit on naan ate, abitan propinsi Yudea amfeen maen nai meu ꞌtoeꞌf ein.
15 Ma hi ro he maen rab-raab, he kais amsiraak om. Karu tuaf mee npoi nrair naꞌko in umi, kais antebi nfain he nait bareꞌ bian antein.
16 Ma tuaf reꞌ anbi rene, kais antebi nfain he nait tai nusat antein. Ro in naen ankoon!
17 Reꞌ ansuus anneis-neis ji, es reꞌ bifee maꞌapuꞌ, ma bifee reꞌ nasuus riꞌanaꞌ. Fin sin ka bisa naen nanan fa.
18 Onaim reko nneis hi mꞌonen ma amtoit he rais amreꞌut naan kais neem nateef nok oras uran-anin.
19 Fin oras naan, maꞌnuuk ii kouꞌ reꞌuf! Anmurai naꞌko Uisneno nmoeꞌ pah-pinan ia tar antea neno ia, ka tiit fa suust es kouꞌn ii on reꞌ naan. Ma atoniꞌ of ka niit anteniꞌ fa susat nahuum on reꞌ naan.
20 Karu Uisneno ka naꞌparan fa neon suust ein naan, ka tiit fa tuaf he nmoni nkoon. Mes natuin Uisneno nneek niis In aan piir ein, es naan ate In naꞌparan neon suust ein naan.
21 Karu nenon naan antean ate, hi of amneen biak ein naꞌuab ein am nak, ‘Amkius nai! Kristus es ia!’ Mes tuaf bian nak, ‘Kristus et nee!’ Mes natiꞌ hi kais amneen, oo!
22 Ma of anmuiꞌ atoniꞌ reꞌ anpoi ma npaas in aꞌbasan am nak, ‘Au reꞌ ia, Kristus!’ Bian anteniꞌ nak, ‘Au reꞌ ia, Uisneno In mafefa kninuꞌ.’ Sin of anmoꞌen rais sanmakat humaꞌ-humaꞌ neik kuasat naꞌkon niut reꞌuf he nputa-kriu. Sin namin ranan humaꞌ-humaꞌ he karu reko te, sin nasekeb Uisneno Iin na.
23 Hi ro he mpanat mirek-rekoꞌ! Neon suust ein naan ka ntean fa feꞌ, mes Au umnaub ꞌain ki sin!”
Mansian Batuur-Batuur In amneman
(Naiꞌ Mateos 24:29-31, Naiꞌ Lukas 21:25-28)
24 Rarit Naiꞌ Yesus antaru ntein In uaban neu In atoup noinꞌ ein am nak, “Karu neon suust ein ankonon ate,
‘Maans ii of nameisꞌook,
ma fuun ii of nasab-saab amsaꞌ.
25 Akfuun ein of anbamoufun naꞌkon neon goe tnanan,
ma areꞌ kuasat abitan neon goe tnanan anrikraakn ok.’
26 Rarit naꞌ areꞌ mansian of niit Kau, Mansian Batuur-Batuur reꞌ ia. Of Au ꞌuum uꞌko neon goe tunan. Ma areꞌ too mfaun ein of niit Au kuasak, ma Au pinak ma krahak ok-okeꞌ.
27 Rarit Au of aꞌreun Uisneno In ameupt ein naꞌkon sonaf neno tunan, he nnaon nabuabaꞌ areꞌ tuaf ein reꞌ Au ꞌpiri ꞌrair sin, naꞌkon pah-piin ii tuuk am tuuk, naꞌkon pasaꞌ neon-saet tar antea pasaꞌ neon-teas, naꞌkon pasaꞌ ponain tar antea pasaꞌ haaꞌ-nua.”
Neon suust ein anjarin tanar neu Usif Yesus In amneman
(Naiꞌ Mateos 24:32-35, Naiꞌ Lukas 21:29-33)
28 Naiꞌ Yesus antaru ntein In uaban am nak, “Au ꞌait retaꞌ uꞌko hau. Karu hau naan in nook ein nmurai namnatun, naan anjair tanar nak oras fauk-nais ii anpaumaak een.
29 On naan amsaꞌ, karu hi miit neon suust ein naan neman, on reꞌ saaꞌ reꞌ Au utoon aꞌrair ki naan, naan anjarin tanar nak anpaumaak he Au ꞌuum een.
30 Oras ia, amneen mirek-rekoꞌ! Naꞌko hi ar-arki reꞌ ia, of anmuiꞌ tuaf reꞌ anmoin feꞌ, oras neon suust ein naan antean.
31 Maski neno tunan ma pah-pinan namneuk, mes Au uabk ii of antahan nabar-baar.”
Usif Yesus In amneman naan maꞌnifaꞌ
(Naiꞌ Mateos 24:36-44)
32 Naiꞌ Yesus antaru ntein am nak, “Ka tiit fa tuaf es, reꞌ nahiin neno mee, aiꞌ anreuk fauk ate, of Au ꞌfain ꞌuum. Uisneno In ameupt ein sonaf neno tunan amsaꞌ ka nahinin fa. Au Tuak ii msaꞌ, ka uhiin fa. Suma Au Amaꞌ anmees nahiin.
33 Natuin rasi naan ate, hi ro he mpanat mirek-rekoꞌ, natuin hi ka mihiin maan fa rekaꞌ te in oors ii ntea.
34 Ka ꞌroo fa te, Au ꞌnao usaitan ki. Mes of Au ꞌfain ꞌuum. Namnees on reꞌ tuaf reꞌ annao nporin in umi neu bare ꞌroo-ꞌroo. In nreun in ameupt ein he npao in umi naan rek-reko. Ma in nbati nfeen sin es am es ate nok in mepu. In naprenat apao enoꞌ he npanat narek-rekoꞌ tar antea in nfain neem.
35 Hi ro he mpao fai-manas amsaꞌ, natuin hi ka mihiin fa oras mee te, uim tuaf naan of anfain neem. He maans ii nmabe, oo, fai tnanaꞌ, oo, maans ii naꞌpupuꞌ, oo, aiꞌ maans ii feꞌe nsae. Hi ka mihiin maan fa neu he rekaꞌ.
36 Kais-kaisaꞌ in neem nok askeken ate, in napein ki amtuup amfiin ma mikoon feꞌ.
37 Onaim saaꞌ reꞌ Au utoon ꞌeu ki ia, Au utoon ꞌeu bian sin amsaꞌ am ꞌak, ‘Hi ro he mpanat mirek-rekoꞌ he mseun Kau.’ ”
[Nok rasi naan ate, Usif Yesus naꞌtuꞌub In uaban nok In atoup noinꞌ ein nbin aꞌtoꞌef Saitun.]