13
Ri Jesús kuchꞌaj ri kaqan rutijoꞌn
1 Xa naqaj chi kꞌo wi lo ruqꞌijol ri nimaqꞌij Pascua yey ri Jesús retaꞌam ya kopon ruqꞌijol echiriꞌ kuya kan ruwachulew y keꞌek rukꞌ Ruqaw chilaꞌ chikaj. Ekꞌu Rire lik kꞌax ebꞌunaꞌom rutijoꞌn e kꞌo rukꞌ wara che ruwachulew; yey janipa qꞌij xkꞌojiꞌ kukꞌ, e laꞌ lik kꞌax xebꞌunaꞌo.
2 Xopon kꞌu rubꞌenebꞌal qꞌij echiriꞌ ri Jesús kukꞌ rutijoꞌn e riꞌ kewaꞌik. Jun kꞌu chike e ri Judas aj Iscariot rukꞌajol ri Simón. Yey kojom chi pa ranimaꞌ ruma ritzel winaq kukꞌayij ri Jesús.
3 Ekꞌu ri Jesús retaꞌam yaꞌtal ronoje puqꞌabꞌ ruma Ruqaw, yey Rire petinaq rukꞌ ri Dios y rukꞌ ri Dios katzelej wi.
4 Na rukꞌ ta kꞌu riꞌ, ri Jesús xyaktajik, xresaj ruqꞌuꞌ uripom chirij, xukꞌam jun twayo puqꞌabꞌ y xuxim chupa.
5 Tekꞌuchiriꞌ xuqꞌej yaꞌ pa jun kꞌolibꞌal, xujeq uchꞌajik ri kaqan rutijoꞌn y kuchaqisaj rukꞌ ri twayo uximom chupa.
6 Echiriꞌ kujeq uchꞌajik ri raqan ri Pedro, rire jewaꞌ xubꞌiꞌij che ri Jesús:
—Wajawal, ¿kachꞌaj kami la riꞌ ri waqan? —xchaꞌ.
7 Ri Jesús xukꞌul uwach:
—Woꞌora na kamaj ta usukꞌ saꞌ wa kintajin che uꞌanik; kꞌate na kꞌu riꞌ kamaj usukꞌ —xchaꞌ.
8 Ekꞌu ri Pedro xubꞌiꞌij che:
—Riꞌin na kanya ta kꞌana luwar cheꞌla kachꞌaj la ri waqan —xchaꞌ.
Ri Jesús xubꞌiꞌij che:
—We na kanchꞌaj ta laꞌ waqan, riꞌ na jinta chi awe wukꞌ riꞌin —xchaꞌ.
9 Xubꞌiꞌij kꞌu ri Pedro che:
—We e riꞌ, Wajawal, na xew tane ri waqan kachꞌaj la; chꞌaja ne la riꞌ ri nuqꞌabꞌ y ri nujolom —xchaꞌ.
10 Ri Jesús jewaꞌ xubꞌiꞌij che:
—E junoq kꞌakꞌ atininaq, xew kajawaxik kachꞌajiꞌ ri raqan, ma ronoje rucuerpo chꞌajtal chik. Jekꞌulaꞌ riꞌix chwach ri Dios ix chi chꞌajtalik, tobꞌ na iwonoje taj —xchaꞌ.
11 Ri Jesús retaꞌam chik china ri kakꞌayin re; e uwariꞌche xubꞌiꞌij: “Na iwonoje taj ix chꞌajtalik.”
12 Echiriꞌ xukꞌis uchꞌajik ri kaqan rutijoꞌn, xurip tanchi ruqꞌuꞌ chirij, xtzꞌuyiꞌ tanchi chwa ri mexa y xutzꞌonoj chike:
—¿Kimaj usukꞌ saꞌ keꞌelawi wa xinꞌan chiwe?
13 Riꞌix kibꞌiꞌij chwe: “Tijonel” y “Qajawal” y qatzij ri kibꞌiꞌij, ma lik e uꞌanom riꞌ.
14 We in kꞌu Itijonel riꞌ yey in Iwajawal y xinchꞌaj kꞌu liꞌwaqan, jekꞌulaꞌ riꞌ chiꞌana riꞌix; chichꞌaja kꞌu liꞌwaqan chiwach riꞌix chiwibꞌil iwibꞌ.
15 Riꞌin xinꞌan waꞌ re kꞌutubꞌal chiwach, chaꞌ riꞌix jelaꞌ kiꞌano pachaꞌ ri xinꞌan riꞌin.
16 Paqatzij wi kambꞌiꞌij chiwe: Na jinta juna aj chak más kꞌo uwach chwa ri rajaw, yey na jinta ne juna taqoꞌn más kꞌo uwach chwa ri taqayom lo re.
17 We kimaj usukꞌ taq waꞌ y kitijoj iwibꞌ che uꞌanik, nim iqꞌij iwalaxik riꞌ.
18 »Pero na kinchꞌaꞌt ta piwiꞌ iwonoje, ma riꞌin wetaꞌam china ri ebꞌenuchaꞌom. Yey e kuꞌana na ri tzꞌibꞌital kan pa Ruchꞌaꞌtem ri Dios, pa kubꞌiꞌij wi:
E ri jun kawaꞌ junam wukꞌ,
e riꞌ ri yaktajinaq chwij. Sal. 41:9
19 Kintajin kꞌu pan che ubꞌiꞌxikil chiwe woꞌora chaꞌ echiriꞌ kuꞌana waꞌ, riꞌix kikojo: “In Riꞌin.”
20 Paqatzij wi kambꞌiꞌij chiwe: China ri kakꞌuluw re ri kantaq bꞌi riꞌin, e junam rukꞌ in ri kinukꞌulu; yey china kꞌu ri kakꞌuluw we riꞌin, e kukꞌul ri Jun taqayom lo we —xchaꞌ.
Ri Jesús kuqꞌalajisaj china ri kakꞌayin re
(Mt. 26:20-25; Mr. 14:17-21; Lc. 22:21-23)
21 Echiriꞌ xukꞌis ubꞌiꞌxikil waꞌ, ri Jesús xok bꞌis chukꞌuꞌx y jewaꞌ xubꞌiꞌij:
—Paqatzij wi kambꞌiꞌij chiwe: Jun chiwe riꞌix kinukꞌayij —xchaꞌ.
22 Ekꞌuchiriꞌ, rutijoꞌn xkijeq kakitzulaꞌ kiwach chikibꞌil kibꞌ ma na ketaꞌam taj china ri xubꞌiꞌij.
23 Kꞌo kꞌu jun chike rutijoꞌn, waꞌ e ri lik kꞌax kanaꞌ ruma ri Jesús, kawaꞌik jaꞌl putzal Rire chwa ri mexa.
24 Ekꞌu ri Simón Pedro xuꞌan pan uqꞌabꞌ che chaꞌ kutzꞌonoj che ri Jesús china ri kubꞌiꞌij.
25 Y ri jun tijoꞌn jaꞌl putzal ri Jesús xutzꞌonoj kꞌu che:
—Wajawal, ¿china laꞌ la kabꞌiꞌij la? —xchaꞌ.
26 Ri Jesús xukꞌul uwach:
—Kanmuꞌ juchꞌaqap pam y china kꞌu che kanya wi, e rire —xchaꞌ.
Xumuꞌ kꞌu juchꞌaqap pam y xuya che ri Judas aj Iscariot, rukꞌajol ri Simón.
27 Echiriꞌ ri Judas xukꞌam ri pam, xok ri Satanás pa ranimaꞌ. Ekꞌu ri Jesús xubꞌiꞌij che:
—Ri kawaj kaꞌano, chaꞌana laꞌ riꞌ —xchaꞌ.
28 Yey na jinta junoq chike ri kewaꞌ chwa ri mexa xumaj usukꞌ suꞌbꞌe xubꞌiꞌij laꞌ che.
29 Ruma kꞌu puqꞌabꞌ ri Judas kꞌo wi ri bꞌolxa pa kꞌolotal wi ri kipuaq, jujun chike xkichꞌobꞌo laj ri Jesús xubꞌiꞌij che kuꞌloqꞌo tan ri kajawax chike re ri nimaqꞌij, o laj kꞌo kujach chike ri nibꞌaꞌibꞌ.
30 Ekꞌuchiriꞌ ri Judas ukꞌamom chi ri pam, na jampatana xel bꞌi yey lik chaqꞌabꞌ chik.
Ri taqanik puwi ri rutzil kꞌuꞌxaj
31 Echiriꞌ elinaq chubꞌi ri Judas, ri Jesús xubꞌiꞌij:
—Ekꞌu woꞌora kaqꞌalajin runimal uchomalil Ralaxel Chikixoꞌl Tikawex y rukꞌ Rire kaqꞌalajin wi runimal uchomalil ri Dios.
32 Yey we Ralaxel Chikixoꞌl Tikawex kuqꞌalajisaj runimal uchomalil ri Dios, jekꞌuriꞌlaꞌ e ri Dios ri kaqꞌalajisan runimal uchomalil Ralaxel Chikixoꞌl Tikawex, yey waꞌ na kamayin ta che uꞌanik.
33 »Ix walkꞌoꞌal, xa joqꞌotaj chi in kꞌo iwukꞌ. Riꞌix kinitzukuj na kꞌu riꞌ; pero e pachaꞌ ri ximbꞌiꞌij chike raj judiꞌabꞌ, na jinta piqꞌabꞌ kixꞌek chilaꞌ pa kinꞌek wi riꞌin.
34 »Kanya wa jun kꞌakꞌ taqanik chiwe: E lik kꞌax chinaꞌa iwibꞌ chiwach. Jelaꞌ pachaꞌ riꞌin lik kꞌax kixinnaꞌo, jekꞌulaꞌ lik kꞌax chinaꞌa iwibꞌ riꞌix chiwach.
35 We lik kꞌu kꞌax kinaꞌ iwibꞌ chiwach, ruma waꞌ konoje ri winaq kaketaꞌmaj ix nutijoꞌn —xchaꞌ.
Ri Jesús kuqꞌalajisaj ri kuꞌan ri Pedro echiriꞌ karewaj we retaꞌam uwach
(Mt. 26:31-35; Mr. 14:27-31; Lc. 22:31-34)
36 Ri Simón Pedro xutzꞌonoj che ri Jesús:
—Wajawal, ¿pa kꞌu keꞌek wi la? —xchaꞌ.
Ri Jesús xukꞌul uwach:
—E pa wa kinꞌek wi riꞌin, na yaꞌtal ta chawe kat-terej bꞌi chwij woꞌora; noꞌj kopon na kꞌu ruqꞌijol echiriꞌ katopon chilaꞌ pa kinꞌek wi riꞌin —xchaꞌ.
37 Ekꞌu ri Pedro xubꞌiꞌij che:
—Wajawal, ¿suꞌchak na yaꞌtal ta chwe kinterej bꞌi chiꞌij la woꞌora? Ma riꞌin xa jumul kanya ne ri nukꞌaslem pa kamik uma rilal —xchaꞌ.
38 Y ri Jesús xukꞌul uwach:
—¿Lik qatzij kawaj kaya awibꞌ pa kamik wuma riꞌin? Paqatzij wi kambꞌiꞌij chawe: Echiriꞌ kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach.