17
Ri jalkꞌatajibꞌal uwach ri Jesús
(Mr. 9:2-13; Lc. 9:28-36)
1 Waqibꞌ qꞌij kꞌu ubꞌiꞌxikil riꞌ waꞌ echiriꞌ ri Jesús xebꞌuchaꞌ ri Pedro, ri Jacobo y ri Juan ruchaqꞌ ri Jacobo; y xebꞌukꞌam bꞌi chwa jun nimalaj juyubꞌ.
2 Chilaꞌ kꞌut xjalkꞌatitaj uwach ri Jesús chikiwach. Rupalaj lik xwonik jelaꞌ pachaꞌ ruwonibꞌal ri qꞌij; yey ruqꞌuꞌ xujeq kawolqꞌinik jelaꞌ pachaꞌ ri qꞌijsaq.
3 Xaqikꞌateꞌt kꞌut chikiwach xewinaqir ri Moisés y ri Elías, qꞌalajisanelabꞌ re ojertan; e riꞌ kechꞌaꞌt rukꞌ ri Jesús.
4 Ekꞌu ri Pedro xubꞌiꞌij che ri Jesús:
—Qajawal, lik utz xyaꞌtaj chiqe riꞌoj oj kꞌo wara. We kaꞌaj la, kaqaꞌan oxibꞌ rancho: jun e la, jun re ri Moisés y jun re ri Elías —xchaꞌ.
5 Kꞌa kachꞌaꞌt ne ri Pedro echiriꞌ jun sutzꞌ lik kawonik xuchꞌuq kiwiꞌ. Y chupa kꞌu ri sutzꞌ xkita ruqul ri Dios, jewaꞌ xubꞌiꞌij:
«E Nukꞌajol waꞌ ri lik kꞌax kannaꞌo
y lik kinkiꞌkot che.
E chita utzij Rire»
xchaꞌ.
6 Echiriꞌ rutijoꞌn xkita waꞌ, xexukiꞌik, xkiqasaj kimejelem kꞌa chuꞌlew y xok jun nimalaj xiꞌin ibꞌ kukꞌ.
7 Ekꞌuchiriꞌ, xqibꞌ ri Jesús kukꞌ, xebꞌuchapo y xubꞌiꞌij chike:
—Chixyaktajoq, mixiꞌij iwibꞌ —xchaꞌ.
8 Echiriꞌ xetzuꞌn apanoq, na jinta junoq chik xkilo, xew ri Jesús.
9 Ekꞌuchiriꞌ xeqaj lo chwa ri juyubꞌ, ri Jesús xebꞌutaq che:
—Mitzijoj kꞌana che junoq janipa ri xkꞌut chiwach, kꞌate kitzijoj echiriꞌ Ralaxel Chikixoꞌl Tikawex kꞌastajinaq chi lo chikixoꞌl ri ekaminaq —xchaꞌ.
10 Ekꞌuchiriꞌ, rutijoꞌn xkitzꞌonoj che:
—¿Suꞌbꞌe kꞌut kakibꞌiꞌij raj kꞌutunel re ri tzijpixabꞌ: “Lik chirajawaxik wi kakꞌun na ri Elías nabꞌe”? —xechaꞌ.
11 Ri Jesús xukꞌul uwach:
—Qatzij, ri Elías nabꞌe kakꞌunik y kuyijbꞌaꞌ pan ronoje chwach rukꞌunibꞌal Ralaxel Chikixoꞌl Tikawex.
12 Noꞌj kanqꞌalajisaj kꞌu waꞌ chiwe: Ri Elías ya xkꞌunik, yey ri winaq na xketaꞌmaj ta uwach. Xkiꞌan kꞌu riꞌ che janipa ri xkaj rike; jekꞌulaꞌ Ralaxel Chikixoꞌl Tikawex kutij na ri kꞌax pakiqꞌabꞌ rike —xchaꞌ.
13 Ekꞌu rutijoꞌn xketaꞌmaj e kachꞌaꞌt puwi ri Juan Aj Yaꞌl Bautismo.
Ri Jesús kukunaj jun ala kꞌo puqꞌabꞌ jun itzel uxlabꞌixel
(Mr. 9:14-29; Lc. 9:37-43)
14 Echiriꞌ xebꞌopon pa e kꞌo wi taq ri winaq, kꞌo jun achi xqibꞌ rukꞌ ri Jesús, xuxuk ribꞌ chwach y xubꞌiꞌij che:
15 —Wajawal, kꞌutu ko ri kꞌaxnaꞌbꞌal kꞌuꞌx la che ri nukꞌajol, ma rire xa kumaj tew y lik kutij kꞌax ruma waꞌ; ukꞌiyal laj tzaqinaq pa aqꞌ y pa yaꞌ.
16 Xinkꞌam lo kukꞌ wa tijoꞌn la, pero rike na kichꞌijom ta ukunaxik —xchaꞌ.
17 Ekꞌu ri Jesús xukꞌul uwach:
—¡E ri ix tikawex re waqꞌij ora na kubꞌul ta ikꞌuꞌx wukꞌ yey ix sachinaq! ¿Janipa chi lo qꞌij kajawaxik kinkꞌojiꞌ iwukꞌ chaꞌ kakubꞌiꞌ ikꞌuꞌx wukꞌ? ¿Janipa chi lo qꞌij kixinkuyu e laꞌ jelaꞌ iꞌanom? Chikꞌama lo rala wara —xchaꞌ.
18 Ekꞌuchiriꞌ, ri Jesús xutaq ri itzel uxlabꞌixel chaꞌ kel bꞌi che rala. Y chwi kꞌu riꞌ asu xkunutaj rala.
19 Tekꞌuchiriꞌ, rutijoꞌn ri Jesús xeqibꞌ rukꞌ re kechꞌaꞌt rukꞌ kitukel y xkitzꞌonoj kꞌu che:
—¿Suꞌbꞌe riꞌoj na xqachꞌij ta resaxik bꞌi waꞌ wa itzel uxlabꞌixel? —xechaꞌ.
20 Ri Jesús xubꞌiꞌij chike:
—E ruma na nim ta ri kubꞌulibꞌal ikꞌuꞌx rukꞌ ri Dios. We ta ri kubꞌulibꞌal ikꞌuꞌx kakꞌiyik jelaꞌ pachaꞌ ri kakꞌiy rijaꞌ re moxtasa, utz ne riꞌ kibꞌiꞌij che wa juyubꞌ: “Chatela bꞌi wara y chatqꞌax pan jelaꞌ”, y e kuꞌanaꞌ. Riꞌ na jinta kꞌayew chiwach riꞌix we ta lik kꞌo kubꞌulibꞌal ikꞌuꞌx.
21 Noꞌj waꞌ wa juchꞌobꞌ itzel uxlabꞌixel xew utz kebꞌesax bꞌi rukꞌ oración y ayuno —xchaꞌ.
Ri Jesús kachꞌaꞌt tanchi puwi rukamik
(Mr. 9:30-32; Lc. 9:43-45)
22 Ekꞌuchiriꞌ e kꞌo pa taq ri luwar re Galilea, ri Jesús xubꞌiꞌij chike rutijoꞌn: «Ralaxel Chikixoꞌl Tikawex kayaꞌiꞌ pakiqꞌabꞌ rachijabꞌ
23 y kakamisax kuma; noꞌj churox qꞌij kakꞌastaj loq» xchaꞌ. Echiriꞌ xkita waꞌ rutijoꞌn, lik xkibꞌisoj.
Ri tojonik kaꞌanik re ri Rocho Dios
24 Echiriꞌ ri Jesús kukꞌ rutijoꞌn xebꞌopon pa ri tinamit Capernaúm, raj tzꞌonol puaq re ri tojonik xeꞌkila ri Pedro y xkitzꞌonoj che:
—¿Ri tijonel iweꞌix na kutoj ta kami riꞌ ri tojonik kaꞌanik re ri Rocho Dios? —xechaꞌ.
25 Ekꞌu ri Pedro xubꞌiꞌij:
—Rire kutojo —xchaꞌ.
Ekꞌuchiriꞌ xok ri Pedro pa ri ja, ri Jesús nabꞌe na xchꞌaw che, jewaꞌ xubꞌiꞌij:
—Chawach riꞌat, ¿e juna rey che ruwachulew, china chike kutzꞌonoj wi taq ri tojonik kaꞌanik? ¿Chike ri e ralkꞌoꞌal o chike ri na e ta ralkꞌoꞌal? —xchaꞌ.
26 Xubꞌiꞌij kꞌu ri Pedro:
—Chike ri na e ta ralkꞌoꞌal —xchaꞌ.
Tekꞌuchiriꞌ, xubꞌiꞌij ri Jesús che:
—Ekꞌu ri e ralkꞌoꞌal na jinta kꞌo katzꞌonox chike.
27 Noꞌj chaꞌ na kaqapetisaj ta kꞌu royowal junoq, jat chuchiꞌ ri mar y chakꞌaqa ri anzuelo chupa. Ekꞌu ri nabꞌe kar kachapo, chajaqa rupuchiꞌ y kariq jun meyo chupa. Rukꞌ kꞌu riꞌ, chayaꞌa ri tojonik kanꞌan riꞌin y ri tojonik kaꞌan riꞌat —xchaꞌ.