Pↄl e lɛl krɛkrɛ ɛm ekʼawŋ Korɛnt eyŋ
Ów ekʼit eke wɛl kʼuw any
Ɛrm ɛs Pↄl anake nↄn lɛl na awŋ Nyam ecʼagŋ ekʼel Nyamel ekʼanŋ Korɛnt ɛb ɛm a. In obi anake li sigm Nyamel na es ɛb na ɛm akpo 51 ɛm, Jesu e mew a e jam a (Ob Kok 18.1-18). Gbɛkↄ eke Pↄl anŋ Efɛs ɛb ɛm a (Ob Kok 19), Nyamel ekʼanŋ Korɛnt a e lís e samani eŋuŋ ow okʼr af (1.11). Nʼɛŋn lɛl nyam eke wɛl awŋʼn am bibrmʼn ów bɛb yɛji (7.1). 1 Korɛnt e lɛl na ɛm anake ni nↄn in ecʼelel eke nʼam ɛkan ów a eke wɛl bibrmʼn a, akpo 54 toŋ 55 ɛm, Jesu e mew a e jam a.
Korɛnt ecʼɛb a agb nↄnↄ, aŋke agŋ a ekʼanŋʼn ɛm a ↄtu eke kʼij agŋ fandi ekŋ yen yen sakp yen oglog fandi ekŋ yen yen sakp lↄbŋ. Lʼel Grɛs wus ab af e sɛb ɛgbɛl ab ɛm e nyam. Nʼanŋ Mediterane ecʼokij a saw ɛtŋ nʼↄny manu yony, ow ↄŋ an ↄl owi bʼan es nↄnↄ.
Korɛnt ɛb ab ɛm, sinyam yadŋ e nuŋ igŋ ɛsɛl lele ekŋ ekpr e nuŋ igŋ ɛsɛl ab ɛny nↄnↄ; ɛtŋ ɛbirir marɛm marɛm yɛji ↄnym nuŋ. Ów amua bʼↄl eke kʼↄŋ agŋ a eke el Kretiɛn owr owr a eb ɛl e sejagb esig a. Pↄl iri yɛjʼeke iririr anm agŋ ab ɛm toŋ ɛtŋ -li bubr ɛm (1.10 toŋ 4.21). Ow sosiɛm, Pↄl am awŋ lɛl na ów amua eke lʼiri a nuŋ af, ke li yɛ́gm wɛl low yɛji ów ɛjeci bɛb af ɛsɛ: mɛbi owi (nuŋ 7), sos ɛrm ɛw segb waw eke wɛl bi kok ↄŋ sinyam yadŋ a e lís (nuŋ 8 toŋ nuŋ 10), Nyam e nuŋ igŋ lele Abŋ Lala e sob ap ab ab (nuŋ 11 toŋ 14), Krist lele agŋ ekʼubʼr nawrɛ ab e luw ɛm anŋ igb e low (nuŋ 15). Lɛl a ecʼuwr ɛm a (nuŋ 16), Pↄl am dad ɛl eke li bʼow lʼɛc wɛl ogŋ yogŋ, ke lʼóc Jerusalɛm ecʼↄgbↄru a ecʼob ap a; ɛtŋ nʼam ɛsŋn wɛl.
1
Ɛsŋn
Ɛm Pↄl, Nyam ɛsŋʼm aŋke lʼerur eke mi kʼel Jesu Krist ecʼɛrm ɛs. Ɛy lisijim Sↄstɛn ab e nin ɛm, mʼam awŋ Nyamel ekʼanŋ Korɛnt, agŋ a eke el Nyam eci ɛl ecʼↄmn a eke okr af Krist ɛm a, lɛl na. Nyam am ɛsŋ ɛl eke -li kʼir ɛb ow eci, ɛsɛ agŋ a eke usu fɛŋ bi ŋↄŋn Nyam ɛy Ɛs Kↄtↄkↄ Jesu Krist e nin ɛm ab af. Lʼel wɛl eci Ɛs Kↄtↄkↄ, ɛsʼelel eke ɛy yɛji lʼel ɛy ecʼab af.
Ke Nyam ɛy Ɛs lele Ɛs Kↄtↄkↄ Jesu Krist ab ɛ́dŋ ↄny ↄwrↄ ke ↄ́ŋ ↄny ɛrm es ɛy!
Pↄl am ɛlu Nyam bia Korɛnt e Nyamel a ecʼów amamn eke Nyam kok ↄŋ a eci
Mʼↄ́pim eke mi kʼɛlu Nyam bia ↄny eci, ów amamn a eke Jesu Krist ab ecʼaf okr ɛm nʼↄŋ ↄny a eci. Ɛɛ, Nyam ɛcr Krist ɛm ↄŋ ↄny ów amamn fɛŋ in e juma a eci, ke ow el in ecʼejagb a ecʼany uw, ke ow el lɛc eke wɛl kʼↄny ↄb mɛwl ɛm in ecʼodad a e kokoba. Low nawrɛ, aŋke wɛl ↄb Krist ecʼamani ok ↄny ɛtŋ ucur ow e low ↄnyn es kikri. Ow ↄŋ caca ɛm a, Nyam ecʼob ap kaka anm ekʼakm ↄny, lɛgŋ na eke am ekur eke ɛy Ɛs Kↄtↄkↄ Jesu kʼɛlu sos ↄkm a. In anake li bʼow nʼↄŋ ↄny ínymn es kikri toŋ ókr nuŋ a. Ɛbɛn a kʼow ↄnymn low ↄbr kaka, lɛgŋ a eke Ɛs Kↄtↄkↄ Jesu Krist bʼow ow a. Nyam el cɛcɛ, in anake lʼɛsŋ ↄny eke ki cɛcr sel ɛŋn Jim ekʼel ɛy Ɛs Kↄtↄkↄ Jesu Krist ab a.
Korɛnt e Nyamel ab ɛm ecʼɛm bubr
10 Agŋ lisijimɛl, ɛy Ɛs Kↄtↄkↄ Jesu Krist e nin ɛm, mʼam ŋↄŋn ↄny eke nɛny kʼokr ↄny af, ke ɛm bubr owi kʼánm ↄny ecʼaraŋn a. Òkar af tasi abŋ ɛm lele tutr ɛm ab. 11 Ɛɛ, agŋ lisijimɛl, Klowe ecʼakŋ ecʼagŋ a dadʼm eke irirm in anŋ ↄny ɛm. 12 Kin low a eke mʼerur eke mi ki dad a: ↄny ɛm ecʼɛgŋ fɛŋ am dad in ecʼekʼerur. Ɛgŋ na bʼigb ke dád ɛsɛ: «Ɛm, Pↄl eci.» Ɛjeci na bʼigb ke dád ɛsɛ: «Ɛm, Apolↄs eci.» Ɛjeci na bʼigb ke dád ɛsɛ: «Ɛm, Piɛr eci.» Ɛjeci nyam yɛji bʼigb ke dád ɛsɛ: «Ɛm, Krist eci.» 13 Kↄ Krist e li cɛc ee? Kↄ Pↄl wɛl ɛw olikŋ af ↄny ecʼee? Kↄ Pↄl e nin ɛm wɛl ok ↄny mij nuŋ ee?
14 Mʼam ↄŋ Nyam bia, aŋke mʼokm ↄny ɛm ecʼɛgŋ kaka mij nuŋ, ekʼow elm Krispus lele Gayus ab cɛ. 15 Nɛnɛ a, ɛgŋ kaka kʼↄtum dadm eke ɛm e nin ɛm wɛl ok ↄny mij nuŋ. 16 Ɛɛ! Nawrɛ, mʼam ↄkn eke mʼok Stefanas ecʼakŋ a yɛji mij nuŋ. Ow e jam a, mi kʼↄnym ↄmn eke mi kʼok ɛgŋ ɛjeci mij nuŋ. 17 Krist ɛram im mij ok nuŋ owi ɛm, kↄ Amani Mamn a ecʼↄb eci lʼɛrmʼm, ɛtŋ ow elm agŋ e “sɛwr” e sodad a nʼↄↄm im abusu eke mi kʼoc mi kokr juma, yecʼɛtŋ ke Krist ecʼolikŋ af e luw a kʼírmnm in ecʼabusu a.
Jesu Krist, Nyam ecʼabusu lele sɛwr ab
18 Tasi ɛm a, Krist ecʼolikŋ af e luw a ecʼodad a el nuŋ ɛm ŋuŋ owi, agŋ a ekʼam irm kpab es Nyam e lís a eci. Gbɛkↄ ɛy a eke sʼanŋ sel ɛŋn ecʼejagb af a ecʼa, si bʼɛkn Nyam ecʼabusu ↄny a. 19 Kin yecʼeke wɛl nↄn Nyam Lɛl ɛm:
Mʼow mʼↄŋ ɛsɛwru e sɛwr a sel at
ɛtŋ mʼow mʼↄny nuŋ ɛm ↄny ɛsɛl eci nuŋ ɛm ↄny a
mʼoc es.
20 Sica bla lowi ɛsɛwru ↄtu eke ɛmɛny ki dad ee? Bla low any uw ɛsɛl ↄtu eke ki dad ee? Ɛtŋ bla ów ɛm apl ɛsɛl ↄtu eke ki dad ee? Bla lowi tasi -lʼↄtu eke ɛmɛny -li ki dad ee? Nyam yɛgm eke wus na eci sɛwr a el nuŋ ɛm ŋuŋ.
21 Tasi ɛm a, Nyam in e sɛwr ab ɛm kok eke wus na ecʼagŋ a ↄtum uwmʼn any ɛl obi e sɛwr ab ɛm. Ow sosiɛm, Nyam ɛgŋ eb sↄg agŋ a eke bʼub amani a eke sʼam ↄb a nawrɛ a, eke agŋ am tutr eke amani a el nuŋ ɛm ŋuŋ owi bↄbↄ yɛji. 22 Jwifɛl am ibrm simɛny ɛwr eke bʼiti any, ɛtŋ Grɛkɛl am ↄl yecʼa eke -li bʼɛsŋ “sɛwr” ab es. 23 Ɛy ecʼa gbɛ, Mesi a eke wɛl ɛw olikŋ af ecʼamani sʼam ↄb. Na, low eke Jwifɛl kʼↄtum ɛgŋm ebm, ke Grɛkɛl bʼɛkn ɛsɛ nuŋ ɛm ŋuŋ owi af. 24 Gbɛkↄ agŋ a eke Nyam ɛsŋ a, Jwifɛl lele agŋ ekʼelm Jwifɛl ab ecʼa, -lʼuw any eke Krist el Nyam ecʼabusu ↄny a lele sɛwr ab ab. 25 Ɛɛ, yecʼa eke wɛl bʼɛkn Nyam ɛm ɛsɛ “nuŋ ɛm ŋuŋ” af a, ↄny sɛwr akm agŋ eci sɛwr a; ɛtŋ yecʼa eke wɛl bʼɛkn Nyam ɛm ɛsɛ “sos ↄnym” af a, ↄny lɛc akm agŋ e lɛc a.
26 Agŋ lisijimɛl, ↄny eke ɛgŋn Nyam ecʼɛsŋ a ebr a, ɛ̀kan ↄny ecʼob eke eel. Ɔny ɛm a, “ɛsɛwru” ɛsɛ elel eke agŋ bʼɛkan ab af a, nↄnↄ anm, lɛc ɛsɛl nↄnↄ yɛji anm, ɛtŋ agŋ nↄnↄ eke wɛl ew bosu amamn ɛm a yɛji anm. 27 Gbɛkↄ Nyam sↄsum yecʼa ekʼanŋ ɛsɛ nuŋ ɛm ŋuŋ af wus aŋa a, kokr ɛsɛwru ɛ́s. Nyam sↄsum yecʼa ekʼↄnym sos wus na a, kokr agŋ a ekʼↄny lɛc a ɛ́s. 28 Ɛtŋ Nyam sↄsum yecʼa eke ↄnym any a oc, yecʼa eke ↄny sifn, elm ob kaka a, ŋuŋn yecʼa eke agŋ bʼɛkn ɛsɛ ob ekʼↄny any af a. 29 Nyam kok ɛbɛn, yecʼɛtŋ ke ɛgŋ kaka kʼɛ́lum mɛgŋel ↄkm in ecʼany af. 30 In anake lʼokr ↄny af Jesu Krist ab a, ɛtŋ ɛy ecʼa, Krist el sɛwr a eke bʼanŋ Nyam ogŋ ow a. Nyam bʼɛcr in ɛm, óc ɛy ɛsɛ agŋ nyim nyim af in ecʼany af. Krist ɛm, li bʼayal ɛy sʼir ɛb in eci, ɛtŋ li bi sↄg ɛy sikpl ecʼabu ɛm. 31 Ow sosiɛm, ɛsɛ elel eke Nyam Lɛl dad ab af:
Eke ɛgŋ nyam erur eke kʼɛw sos,
ke lʼɛ́w sos Ɛs Kↄtↄkↄ sosiɛm.
1:1 Sↄstɛn:Ɛ̀kn Ob Kok 18.17. Pↄl e Korɛnt ɛb ɛm eke anŋ sɛgŋ bɛb ecʼa, ɛ̀kn Ob Kok 18.1-18. 1:11 Klowe:ɛgŋ yↄw, kʼaw ke ow él an ↄl lis nyam ekʼir Efɛs, ke bʼↄŋ agŋ ím ↄl an Korɛnt ecʼagŋ ab. 1:12 Apolↄs:Ɛ̀kn Ob Kok 18.24; Piɛr: Grɛk ɛm e nin eke wɛl oc, ɛtŋ Arame ɛm a, ow el Kefas eke el nyandrɛ ɛm lebn (ɛ̀kn Jan 1.42). 1:14 Krispus:Ɛ̀kn Ob Kok 18.18; Gayus: Ɛ̀kn Ob Kok 19.29. 1:16 Stefanas:Ɛ̀kn 1 Korɛnt 16.15. 1:17 agŋ e sɛwr:lɛgŋ ab ɛm a, Grɛkɛl bʼↄŋ agŋ a eke bi yɛgm agŋ low sɛwr owi af ke nɛnym bʼok es a, any nↄnↄ (bɛ̀bmn akr 20-22). 1:19 Esayi 29.14. 1:22 “sɛwr”:ɛ̀kn 1 Korɛnt 1.17 lele ow ecʼakr otar ab ab. 1:31 Jeremi 9.22-23.