6
Krist ɛm ecʼagŋ lisijimɛl e dedeku ↄŋanin
1 Eke odad bʼanŋ ↄny ↄfr ɛm a, bla sosiɛm ɛtŋ bʼocr low a im ↄŋn jɛj ok ɛsɛl eke uwm Nyam any a jɛj ok, ow a eke kʼoc imn agŋ a ekʼel Nyam ecʼa ogŋ ab ee?
2 Ɔny, uwmn any eke agŋ a ekʼel Nyam ecʼa bʼow jɛj wus e low ok ee? Ɛtŋ eke bʼow jɛjr wus e low okr, ke ów ekekey nɛnɛ anake kʼↄtumn jɛjmn okmn ab ee?
3 Ɔny, uwmn any eke si bʼow si jɛj afr ɛrm ɛsɛl ecʼów sʼok ee? Sica ayaf si kʼↄtum si jɛjm wus aŋa ecʼów sʼokm ee?
4 Gbɛkↄ, eke bʼↄnyn jɛj ok owi ów amua ecʼa, bʼimn otr jɛj ok ɛsɛl eke ↄnym low kaka Nyamel ab a!
5 Ɛtŋ na eke mʼam dad a, ↄny ecʼɛ́s. Ɔny ecʼaraŋn aŋa, ɛgŋ nyamni yɛji anm elm sɛwru eke kʼↄtu jɛj low eke bʼanŋ agŋ lisijimɛl ↄfr ecʼaraŋn a ok ee?
6 Kↄ ow akpl tasi eke Krist ɛm ecʼɛgŋ lisijim nyam kʼↄŋ lawl nyam dedeku jɛj ok ɛsɛl ekʼuwm Nyam any a ogŋ ee?
7 Ɔny ecʼa, ow akpl ekʼuwr any eke ↄny ↄfr e dedeku ↄŋanin a el low ekʼɛlu ↄny wus! Bla sosiɛm ɛtŋ kʼɛ́gŋmn ɛnyɛmbri yony e jɛj ok a nana ebmn ee? Bla sosiɛm kʼɛ́gŋmn eke ↄny lawlɛl ɛjecʼa kʼiy ob ekʼel ↄny ecʼa nana ee?
8 Ɔny nana anake eel ɛnyɛmbri yony yony ɛsɛl a, ↄny anake am iyr agŋ ɛjecʼa mil a! Ke agŋ ɛjecʼa, Krist ɛm ecʼↄny lisijimɛl cɛ.
9 Ɔny uwmn any eke ɛnyɛmbri yony yony ɛsɛl kʼow ijm Nyam e gbreŋgbi usu a ecʼaja ab ee? Ɛgŋ kʼɛ́ju ↄny! Agŋ a eke bʼij nfaci, bʼigŋ sinyam yadŋ nuŋ, igŋ oglog yↄw eke bʼɛju lawl mɛbi owi ɛm, egŋ a eke bʼɛrum ɛl lawlɛl egŋ ab ɛsɛ ɛl ecʼↄyↄw af a lele egŋ a eke bʼagbr lↄsŋn ŋgbafrɛ oto ab a, kʼow okm Nyam e gbreŋgbi usu a.
10 Ɛbɛn nyam coco elu, agŋ a eke bʼerur os owi nↄnↄ, már ɛgŋu, agŋ a eke bi cak ɛl lawlɛl lele agŋ a eke bʼɛju agŋ eb ob ij ab ab yɛji, kʼow okm Nyam e gbreŋgbi usu a!
11 Lɛgŋ sig ɛm a, nɛnɛ anake ↄny ɛm ecʼagŋ bɛb anŋ a. Gbɛkↄ ɛy e Nyam a yↄyↄg ↄny e sikpl ab es, lʼayal ↄny eke kʼir ɛb in ab, nʼↄŋ ↄny eel nyim nyim in ecʼany af. Ɛtŋ ów amua fɛŋ, ɛy Ɛs Kↄtↄkↄ Jesu Krist e nin ɛm lele Abŋ Lala ab ecʼabusu ɛm li kok.
Ɔ̀ŋn Nyam anygbɛl ↄny e sos megl ab ab
12 Ɔny ɛm ecʼagŋ nyam nyam bi dad ɛsɛ: «Fɛŋ e kok ecʼabusu ɛruʼm es.» Nawrɛ, gbɛkↄ ɛm, mʼam dad eke ow elm fɛŋ akplm ɛy eci. Mi kʼow mi yɛbm ob kaka fɛŋ ↄↄm im mʼelm in ecʼadu.
13 Bi dadr yɛji ɛsrɛ: «Ob ij, lok eci nʼanŋ, ɛtŋ lok yɛji anŋ ob ij eci.» Nawrɛ, gbɛkↄ lɛgŋ nyam, Nyam bʼow ŋuŋn ɛl a yony mum. Ɛs Kↄtↄkↄ anake kok ɛy e sos megl a, ɛtŋ ɛy e sos megl a el in eci. Li kokm ow nfaci ijr eci.
14 Nyam eke igbm Ɛs Kↄtↄkↄ luw ɛm a, bʼow oc in ecʼabusu ab ɛm, ɛy yɛji igbm ɛy luw ɛm.
15 Ɔny uwmn any eke ↄny e sos a el Krist e sos ogog ogog ab ee? Kↄ mʼↄtu eke mi kʼoc Krist e sos ogog nyam mʼokr af facyↄw ab ee? Njaŋ, mi kʼↄtum!
16 Uwmn any eke ɛgŋ nyam eke okr af facyↄw ab a el sos megl nyam in ab ee? Tasi ɛm a, Nyam Lɛl dad ninɛ: Ke -lʼokr af -lʼel sos megl nyam.
17 Gbɛkↄ ɛgŋ yecʼeke bʼokr af Ɛs Kↄtↄkↄ ab a, bʼel nyam coco in ab abŋ ɛm.
18 Kʼòcr ↄny e sos megl a kʼijmn nfaci ab. Sikpl ɛjeci fɛŋ eke agŋ ↄtu eke ki kok a, elm sikpl eke wɛl bi kokm sos megl ab. Kↄ eke ɛgŋ nyam oc in e sos megl a am ijm nfaci ab, ow el low ŋuŋ eke nʼam kok lʼↄbr in e sos megl a.
19 Uwmn any eke ↄny e sos megl a el usu lala a ekʼel Abŋ Lala ecʼɛb ir usu ab ee? Abŋ Lala na anŋ ↄny ɛm ɛtŋ lʼel Nyam ecʼob ekʼↄŋ ↄny. Ow sosiɛm a, ↄny, elmn ↄny obi ↄny obi ecʼij.
20 Nyam ↄl ↄny an ligbɛl ɛm eke kʼeel ewi. Ow sosiɛm, òcr ↄny e sos megl a ɛlul in ecʼanygbɛl a ↄkm.