Pↄl e lɛl yony ɛm ekʼawŋ Tesaloni Eyŋ
Ów ekʼit eke wɛl kʼuw any
Tesaloni eyŋ e lɛl yony ɛm na ɛm, Pↄl am ↄŋ Nyam bia, aŋke Tesaloni eci ↄmn ɛsɛl a ↄny ↄmn ɛtŋ eke wɛl am ijr ɛl gbre a bↄbↄ yɛji, -li bʼerurir ɛl ↄfr. Pↄl awŋ ɛl lɛl na eke kʼatr ɛl sos es, ke ɛ́lum ɛl abu low ekʼam ↄŋ ɛl sel at Nyamel ab ɛm.
Nuŋ 1 ɛm a, Pↄl am atr ɛl sos es gbre eke wɛl am ijr ɛl a eci, ɛtŋ nʼam ↄkn wɛl eke Ɛs Kↄtↄkↄ Jesu bʼow ɛwl ow sↄg ɛl, ke íjr agŋ eke am ijr ɛl gbre a gbre. Nuŋ 2.1-12 ɛm a, Pↄl am dad Ɛs Kↄtↄkↄ ecʼow a e low, aŋke agŋ ↄwr ↄmn ɛsɛl a sos es dad ɛl eke Ɛs Kↄtↄkↄ in ow godʼɛtŋ. Pↄl am dad ɛrum mar eke gbuŋ ke Jesu in ɛ́wl in ow a, Low ŋuŋ kok ɛs nyam in bʼow in ɛy ↄkm. Owʼn ↄny Low ŋuŋ ecʼabusu ɛtŋ owʼn bʼow in ↄnyanin low Nyam ab. Gbɛkↄ Ɛs Kↄtↄkↄ Jesu in bʼow in ibi ɛgŋ ikŋ na. Nuŋ 2.13, nuŋ 3.15 ɛm a, Pↄl am dad ↄmn ɛsɛl a eke kʼinym es kikri ↄmn ɛm ke ám ŋↄŋn Nyam.
Sica lɛl a ecʼes ok ɛm a, Pↄl dad low nyam eke lʼiri ke el ɛl e Nyamel a e lís e low. Low a eke lʼiri a el Nyamel ab ɛm ecʼagŋ a ekʼérurm juma kok owi a e low. Nʼam ↄŋ abusu eke wɛl kʼocr sos es ↄ́rŋu amua e lís, aŋke ɛl ecʼes an a elm ow a eke -nʼɛŋan low a eke li yɛgm wɛl ab ɛm a (nuŋ 3.6-15 ɛm a).
Sica lɛl a ecʼuwr ɛm a, lʼɛdŋ wɛl ↄwrↄ.
1
Ɛsŋn
1 Pↄl, Silas lele Timote ab e lɛl ekʼam awŋ Nyamel ecʼagŋ ekʼanŋ Tesaloni baŋn, ke el Nyam ɛy Ɛs lele Ɛs Kↄtↄkↄ Jesu Krist ab ecʼagŋ:
2 Ke Nyam Ɛs lele Ɛs Kↄtↄkↄ Jesu Krist ab ɛ́dŋ ↄny ↄwrↄ, ke ↄ́ŋ ↄny ɛrm es ɛy.
Tesaloni eyŋ e lɛc ekʼam ↄny ↄmn ɛm, gbre ijr ecʼaraŋn
3 Agŋ lisijimɛl, ow akpl eke sɛgŋ fɛŋ, si kʼɛlu Nyam bia ↄny sosiɛm. Ow it eke si ki kok ɛbɛn, aŋke ↄny ecʼↄmn ekʼↄnyn a am bobn ɛtŋ ↄny ecʼerur eke ↄnyn ↄny ↄfr ɛm a, am agb imn anym eci sɛgŋ fɛŋ.
4 Na sosiɛm, si bi dad ↄny e lís e low, sʼaw ↄny Sinyamel ecʼagŋ a fɛŋ eke bʼas luku igŋ Nyam nuŋ a ecʼany af, aŋke ↄny bʼinymn es kikri ↄmn ɛm, gbre ijr lele sos es ↄw fɛŋ eke bʼↄbar ab ab ɛm.
5 Gbre ijr amua am yɛgm eke Nyam e jɛj ok a el nyim nyim. Tasi ɛm a, gbre ijr amua sosiɛm anake bʼow eel Nyam e gbreŋgbi usu a ekʼam ijr ow e gbre a ecʼagŋ tasi a.
6 Nyam el nɛnyɛmbri nyam Ɛs: ow sosiɛm agŋ ekʼam ijr ↄny gbre a, ɛl yɛji li bʼow lʼijr wɛl gbre.
7 Ɛtŋ ↄny ekʼam ijr gbre a, li bʼow lʼɛyr ↄny ɛrm es, ↄny lele ɛy ab, lɛgŋ eke Ɛs Kↄtↄkↄ Jesu bʼow anŋ afr ow in lele ɛrm ɛsɛl abusu ɛsɛl ab ab a.
8 Lɛgŋ a, li bʼow nʼanŋ al ekʼam iri ecʼaraŋn lʼɛy ↄkm, yecʼɛtŋ ke li kók agŋ eke uwm Nyam any, ke ɛ́luam ɛy Ɛs Kↄtↄkↄ Jesu ecʼAmani Mamn a low ŋuŋ.
9 -Li bʼow -nʼɛŋn gbre eke kʼow ↄnym uwr, ɛtŋ gbre ij akpasu na, bʼow ↄny kpab ɛl es Ɛs Kↄtↄkↄ e lís lele in ecʼanygbɛl e lɛc ab ab e lís.
10 Low a bʼow ɛy lɛgŋ a ekʼƐs Kↄtↄkↄ bʼow ow a. Li bʼow lʼow yecʼɛtŋ kʼagŋ a ekʼel in eci ke ubʼr nawrɛ a, úsrʼr sos, kↄ́klmʼn. Ɔny yɛji bʼow anŋn ɛl ɛm, aŋke ubr amani a eke sʼↄŋ ↄny a nawrɛ.
11 Na sosiɛm, sɛgŋ fɛŋ sʼam ŋↄŋn Nyam sʼↄŋ ↄny yecʼɛtŋ ke ɛy e Nyam a ɛ́kn ↄny ɛsɛ agŋ eke it af, in ecʼɛsŋ a eke lʼɛsŋ ↄny ab ɛm. Ke in ecʼabusu ab ɛm, lʼɛ́lum ↄny abu kokr low nimamn fɛŋ ekʼam erurir a, ke nʼↄ́ŋ ↄny ecʼↄmn a ɛw gbagba!
12 Na ɛm a wɛl bʼow dad ɛy Ɛs Kↄtↄkↄ Jesu e nin mamn, ɛtŋ ↄny yɛji -li bʼow -lʼaw ↄny. Ow bʼow el ɛy e Nyam lele Ɛs Kↄtↄkↄ Jesu Krist ab ecʼↄwrↄ ekʼɛŋan.