14
Ayeye Yepe-Yepe Akwerrke-akerte ikwerenhe areye-arlke
1 Kele the anteme Yepe-Yepe Akwerrke apwerte akertnele tnerlenge areke, apwerte yanhe Zion arritnye aneke Jerusalem-ele. Yanhe ikwerele tyerrtye atningke ikwerenge apurte tnerlte-aneke, 144,000 anthurre. Urle itnekenhe-arrpeke-arlenge arrpenhele arritnye Yepe-yepe Akwerrke-kenhe intelhe-ileke, arritnye Ngkarte-kenhe-arlke.
2 The aweke angwenhe apeke re alkere akertne-ngentyele angkerlenge. Re arnterre anthurre angkeke nhenge kwatye aywerre angkeme-arteke nhenge apwerte akertnenge thelelhemele, nhenge kwatye angkeme-arteke. Nhenge the aywerre awemele re kwenhe angkentye mwerre akngerre anthurre-arteke nhenge aywerre tyerrtye areye-arle guitar apeke arrkene-irreme-arteke.
3 Kenhe tyerrtye 144,000-anthurre akenhe chair Ngkarte-kenhenge arrekwele tnetyame, atnunthe 4-pele-arlke akngerrepate 24-arlke. Itne yanhe ikwerele tnetyame alyelhentye alkarle alyelhemele itne-ante ware-arle itelarekeke. Arrpenhe-ante alyelhentye alkarle yanhe ikwere uyarne akaltye-irreme. Nhenhe areye kwenhe Ngkartele-arle itetheke mpwarekeke nhenge itne apmere ahelhe nhenhele anetyartenge, itne-ante ware kwenhe alyelhentye alkarle nhenhe ikwere akaltye-irreme.
4 Tyerrtye 144,000 nhenhe areye kwenhe Ngkarteke-ante ware akwetethe arratye mwerre anerlte-aneme. Nhenhe areye kwenhe aneke arelhenge-arle intetyakenhe anekeke, itne urlerte akwete anetyarte angwarelhemele. Itne akwetethe yanhe renhe apentetyarte Yepe-Yepe Akwerrke-arteke-arle anemeke, nhenge nthenhe-werne apeke re alherlenge. Artwe nhenhe areye kwenhe aneke Ngkarte-kenhe, Yepe-Yepe Akwerrke-kenhe anteye. Artwe nhenhe areye kwenhe arrekwelenye areye-arteke aneme Yepe-Yepe Akwerrkele-arle itetheke mpwarekeke Ngkarte-werne akngemele anteye.
5 Itne kwenhe urrtyirremele iletyakenhe aneke, arrpenhe ilpernetyakenhe aneke, iwerre akurnele anetyakenhe aneke, arrangkwe-arle.
Alkere-arenye urrpetye-akerte
6 Yanhe ikwere-iperrele the areke alkere-arenye arrpenhe alkere akertne anthurrele alkereke-irrerlenge. Re kwenhe apmere arrpe-anenhe-werne alhetyame tyerrtye ingkirrekeke angkentye mwerre-akerte iletyeke, tyerrtye areyeke angkentye arrpenhe areyele-arle angkemeke, tyerrtye arrpenhe areyeke yenpe arlkenye arrpenhe areye-arle anemeke anteye.
7 Alkere-arenye re anteme arlkemele angkeke, “Ngkarte akertne utyernerlte-anemele tnakewarraye arlte-arle angathe-irremenge Rarle nhenge tyerrtye ingkirreke court-eke ngkernetyeke itnenhe akalkelhe-iletyeke. Renhe tnakewarraye Rarle alkere, ahelhe, kwatye alaye, kwatye pintye, ingkirreke anthurre aknganekenge.”
8 Alkere-arenye arrpenhe anteme ikwerenge intertele apetyeke imerte angkemele, “Awerrirraye! Apmere yanhe Babylon arritnye aneme tyerrtye atningkele-arle tnakewarremeke, kele lyete anteme atakelheke arltwe anteme intemele, tyerrtye areye apmere yanhe-arenye uyerrekenge anteye. Arrantherre itelareme tyerrtye areye apmere yanhe ikwerele-arle anerrirretyarte kwenhe akurne anthurre anetyarte. Kenhe tyerrtye arrpenhe areye apmere arrpe-anenhe-ngentyele apetyetyarte itnekenge apurte-irreke-arle itne-arlke akurne-irrereke tyerrtye areyele apmere yanhe-ngentyele-arle itnenhe uternetyarteke. Arrantherre itelareme, nthakenhe-arle nhenge tyerrtye anyentele apeke arrpenhe ngkwarle antywetyeke uternemele re anteme antyweme arerte-irremele, imerte arrpenhe areyenge apale interremele. Yanhe alakenhe re-arteke kwenhe itne akurne-irreke itne anteme Ngkarteke alkngwirreke anthurre.”
9-10 Awethe-anteye alkere-arenye arrpenhe alkereke-irremele apetyeke, arrpenhe yanhe atherre alheke-arle iperre, re-anteme arnterre anthurre alakenhe angkeke, “Ngkarte kwenhe ahele akwete aneme tyerrtye areyeke-arle artepe kwene-irremeke arrentye yanhe tnakewarremeke arrentye yanhe renhe, tyerrtye areyeke-arle arne arrpenhe-arle mpwarekeke arrentye-arteke-arle renhe-arle tnakewarremeke. Re tyerrtye yanhe areyeke ahele anthurre aneme anteye imperre-arle atnyenemeke iltye akwe-arratyele apeke nhenge urlele apeke. Ikwere-arle itne mpwarekenge Re itnenhe ure kweneke-arleke iwetyenhe nhenge kwerte arntirte-arle ntyemeke. Itne arnterre anthurre ampangketyenhe, nhenge Yepe-Yepe Akwerrke-artekele uthene alkere-arenye Ngkarte-kenhe areyele kwenhe arerlenge.
11 Kwerte ure-ngentyele itnenhe-arle ampemeke, re akwete-ante akertne antyerle-anemele. Arlte uthene ingwe uthenele itne akwetethe ampangkerlte-anetyenhe. Alakenhe nhenhe re kwenhe tyerrtye areyeke irretyenhe arrentye yanhe renhe-arle tnakewarremeke arne yanhe re-arteke-arle anemeke, nhenge yanhe areye ingkirrekeke arrentye yanhe ikwere-arle anthelherlte-anemeke imperre ikwerenhe itne-arrpeke-arleke intelhe-ilekenge.” Alakenhe-arle alkere-arenye ingkerne-iperre angkeke.
12 Alakenhe ikwerenge anteme tyerrtye Ngkarte-kenhe areyele, Ngkarte-arle awerlte-anemeke imerte mpwarerlte-anemele iwenhe-arle Re itneke ilemeke, Jesus-arle itelarerlte-anemeke, akwetethe awemele renhe arratye itelarerlte-anetyeke anaye.
13 The anteme aweke arrpenhe atyenge alkere-ngentyele angkerlenge, “Pipe-ke alakenhe intelhe-ilaye! ‘Lyete-ngentyele yanhe areyele Jesus-arle apenterlte-anetyarteke nhenge itne apmere ahelhe nhenhele itethe anemele, kele itne alkere akertnele akangkemele anthurre-arle anetyenhe.’ ”
Nhenge Utnenge Akngerrele nhenhe renhe awemele, re angkeke, “Arratye apelaye! Ilweke-arle iperre itne akwete warrke-irretyakenhe anetyenhe. Kele-anteye-arle itne ltyerretyeke, Ngkarte-arle kwenhe yanhe areyeke akangkentye anthurre anerlenge iwenhe apeke renhe-arle mpwaretyarteke, Re itnenhe mpwaretyeke ileke.”
Arrpenhele tyerrtye akurne areye irrerlknge atweme
14 Yanhe ikwere-iperrele anteme the alkere arnareke, the anteme areke artwe-arteke angkulye mperlkerele alkere akertne anthurrenge anerle-anerlenge. Re mwekarte-akerte gold-engentyele-arle mpwarekeke alartetye areye irrpentye akngerre, iltye ikwerenhenge re alyweke arnkwerte-arnkwerte arlpentye akngerre atnyenemele yanhe rarle kwenhe arrirlpe akngerre anthurre anekeke.
15 Alkere-arenye arrpenhe tyatye akngerre Ngkarte-kenhe-ngentyele arrateme artwe yanhe ikwere arlkeke angkulye mperlkerenge-arle anetyameke ikwere angkemele “Alyweke arnkwerte-arnkwerte ngkwinhe inaye! Merne wheat ingkirreke kwenhe apmere ahelhe antekele mpenge-anteme-irreke. Ingkerreke anthurre aketyeke alhaye, apurtelhe-ilemele imerte!”
16 Kele re mpwareke iwenhe-arle renhe alkere-arenyele mpwaretyeke ileke. Re merne wheat alyweke arnkwerte-arnkwerte arlpentye akngerrele aketye-alheke apmere ahelhe antekele-arle lyapemeke imerte ingkirreke apurtelhe-ilemele.
17 The anteme areke alkere-arenye arrpenhe tyatye akngerre Ngkarte-kenhe-ngentyele arraterlenge, re-inpe alyweke arnkwerte-arnkwerte arlpentye akngerre atnyenemele arrpenhe nhenge-arteke.
18 Yanhe ikwere-iperrele anteme the alkere-arenye arrpenhe areke, alkere-arenyele-arle ure arntarnte-arentye akngerre anemeke akwetethe-arle amperle-anemeke apwerte athirnte ikwerenge nhenge kwerte ntyentye mwerre akngerre-akerte. Re alkere-arenyeke arlkeke alyweke ankwerte-ankwerte-arle atnyenetyameke angkemele, “Merne kripethe areye kwenhe kele mpenge-irreke apmere ahelhe ikwerenge. Itnenhe ingkirreke anthurre arne altyeye-altyeye-ngentyele alyweke yanhe-akertele aketyeke alhaye imerte itnenhe apurtelhe-ilemele!”
19 Kele re alhemele mpwareke nhenge iwenhe renhe alkere-arenyele mpwaretyeke ileke-arle, merne renhe alyweke ikwerele akemele. Itnenhe apurtelhe-ilemele re itnenhe akngemele arne akngerreke-arleke akwernemele, tyerrtye areyele-arle merne kripethe itnenhe ulthetyarteke akarrwe rlputnetyeke. Ayeye nhenhe kripethe-akerte kwenhe angkeme tyerrtye areye-akerte akurne-arle mpwaremeke. Alakenhe kwenhe angkeme Ngkarte-arle itneke ahele-irretyenhe itnenhe ulthemele atwemele anthurre-ante.
20 Kenhe apmere akethenge Ngkartele kripethe areye ultheke akarrwe rlputnemele yanhe-ngentyele alhwe akngerre arne tyampite ikwerenge-ntyele athelelherlenge nhenge Re kripethe itnenhe rlputneke-iperrele. Re kwatye urewe akngerre-arteke apetyeme, alhwe yanhe re iperte akngerre aneke untye artwe-kenheke-atwetye, re kwenhe arlenge-arlentye anthurre kwatye urewe re irntwarre-akerle-irremele kilometre 300-eke-atwetye.