15
Ayeye alkere-arenye seven-akerte rlkerte-ilemeke-arle
1 Yanhe ikwere-iperrele the areke iwenhe apeke arrpenhe renhe alkere-akertnenge arraterlenge arne iwenhe apeke re akngerre-apenhe anthurre renhe nhenge the renhe areke-iperrele apatemele anthurre. Alkere-arenye 7 aneke, Ngkartele itnenhe ileke rlkerte arrpenhe 7-pele tyerrtye akurne areye anthetyeke alhetyeke. Ngkarte kwenhe tyerrtye akurne areyeke ahe akngerre anthurre irreke-arle Re alkere-arenye nhenhe 7-pele yerneke itnenhene rlkerte-ilemele atwetyeke apeke apmere ahelhe nhenhe-arlke kwatye alaye-arlke akurne-iletyeke. Nhenge itne tyerrtye areye rlkerte-ileke-arle atwemele anteye uyerrelhe-ileke-iperrele, kele itne impetyenhe anteme. Ngkarte anteme ahele-irretyakenhe anetyenhe.
2 The awethe-anteye areke kwatye alaye akngerre kelathe-arteke areke anteme, re kwenhe ure uthene kelathe uthene anyente-irreke-arle-arteke. The areke tyerrtye atningke anthurre kwatye alaye iterele tnerlenge kelathe-arteke-arle anemeke. Nhenge apmere ahelhe nhenhe ikwerele anemele, nhenhe areyele arrentye-ketye ayene-ilelheke-arle, re itnenhe uyarne uterneke ikwere artepe kwene-irretyeke renhe tnaketyeke nhenge arne renhe apeke re-arteke-arle anekeke tyerrtye areyele-arle mpwarekeke. Itne imperre 666-kwenye aneke, imperre nhenge arrentye-kenhe anemeke. Itne ingkirrekele arne guitar-arteke atnyeneke Ngkartele-arle itnenhe anthekeke.
3 Itne yanhe ikwerele tnerrirreke alyelhentye Moses-kenhe alyelhemele, arrantherre itelareme nhenge Moses-arle Ngkarteke warrke-irretyarte. Itne Jesus-eke alyelheme anteye, Yepe-Yepe Akwerrke-arteke-arle anemeke. Itne kwenhe alakenhe alyelheme:
“Ngkarte, Unte anyente-ante ware kwenhe arne ingkirreke anthurreke alartetye aneme,
Unte anyentele ingkirreke anthurre mpwareme ilyernpenye anthurre.
Nhenge anwerne arne ingkirreke aremele Unte-arle mpwarekeke, anwerne apateme anthurre.
Unte apele tyerrtye areyeke apmere ingkirreke anthurre-ngentyele alartetye anthurre aneme,
Unte itneke arratye anthurre angkeme itnenhe mwantyele arntarnte-arerle-anemele.
4 Tyerrtye ingkirreke kwenhe Ngkwenge atere ware itirreme
artepe anemele kwene-irremele Ngenhe tnakeme,
itne ingkirrekele-arle itelarerrirreme Unte-arle Alartetye aneme.
Unte anyente ware kwenhe mwerre anthurre aneme.
Tyerrtye ingkirreke anthurre kwenhe apmere arrpe-anenhe-ngentyele apetyetyenhe Ngenhe akertne utyernetyeke tnakewarremele,
Unte-arle arratye mwerre itirrerlenge akwetethe arne ingkirreke arratye mwerre mpwarerle-aneme.”
5 Ikwere-iperrele anteme the awethe arnareke tyatye akngerre Ngkarte-kenhe alkere-akertnenge aremele, arriwe altywere anekenge. Kwenenge ilthe ameke-ameke atyeperre Ikwerenhe tneke, apmere nhenge itne angkentye ameke-ameke Ngkarte-kenhe areye atnyenetyarte.
6 Kenhe alkere-arenye 7-pele areyele, arne akurne seven-arle yernekeke, tyerrtye areye arlkarentye-iletyeke tyatye akngerrenge-ntyele arrateke. Itne mantere mperlkere anthurreke irrpetyame amparrkerlenge-arle. Itne antayeke irrpeke gold-engentyele-arle mpwarekeke arerre ayernelheke.
7 Kenhe atnunthe 4-pele yanhe ikwerele tnerrirretyame, anyentele alkere-arenye 7-arrpe apanthe antheke gold-engentyele-arle mpwarekeke. Ngkartele anteme ngkwarle-arteke apanthe seven-eke-arleke theleke imernetyeke Rarle ahele anthurre aneke. Rarle thewe akwete-ante-arle anemeke, Re kwenhe tyerrtye areyeke ahele anthurre aneme arne akurne-arle mpwaremeke.
8 Nhenge Ngkarte apmere ameke-ameke yanhe ikwerenge anemele angkulye kwerte akngerrele renhe arrkngerte-ileme areme-ketye, Rarle ilyernpenye anthurre anerlenge, rlterrke anthurre-arle anemele. Nhenhe ikwerele ureke tyerrtye areye apmere ameke-ameke yanheke uyarne irrpeme. Alkere-arenye 7-areyele rlkerte yanhe areye thelemele uyerrelhe-ileke-arle iperrenge, tyerrtye areye anteme awethe kwene-werne irrpetyeke.