5
1 Niil aq-il ngadao neema thaqtsaol nail bhaqda nee, tsaq nail daol nail tsaol-aq pevq lal-a nail ngel-i mail, ngadao nail Heeqphaq Yeiqsul Khali bhaqda nee, Miqyail bhai tsaq lai jil lai-a nail ngaol.
2 Yeiqsul Khali bhaqda nee ngadao geeqlaoq eeljaol al nail lavqkhoel bhai jaol ivq lal-a nail ngaol. Ngadao Miqyail nail seiqleiq khaoqsail bhai ya dai, noeqthunq-ai thaq nail ngel-i mail, lavqkhiq tsail-ail nial.
3 Al ovqtavq, ngadao haq nail aoq nail phaq bhai ya daq-u phao, lavqkhiq mao-ail tsail-ail nial. Khul khi mail dai ngal-aq neq, haq nail aoq nail bhaqda nee, ngadao oltsaol lal-a nail ngaol.
4 Ngadao oltsaol nail bhaqda nee, laonqdaiq nail phaq bhai gaq lai-a nail tsaol-aq juq ngaol dai, Miqyail ngadao bhai saol-nvq lavq-a nail ngaol. Laonqdaiq nail phaq bhai gaq lai-a nail bhaqda nee, noeqthunq nail phaq jiav lal-a nail ngaol dai, ngadao heeq kivq nail ngaol.
5 Noeqthunq nail phaq jiav lal-a nail bhaqda nee, neema cov duq maq jiav yaoq-aol. Khul khi mail daiq ngal-aq neq, ngadao bhai bivq lavq-a nail Meeqnail Haolnail Aqhaqlal, ngadao nail neema lavqkhoel bhai Miqyail nail goil nail gaiq-a nail phaq teevq bhee hoel bhoel lavq-a nail ngaol.
6 Ngadao gaq hal duq maq jiav-u phao, Miqyail-i mail tsel dov-ai thaq nail yanq bhai Khali neq, oeqbal yaq nail haqbhoil khanqsil-a nail ngaol.
7 Tsaq nail daol nail tsaol-aq nail haqbhoil khanqsil nail tsaol-aq halpov khi ngaol-aoq, maq halpov moel kivq-ail. Teevq pov ganav tsaol-aq aqmeeq aqjaq nail haqbhoil khanqsil tseq nail teevq gaq ganav neq, jaol-ail jaol-aq.
8 Thailhai ngaol-aoq, Miqyail ngadao bhai khadai gaiq-a nail dai, niailhai bhi moel lavq-a nail ngaol. Ngadao oeqbal yaq pevq-u phao, Khali ngadao nail haqbhoil khanqsil-a nail ngaol.
9 Niil aq-il, Khali khanqsil-a nail bhaqda nee, ngadao Miqyail nail sivtavq bhai tsaq nail daol nail tsaol-aq pevq lal-a nail ngaol. A dai nee maqtsil, aivq bhaqda nee ngadao Miqyail neema phail nail phaq bhai maldil ya jel ail-a nail ngaol.
10 Ngadao Miqyail bhai neejiav jiav nail tsaol-aq pevq-u phao, aivq nail Yaqyov khanqsil-a nail ngel-i mail, ngadao Miqyail bhai tsaq lai jil lai-a nail ngaol. A dai nee maqtsil, aivq bhai tsaq lai jil lai-a nail ngel-i mail, Yaqyov aqdoevq doevq nail khe-ai, ngadao bhai maldil hevqkovq lavq nail ngaol.
11 Al taivq-ail maq ngel mail, ngadao nail Heeqphaq Yeiqsul Khali bhaqda nee Miqyail bhai lavqkhiq tsail tav dai, tsiq eeq nail ngaol. Aivq bhaqda nee ngadao Miqyail bhai tsaq lai jil lai-a nail ngaol.
Aqdaq khi Khali nail ganl
12 Tsaol-aq teevq gaq bhaqda nee, miltsaq kovtavq bhai oeqbal jiav lee khi, oeqbal bhaqda nee sil nail phaq jiav lee-a nail ngaol. Sil nail phaq tsaol-aq iqsanl nail kovtavq bhai kev lee-a nail ngaol. Khul khi mail dai ngal-aq neq, tsaol-aq iqsanl mail oeqbal nl-a nail ngel-i mail ngaol.
13 Aoldaoq kovqdaoq maq bivq-u nee mail, miltsaq kovtavq bhai oeqbal jiav nail ngaol. Thailhai ngaol-aoq, aoldaoq kovqdaoq maq bivq-a nail gaiqlaq bhai neq, oeqbal ngaol dai, maq saol-nvq-ai haq-al.
14 Alhai maq saol-nvq khi ngaol-aoq, Aqdaq nee mail Molseiq nail yeel bhai kev dai, sil nail phaq-i mail uvthaiq-ai thaq nail ngaol. Tsaol-aq al juq-i mail nl bheeq-a nail khi Aqdaq-i mail nl bheeq-a nail maq dul lai khi ngaol-aoq, sil nail phaq aqyu juq bhai uvthaiq-ai thaq nail ngaol. Aqdaq al gaq yaqhao khe lee nail gaq khe-ai dul nail ngaol.
15 Thailhai ngaol-aoq, nl bheeq-a nail al neq, aqnieivq-ail bivq lavq-a nail kovpavq khe-ai, maq dul-ail. Khul khi mail dai ngal-aq neq, tsaol-aq teevq gaq nl bheeq-a nail ngel-i mail, tsaol-aq maodai ya sil-a nail ngaol. Thailhai ngaol-aoq, Yeiqsul Khali bhaqda nee, Miqyail nail geeqlaoq eeljaol khi aivq-i mail aqnieivq-ail bivq lavq-a nail kovpavq al, tsaol-aq maodai nail haqbhoil mao jaiq lal-a nail ngaol.
16 Al ovqtavq, tsaol-aq teevq gaq nl bheeq-a nail ngel-i mail, pevq lal-a nail phaq neq, aqnieivq-ail bivq lavq-a nail kovpavq khe-ai, maq dul-ail. Khul khi mail dai ngal-aq neq, Aqdaq teevq gaq taivq-ail nl bheeq khi ngaol-aoq, tsaol-aq iqsanl mail, ya sil naol dai, yalkhaq dal nail phaq bhai ya daq-a nail ngaol. Thailhai ngaol-aoq, Miqyail-i mail aqnieivq-ail bivq lavq-a nail kovpavq bhaqda nee, ngadao maodai nl bheeq khi ngaol-aoq, Miqyail nail sivtavq bhai tsaq nail daol nail tsaol-aq pevq lal-a nail ngaol.
17 Tsaol-aq teevq gaq nl bheeq-a nail ngel-i mail, sil nail phaq aivq bhaqda nee uvthaiq-ai thaq nail ngaol. Thailhai ngaol-aoq, tsaq nail daol nail phaq pevq nail Miqyail nail eeq dee mao deedee nail geeqlaoq eeljaol khi aqnieivq-ail bivq lavq-a nail kovpavq bhai ya-a nail tsaol-aq, a dai nee maqtsil, Yeiqsul Khali bhaqda nee aqdoevq doevq khi ya uvthaiq nail ngaol.
18 Tsaol-aq teevq gaq nl bheeq-a nail ngel-i mail, Miqyail tsaol-aq iqsanl bhai ya sil naol dai, yalkhaq dal ceiv-ai thaq nail ngaol. Alhai dul dai, tsaol-aq teevq gaq tsaq nail daol nail phaq nl-a nail ngel-i mail, tsaol-aq iqsanl mail Miqyail nail sivtavq bhai tsaq nail daol nail tsaol-aq pevq lal khi, aqdoevq ya doevq nail ngaol.
19 Tsaol-aq teevq gaq maq naldaiq-a nail ngel-i mail, tsaol-aq maodai gaq oeqbal yaq pevq lal-a nail ngaol. Alhai dul dai, tsaol-aq teevq gaq naldaiq-a nail ngel-i mail, tsaol-aq maodai tsaq nail daol nail tsaol-aq pevq lal-a nail ngaol.
20 Bheeq nail leel nail phaq mao lal dai, aoldaoq kovqdaoq jiav lal-a nail ngaol. Thailhai ngaol-aoq, oeqbal mao lal nail al dao bhai, Miqyail nail geeqlaoq eeljaol mao jaiq lal nail ngaol.
21 Sil nail phaq bhaqda nee oeqbal uvthaiq-a nail khe-ai, tsaq nail daol nail phaq bhaqda nee geeqlaoq eeljaol uvthaiq-ai thaq nail ngaol. Geeqlaoq eeljaol al neq, ngadao nail Heeqphaq Yeiqsul Khali bhaqda nee ngadao bhai nqmaq maqluv halyeel ya doevq dai, hevqdaiq lavq nail ngaol.