6
Oeqbal bhai khaonq ha khi Yeiqsul Khali nail lavqkhoel bhai doevq nail ganl
1 Alheel ngel-i mail, ngadao khalhai ge heeq. Geeqlaoq eeljaol bhi mao lal nail dai khi, ngadao oeqbal nail haoqnao gaoq tsaothe-ai haq nail laiq.
2 Teevq peivq-ail maq tsaothe. Oeqbal nl nail phaq bhai tavq lai khi ngadao sil jel-a nail khe-ai dul nail ngel-i mail, oeqbal nail lavqkhoel bhai khalhai khi gaoq doevq kivq nail-aiq.
3 Ngadao Yeiqsul Khali bhai tavq kivq dai, ulcuvq saol-a nail al neq, aivq nee mail teevq gaq khe-ai, sil nail gal duq saol-a nail phaq pevq nail ngaol dai, nuljuq maq heeq kivq-ail laiq.
4 Alheel ngel-i mail, ngadao ulcuvq saol-u phao, aivq nee mail teevq gaq khe-ai sil khi, duq pheeq-ai thaq nail ngaol. Thailhai ngaol-aoq, Aqbhu Miqyail nail seiqleiq khaoqsail nail bhaqaoq bhaqda nee, Khali sil khi ngaol-aoq, gaoq doevq kovq lal-a nail khe-ai, ngadao iqsanl gaoq doevq kovq lal khi, tsaol-aq aqsivq pevq lal nail ngaol.
5 Ngadao Yeiqsul Khali nee teevq gaq khe-ai sil-a nail ngel-i mail, aivq doevq kovq lal-a nail khe-ai, ngadao aivq nee mail ya doevq kovq lal nail ngaol.
6 Ngadao oeqbal nail yaqkav maq ya jiovq-ail, oeqbal nail aqmaol niilniai lav luq lav seil-ail nia dai, ngadao nail neema aqlil aivq nee mail lavqyavq kovtavq bhai tavq heivq-a nail ngaol dai, ngadao heeq kivq nail ngaol.
7 Khul khi mail dai ngal-aq, sil-a nail tsaol-aq neq, oeqbal nee jel-ail nail ngaol.
8 Ngadao Khali nee mail sil haq neq, aivq nee mail teevq gaq khe-ai ya doevq nail ngaol dai, ngadao neema thaqtsaol nail ngaol.
9 Khali sil khi ngaol-aoq, gaoq doevq kovq lal-a nail ngel-i mail, aivq yaqhao teevq thal-iq maq sil yaoq-aol. Sil nail phaq aivq bhai maq uvthaiq nia yaoq-aol dai, ngadao heeq kivq nail ngaol.
10 Khali aivq sil-a nail neq, aivq khi mail oeqbal nail gaiqlaq bhai teevq pov taivq-ail gaoqceiv ceiv ail-aoq nail ngaol. Niil aq-il aivq doevq thailthaiq nail neq, Miqyail nail haqbhoil ngaol.
11 Alhai dul dai, nuljuq yovqgavq bhai yovqgavq niailhai saol-nvq yaoq. Ngal neq, oeqbal nee gaoq ceiv ceiv-ail khi sil gaq-ao nail nee ovqtavq, Yeiqsul Khali bhaqda nee Miqyail nail haqbhoil doevq thailthaiq nail tsaol-aq ngaol dai, saol-nvq yaoq.
12 Nuljuq nail aqsivq haqjoil sil nia nail aqmaol bhai oeqbal-i mail thaq bhi uvthaiq. Oeqbal jalmul mul nail haoqnao thaq tsaothe.
13 Nuljuq nail aqmaol maq meeq nail phaq nl dai, oeqbal bhai thaq av bhiq. Nuljuq neq, sil nail lavqkhoel nee jel-ail khi, Miqyail nail haqbhoil doevq nail ngel-i mail, yovqgavq nail aqmaol Miqyail bhai av bhiq yaoq. Nuljuq nail aqmaol bhai covq nail phaq iqsanl mail, tsaq nail daol nail haqbhoil Miqyail aivq nail khen kha-ao khe-ai yuq nia dai, aivq bhai av bhiq yaoq.
14 Khul khi mail dai ngal-aq neq, nuljuq neq, aoldaoq kovqdaoq nail kov-uvq bhai jaol nail maq ngel-ail. Miqyail nail geeqlaoq eeljaol nail kov-uvq bhai jaol nail ngaol. Alheel ngel-i mail, oeqbal nuljuq bhai maq uvthaiq nia yaoq-aol.
Tsaq nail daol nail kov-uvq bhai yaqkav jiovq nail ganl
15 Thailhai phal-iq neq, khalhai khi heeq. Aoldaoq Kovqdaoq nail kov-uvq bhai maq jaol dai, geeqlaoq eeljaol nail kov-uvq bhai jaol nail ngel-i mail, ngadao oeqbal gaoq nl nail laiq. Teevq peivq-ail maq nl-ail dei-eiq.
16 Nuljuq tsaol-aq teevq gaq nail daoq naldaiq khi, “Ngal naoq nail yaqkav jiovq naol” dai, ge khi yovqgavq nail aqmaol av bhiq gaq haq neq, nuljuq tsaol-aq al gaq nail yaqkav maldil ya jiovq nail ngaol dai, maq heeq kivq-ail laiq. Oeqbal nail yaqkav jiovq haq neq, ya sil nail ngaol. Miqyail nail daoq naldaiq khi hav bhoel haq neq, tsaq nail daol nail tsaol-aq pevq lal nail ngaol.
17 Thailhai ngaol-aoq, Miqyail bhai tsiqeeq yaoq. Khul khi mail dai ngal-aq neq, jel lal-u phao nuljuq oeqbal nail yaqkav jiovq daiq khi ngaol-aoq, niil aq-il neq, Miqyail-i mail cavq lavq cov lavq-a nail daoq neema lavqkhoel bhai kev dai, nuljuq hav bhoel khi tsaothe-a nail ngaol.
18 Nuljuq neq, oeqbal nail lavqkhoel nee jel-ail khi, tsaq nail daol nail phaq nail yaqkav pevq lal-a nail ngaol.
19 Ngal niailhai ge nail neq, nuljuq gov heeq nia dai, yaoq n yaoq n nee yuq nail daoq nee ge nail ngaol. Jel lal-u phao, nuljuq nail aqmaol neq, haqeiv nail phaq nl dai, aqjiivq aqcavq khi mail maq meeq nail phaq nail yaqkav jiovq dai, av bhiq-a nail ngaol. Alhai dul dai, niil aq-il nuljuq meeq lal haol lal khi, tsaq nail daol nail phaq nail yaqkav jiovq kivq dai, nuljuq nail aqmaol Miqyail bhai av bhiq yaoq.
20 Nuljuq oeqbal nail yaqkav jiovq-u phao, tsaq nail daol nail phaq nail kov-uvq bhai maq jaol-al.
21 Nuljuq oeqbal alhai nl-u phao, khul nail ganl tsoiq nail-aiq. Oeqbal nl-a nail ngel-i mail, niil aq-il ya haqsil-ail teevq-eel ngaol. Al nail haoqnao naosaq neq, ya sil nail ngaol.
22 Thailhai ngaol-aoq, niil aq-il nuljuq oeqbal nail lavqkhoel nee jel-ail khi, Miqyail nail yaqkav pevq lal-a nail ngel-i mail, nuljuq meeq nail haol nail phaq ya-a nail ngaol. Al nail haoqnao naosaq neq, nqmaq maqluv halyeel doevq nail phaq ya nail ngaol.
23 Oeqbal nail aqphoiq neq, ya sil nail ngaol. Thailhai ngaol-aoq, Miqyail-i mail ngadao bhai aqnieivq-ail bivq lavq-a nail kovpavq neq, ngadao nail Heeqphaq Yeiqsul Khali bhaqda nee, nqmaq maqluv halyeel ya doevq nail ngaol.