5
Pegkegchau takatak idaikujum Apajuí umigkatajum tusa Israel aents aidau chichagkamu
1 Israel aents aidauwah,
ishamain nagkaemaktin asamtai,
wi wake besemag dekapeakun kantamag nunú antuktajum.
2 Israel aents aidau imanji,
pegkeg wajaknuwe nunú nantakchatnun iyaajaje,
nunikag nantamainchau wajasag batsatui.
Ditan inanmainuk atsawai.
3 Tuke Pujuu Israel aents aidaun chichajak:
“Makichik yaaktanmaya
mil suntag maaniamunum ishiakbauk,
ayatak cien suntajak iwaku wakitkittawai.
Tuja cien suntag ishiakbauk,
ayatak diez suntag iwaku wakitkittawai”, tawai.
4 Tuke Pujuu Israel aents aidaun nuigtu chichajak:
“Iwaku pujustag takugmek, mina umigtuktajum.
5 Dakumkamu aidau ememattasajum Betelnum wetin aigpajum.
Nunú nuniakjumek ijina utsam atatjume.
Tuja Bershebanmakesh wetin aigpajum,
nuniachkugmesh Guilgala nunigkesh nagkaemaktin aigpajum,
wagki nuwiya aents aidaunak ashí achijag yajuakagtinai.
Tuja Betelak tsaikam uwejush wajas asatnai.
6 Tuke Pujuu umigkatajum,
nuniakjum iwaku pujustatjume,
atum nii umigtsugminig, Israel aents aidau
kanakag ijunjajua nuna ijinattawai.
Betelnum dakumka najanamu apajuímtai aina nunak ekemaktatui,
dutikamtaig makichkish ikagnakchagtatui.
7 Aents ujudauch aidau waitkam batsata nunú
shiig anentsajum kuitamchau,
nuigtush aents ayamke atsaujai
betek waitkau aidautigminak wait anentajime.
Wagki atumek pegkeja nunú pegkegchau anentagme.
8-9 “Apajuíyai yaya aidaun, nayaimpijai najadau,
tsaaptinnash suwe emau,
suwenash tsaaptin emau,
yuminash yutumtikau.
Apajuík yaakat peejamu aidaunash tsainai,
tuja nunú tsaikbaunmayanak jega múun aidaun kaya ekenag jegamak uminai.
¡Tuke Pujuu ashí senchigtin tutaya nunuwai niina daajig!
10 Aents shiig takantsati tusa chichamjaun
waitjutsuk dekasken chichaujai kajeja nunak wait anentajai.
11 Wagki ditak ujudauch aidaun tepejuk batsamtusag,
diwijum akikmakta tusag trigo atantuinawai.
Nunin asag, jega pegkeg aidaun
dita jegamjajua nuwig pujuschagtatui.
Tuja nuigtush dita uva ajakbaujiya nuwiyan
vino najanawajag shiig aneasag uwagchagtatui.
12 Dita aidau shiig kuashat pegkegchaun takamaina nunak
wika shiig dekajai.
Tuja apu chichama epegkin aidau aents pegkegchau aidaun yayaak,
tikich aents utugchatji atsujunak suwimkan suwina
nunak shiig dekajai.
Nuadui chicham ataik, wiakuch aidau
ujudauch aidaunak tuke depetuinawai.
13 Nuadui kuashat pegkegchau takamu ayau asamtai,
aents yacha duka takamtak pujawai.
14 “Pegkegchau takat aina duka idaikujum,
pegkeg takat aina nunú takastajum,
nunú nuniakjum dukap tsawan pujustatjume.
Nuniagmin Tuke Pujuu, ashí senchigtina nunú
inak yaimpawai tajum nunú dekaskenum atumnak tuke yaimpaktatui.
15 ¡Pegkegchauwa duka dakitjatajum!
¡Pegkeja nunú waketajum!
Apu chichama epegkin aidautigmek,
shiig betek chicham iwajatasajum anentaimtajum.
Nuniagminig Tuke Pujuu, Apajuí ashí senchigtina nunú
Israel aents aidau ujumak iwaku batsata nunash
wait anenjachajaintash.”
16-17 Tuke Pujuu ashí senchigtina nunú chichaak:
“Wi atumin suwimka amastasan minitaik,
ashí yantamnum buutiagtinai.
Jinta aidaunum buutuidau,
yutai ijumja sujutai aidaunum buutuidau,
ashí plaza aidaunum buutuidau,
uva ajakmakbau aidaunum buutuidau,
aja aidaunum buutuidau,
jakamunum buutuidaushkam agtatui”,
tawai Tuke Pujuu.
18 ¡Tuke Pujuu tattawai tusajum shiig aneautigminak
wait anentajime!
Atumek waji utugchatak nagkaetamkiti nunú
dekachu asajum tuu yujagme.
¡Tuke Pujuu minamuk, tsaaptinuk achattawai,
suwe ishamain atatui!
19 Nunú tsawantinig makichik aents
león aintam tupika wekama, chayujai igkuniak
wajuk anentaimainaita iman atatui.
Nuniachkush jegá waya tanishnum atumkama,
nuwi dapi tepau esaim anentaimaina iman atatui.
20 Duka dekaske, Tuke Pujuu minamuk
tsaaptinuk achattawai, suwe atatui;
¡nunú tsawantinig shiig aneamuk achattawai,
ayatak wake besemag atinai!
21 ¡Jiistamtai ati tusa tsawan etegjamu aina
nunú umiaji tusajum jiistamjum nunak shiig dakitajai!
Tuja Apajuí emematji tusajum ijunjajum
shiig aneajum nunashkam shiig dakitajai.
22 Apajuí tudaun tsagkugtamjati tusajum
kuntin maajum nuna neje ashí apeajum
nunak wika dakitajai.
Tuja agkan pujutan amastí tusagmeshkam,
kuntin aidau, ajak juukbau aidaujai
anentag kuashat ikaunmagme,
tujash wika nunú diitnak dakitajai.
23 ¡Juwi wainka kantama batsamtsuk,
yaja shiyakjum kantamatajum!
¡Atum arpa awatjum nunú antutnak dakitajai!
24 Aan batsamtsuk dekas
wi shiig kuitamkagtinaitag nunisjumek,
atumshakam tikich aidau shiig kuitamkatajum.
¡Atum shiig takamua duka namak kuyua
megkaechauwa nujai betek ati!
25 “Israel aents aidauwah, atum cuarenta mijan uwegshunum yujasuitjum nuaduik, anentag aidauk minak sujuschauwaitjume.
26 Atumek Sicut atum dakumka najanamu wainka apajuímtai atum apu tajum nunú yanasa yujayugme. Nuigtushkam Quiliún atum dakumka najanamu yaya nunin aajakua nunú yanasa yujayugme.
27 Nuadui aents tikich nugkanmaya Siria nugkan nagkaiki batsamin aidau achija yajuaktinme tusan idaisattajime”, tawai Tuke Pujuu, Apajuí ashí senchigtina nunú.