6
Apajuí Israel aents aidaun suwimak susamu
Amós chichaak:
¡Jerusalégnumia aidau sapigmatsuk
puyatkas batsata nunak wait anentuinajai!
Yaakat Samaria eme anentautigminak wait anentajime.
Juju nugka múunta nuwi apu aidautijum
puyattsuk batsatutigminak wait anentajime.
Yaakat Calné wejum diistajum,
tuja nuwi juwakjum yaakat Hamat shiig múunta nuwi wetajum,
nunikjum nuwi nagkaemakjum filisteo aidaun yaaktaji Gat wetajum,
nunika jegajum nunú yaakat aidaunash itugkajamkiyi nunú diistajum.
Atumek dita nagkaesau ainatsjume,
tuja atumi nugkega dushakam dita nugken nagkaesauchui.
Atumek suwimak jukig tusajum dakitajume,
nuniayatkujum ayatak suwimak akumtagme.
Atumek wainka batsamsajum pegak shiig pegkeg
marfil najanamu aidaunum kaji batsatjume,
nuniakjum kuntin pegkeg duwejam aidau yuu batsatjume.
Atumek arpa wainka awatkujum kantamainchau wainka kantamjume,
tuja kantamku awattai aidau tusajum wainka najanjume,
nuniakjum David yacha aajakua iman anenmamjume.
Atumek tsapa muunnum vino umakjum
shiig senchi nampeagme,
tuja dekas kugkuin pegkeg akik aina ibau nijamjume.
¡Nuniau asajum atumi yatsum aidau waituina duka pachiatsjume!
Nunin ainajum duwi, aents aidaun achija yajumainakug
atumna etegtamawag jujamkiagtinai,
dutijamawagmatai atum shiig jiistama batsatjum duka
wainka juwaktatjume.
 
Tuke Pujuu Apajuí ashí senchigtina nunú pan antumainun chichaak:
“¡Jacob wegantu aidauk jega muuntan
jegamag batsamas ememaidau asagmatai kajejajai!
Nuadui dita yaaktaji aidaunak shiwag aidau tsaigkatnume
tusan idaisattajai.
 
“Dutika ai makichik jeganum diez aents iwaku pujauk ashí ijinam agtatui. 10 Nunú aents jinau aidaun patayi aidau dita iyashin jukiag apeawagtatus kaunawag yujattaman, tikich nuna patayi aidau nuwi yujau ditan iniinak: ‘¿Tikichish atsuak?’ tusa tama: ‘Atsa, makichkish atsawai’, tiagtinai, nuna tusa: ‘¡Takamtak wajasta!’ tiagtinai. Wagki nuna inima yujas mina daajun adaikug nuni senchi suwimkan jumain asagmatai. 11 Wagki Tuke Pujuuk Israel aents aidaun suwimkan suwak, jega múun aidaun jega piipich aidaujai ashí tsaiktatui.
 
12 “Atumesh anentaimsakjuah,
¿caballosh kayanmash tupikaumainkait?
Tuja ¿kayanmash pukujaish ajakmamainkait?
Tujash atumek shiig takata duka jata awajsaugme,
dutikakjum shiig aneasa pujuta dushakam
wake besemag awajsaugme.
13 Atumek yaakat piipich aidau depetkajum
ememasa chichaakjum:
‘Iina senchijin depetkaji’, tusajum shiig aneajume.
14 Nuniau asagmin, Tuke Pujuu Apajuí, ashí senchigtina nunú chichagtamak:
Shiwag aidau Hamatnum nagkamas jetepakag,
uwejush tsumujin awa aatus ashí depetamak
dita wagagtamkiag waitkagmastinme tusan idaisattajime”,
tujama nunú Israel aents aidautijum shiig antuktajum,
tiuwai Amós.