14
1 “Aents nuwanum akiinauwa
nuna pujutjig ujumke,
untsu waitiamuji ima múuntai.
2 Aentsu pujutjig yagkug kashikmas
pegkegchin yagkujuk ajum kagaja
megkagama numamtinai,
nuigtushkam aentsu pujutjig etsa
bikian wamak megkagama numamtinai.
3 Wika wainkauchitag nuniaigkiap
mina utugchatug diigtusam,
suwimak sujustasam chicham umigtame.
4 Pegkegchauwa duka pegkejak wemaitsui,
nuna dutikmainuk makichkish atsawai.
5 Aents aidaush wajupa tsawantak
juju nugka juwish batsamsagtinaita
duka ame dekame,
tuja ii jakatnuk tsawantak mamikiamui,
nunú inagkeakik pujumaitsuji.
6 Nuadui idaikagtusta diijattsuk,
idaikagtusta agkan pujusagmi.
¡Idaikagtusta takasa jukimui ii atsumamua nunú sumakagmi!
7 “Aents numin ajakag
nuna wajauti jeeka tsapai
muumpagti tusa dakauwai.
8 Tuja numi múun wajasa
kagkapeen kukaja jakattak wajaush,
9 yumi juki ukatjamak ataktu uchimea
yama nagkamchaku ajak ajaamu tsapai,
pegkeg samekbaun
muumpama iman weawai.
10 Tujash aents aidautik wamak jaji,
nunika jaka tuke megkaeji.
11 “Tuja aents aidautik kucha aidau,
entsa aidau, kuyuka buku waiyama
numamtuk ainaji.
12 Nuadui nayaim eke aigkik aents jakamtai,
ukusbau aidauk ataktuk nantamainchau ainawai.
Aents jakauwa duka tuke kanajujai betekai.
13 “¡Apajuíyah, ame kajekbaujum
nagkaetamai dekas jakatjai,
nunikan aents jinau aidau
batsatbaunum pujustajai
tumain anentaimjai!
¡Nuwi pujai ame wait anenjujam
ataktu inantukminum tusan!
14 Aents jakauwa duka
ataktu anean nantakig pujumaitsui,
wika aents jakau aidau batsatbaunum
dakamkun pujuttajai,
wait anenjug ayamtijugti tusan.
15 Ame mina najatuaum
wait anenmain diigsam untsugkuminig,
wika aminak aimainaitjame.
16 Ame mina kuitamjukta tau asam,
wi takamug aidauk ashí wainme.
Nuadui wi pegkegchaun takasmataish,
tudau takasume tusamek tujutchattame.
17 Duka tujuttsuk ame minak tsagkugtujam
mina tudaujuk wampachnum egkea jukim
shiig atushat ajapmainaitme.
18 Dutikmain aminig
ayatak muja aidau,
buchig aidaujai yumpunawag
amugama nuniaji.
19 “Ashí aents aidauk iwaku
batsamsagtatus wakegainawai,
tujash ame duka yumi kayan
taumama numamtuk awagme.
Dutikakum yumi yutak
nugka yukukuntun tajaka,
ajapama numamtuk
aentsu pujutjig ajapeame.
20 Dutikam tuke emegkame,
pujutchakam atankagtame,
dutikam ukumatainum ekagtame.
21 Aents jakauwa duka,
aents iwaku aidaush
dita uchiji aishmag aidau,
nawanji aidaujai takatjin diigsash,
shiijash awagmaina nunak dekatsui,
tuja pegkegchaun takagtaish,
itujenawaki nunashkam dekatsui.
22 Ima nii iyashin
najaimamunak dekapeawai,
nuniak buutui”, tusa Job tiuwai.