5
“¡Senchi untsumkata Jopah!
¡Makichik aentskesh aipakchatpash,
nunú antukmi!
Ame yainkati tusa
segamainuk ángelak atsawai.
Aents pegkegchauwa duka,
Apajuíjai shiwagmagau asa jawai,
aents shiig anentaimkachunak,
kajegkagtutaijiya nunú maawai.
Wi wainjai aents pegkegchau aidau,
kuashat wajiigtin wedaun,
tujash machik asag
wamak niina jeen atantuinawai.
Niina uchiji aidaun, nawanji aidaun,
kuitamjumainuk atsawai.
Apu chichama epegkin aidaush
tuke aneas waitkainawai,
ditá ayamjumainuk atsawai.
Ajakmamujinash kuitamjuinatsui,
nuadui aents nujantai jinuidau nuna yujuinawai,
dutikainak jagkinmayanash
akuumtuk yujajus yajutuinawai.
Tuja wajiji aidaun diigsag,
imanun jukitag tinu aidau
kasajuk yajutuinawai.
Wake besemag dekapeamua duka
ajakjai betekak nugkayag tsapatsui.
Tuja waitiamua dushakam
nugkanmayag tsapatsui.
Jii kegaunmaya kaiji
tsachigtuk shimuwama
numamtuk aentsuk
waittsatatus akiinainawai.
 
“Wika ametkunuk
Apajuí yainkati tusan segamainaitjai,
tuja wi waitiamua nunak
Apajuín idaitumainaitjai.
¡Apajuí iwainawai kuashat waji wainchatai ishamain aidaun,
tuja nunash wajuk dutikawaki nuna
dekaa ejemainuk makichkish atsawai!
10 Apajuí yuminak nugká yutumtikawai,
nunú yumi yutak ajak aidaun ukatui.
11 Apajuík aents kakagchauch aidaun
eme anentai emawai.
Tuja aents patayi jajukam
wake besemag pujaunashkam
anentain ichishtawai.
12 Aents pegkegchaun dutikatasa
anentaimas umiaunash Apajuí yapagtinai.
Dutika yapagtuam wainak nagkaanui.
13 Aents niina yachajin pegkegchaun
dutikatatus umiaunash
nii umiamujinig pempegki ajua emegkainai,
dutikak nii anentaimtugbaun yapagtuam wainak nagkanui.
14 Tikichin pegkegchaun
takamtiksatatus yuja duka,
kashi numi tukumka iyaumaina
numamtuk wajainawai.
Tsawai aentsun tsanuina dushakam,
wainmachujai betek ainawai.
15 Untsu Apajuík aents kakaakchau
niina shiwaaji waitkam pujaunash,
nii ayamjuk uwemtikawai.
16 Tuja aents kakaakchau aina duka,
Apajuí ayamjutuk
uwemtijugti tusa dakainawai.
Apajuík aents pegkegchau aina nunú,
tikich aents kakaakchau aina nuna,
kuntin yutaijin, yuwa amuwama
numamtuk amukti tusag idaitsui.
 
17 “Nuadui aminak Apajuí
suwimkan amasmatai waitiau asam,
¡amek shiig aneasta!
Apajuí ashí senchigtina nunú
jintinjamak aikagma nunú dakitjaipa.
18 Tuja nii jata amasmatai jam nunashkam,
nigki etsaentamjattawai.
Tuja nii waittsati tujamatai
waitiaminchakam, nigki yaimpaktatui.
19 Ame ishamainnum pujutaish,
nigka kuashta aminak
agkanmitkagmattawai.
Tuja pegkegchauwa nunú
waitkasti tusag idaitamsashtatui.
20 Nujan tepeamtaish
nujantai jakai tusa yaimpaktatui,
tuja maaniamunmash
nii ayamjutpaktatui mantamawainum tusa.
21 Amina pegkegchaun
chichagtamainakuish ishamkagtukaipa,
duka makichkish uminkashtatui,
wagki aminak Apajuí kuitamjamui.
22 Nujantaikish, nuniachkumesh
senchi waitiakmesh,
amek duka dushiksam diitnaitme.
Tuja kuntin ikamia kajen aina dushakam ishamkashtinaitme.
23 Ame ajagminig utugchat atsaunum
agkan shiig takastatme,
wagki ajagminig kaya awatmainkesh
atsau pegkeg atinai.
Tuja kuntin kajen ikamia aina duka
makichkish jetepakchagtinai,
duka ayatak amina kumpajum agtatui.
24 Nuadui amina jeminig
utugchat atsau pujustinaitme,
tuja amina tagkujum aidauk
makichkish megkaekashtinai.
25 Tuja amina uchijum
wegantu aidauk shiig kuashat dupa ikam ayá iman agtinai.
26 Trigo ajakbau tsawanji jegamtai,
pegkejan tsamaka uminas aama
numamtuk amek múuntuch wajasam
jatanum jegamesh
senchigtin, pegkeg pujutnaitme.
27 Kuashat mijan pujau asan,
utugchat nagkaetujua
nunak shiig dekajai.
Nuadui atak nagkaemagtinun tajam
nunak dekaskenum tajai.
Nijah, juju wi tajam nunú
dekaskeapi takumek dekapsata”,
tusa Elifaz Jopan tiuwai.
Elifaz, Bildad, Sofar, aatus Jopan ausajui. Dutikam Job inagnak ditan ayaak aatus tiuwai: