4
Elifaz Jopan ayaak chichakbau
1 Job chichaka inagnakmatai, Elifaz yama nagkamchak Jopan ayaak aatus tiuwai:
2 “Makichik aentskesh aujtamsatag takuig,
kajegmainaitme.
Tujash chichatskek idaimainchau dekapeajai.
3 Wika ame tikich aents aidau
jintintin aayum nunak dekajai.
Tuja aents kakaakchau aidaush
anentai ichichtin aayume.
4 Aents wake besemag pujaush
ame niina anentai ichichtuyume.
Tuja aents jakatag taushkam
ame jakai tusam yaiyume.
5 Amek sapigmamaitsume,
tuja yamai waitiam dushakam ishamaitsume.
6 “Amek Apajuík tuké shiig umignaitme,
amek aents pujutji shiig pegkejaitme.
Imanmesh ¿wagka Apajuíyaish dekaskeapi tumaitsume?
7 Aents pegkeja takaun,
Apajuí kajejuk mauwai tabaush
antukuashitam, nunú anentaimsa diista.
8 Kuashat mijan pujau asan,
utugchatan wainka weakun dekajai,
aents magkagtak pegkegchaun takauk,
dutiksaik iikuam auwai.
Wagki duka aents nii ajakmamujinia
nejekun juuwama numamtinai.
9 Dita pegkegchaun takaidau asamtai,
Apajuí kajejuk dasejai betek umpui ijinui.
10 Aents pegkegchau aidauk
ikamyawajai betek,
kajeak senchi shinak
tikich aentsun maatag tutaish,
Apajuí nunak ikamyawa nai kupijam itatama
numamtuk itatmitkaktatui.
11 León nii yuwatnujin
wainkacha jamaina numamtuk,
nunú aents aidauk jakagtatui.
Nunikagmatai dita uchiji aidauk
pampagkag megkaejagtinai.
12 “Tikichish antuinatsaig
takamtak chicham tajutuae,
nuna takatkamat
shiig pegkejan antukjai.
13 Aents aidau kashi
kaja achiam kanuinai,
wika kanumainchau dekapjamjai.
14 Sapigmamu achigkame,
mina iyashjuk ashí kujaime.
15 Mina yapijui dase
umpuntun dekapjamjai,
dutijakui iyashjui anchiajua nunin dekapmajai.
16 Makichik aents nuwi wajame.
Nuna wi wainkamjai.
Tujash niimesh dekas wajukuki
nunak wainkachmajai;
ashí itatjamunum untsujak,
aatus tujutmae:
17 ‘Aents aidauk ashí jau ainawai.
Apajuík makichik aentsnakesh,
ametme chicham betek umiumek,
tusa tama amainuk shiig atsawai.
Tuja ametme dekas
pegkegchau takamchaumek,
tama amainchakam shiig atsawai.
18 Apajuík niina aentsji ángel aidaunakesh,
tikima shiig kajittsag diyatsui.
Apajuí diismak ditashkam
tikima pegkegmak ainatsui.’
19 Nuadui aents aidauk
ima pegkegnakek takainatsui.
Maki makichik aents aina duka,
nugka jegamkamua numamtin ainawai.
Jega jegamin aidau
nugka yukukuntunum apuja,
jegamaina numamtin ainawai.
Nuadui dase dasentai yumpunak,
nuwi mamuk ayaun
yutua emegkauwama numamtuk emegkam amainai.
20 “Aentsuk kashikmasagkesh,
nuniachkush agkugkesh jaka megkaewai.
Nunikmataish makichkish pachinatsui.
21 Niina pujutig hilo yupichu tsujimaina numamtuk
tsujigkam megkaewai.
Aentsuk ashí unuimajag jatsui”, tiuwai Elifaz.