Tuke Pujuu Jopan aikbau
38
(38.1—42.6)
Job chichaka ashimkamtai Tuke Pujuu aikbau
1 Job chichaka inagnakmatai, dase senchi dasenbaunum Tuke Pujuu Jopan chichajak aatus tiuwai:
2 “¿Amesh ya asamea
mina dekatjua nunú
dekaskechua nunin anentakmesh
pegkegchaush chichame?
3 Diik minash amina
wajiujum iwaintugkakiah,
nunikam wi yamai
iniastatjam nunú aigkata:
4 Amek wi nugka najanauwaitag,
nunú tsawantaik atsuyume,
untsu dekaskenum dekakmek,
wi nugka najadiag duwish ¿amesh tuwi pujuyume? nunú kame tujutta.
5 ¿Yaki nugkanash múun ati tusash tiyabi?
tuja ¿yaki najanawabi?
duka amek dekatsme.
6 ¿Wajinum chichiajaya nugkash awa?
¿Nugka patami asatnunash
ya kayanash apujtuawaita?
7 Kashikmas pegkejan
etsantug jiinama nuniai,
yaya aidau aents ijunag
kantamaina numamtuk kantamiagtai,
ángel aidau nantsemianum
nuaduik amek atsuyume.
8 Tuja nayants nugka
ejapeen jiiniuwa nunú
piyag betsakai tusash
¿ya epetkauwaita?
9 Wi nunak makichik nuwa uchijin jáanchi
pempegama numamtuk,
yujagkim pujui dukukan epetkauwaitjai,
dutikan yujagkim
suwé ijikan idaisauwaitjai.
10 Tuja nayantsak pimu amain aig,
yumi initak jiinaidaun
epenjan idaisauwaitjai.
11 Dutikan chichagkun:
‘Juwig nagkankata, nuigtu
nagkaemakmek piyajaipa;
tuja tsukatbaujum
ishamain waja dushakam
nuigtuk wee pujushtatui’, tiuwaitjai.
12 “Amek tsawan pegkejan etsantug
tsawagti tusamek makichkish inachuitme.
13 Amek nuigtush etsa ashí nugkanum etsanjati,
nunitai aents pegkegchau aidau
suwenum uumjatnume
tusamek inachuitme.
14 Nunú etsa etsantug jiinak
nugkanak jáanch kapantuama iman emawai.
15 Nunitai aents pegkegchau takau aidauk
kashi uumak takamin asag,
nunikchamin dekapenak idayinawai,
wagki tsawai nuniagtaik,
achika suwimak suwam amain asag.
16 ¿Tuja yumish tuwiyag jiinua
nunú wainkatasamesh,
amesh nayantsa initkenish jegamkayum?
17 ¿Amesh aents jakau aidau
batsamtain jegamesh wainkaukaitam?
18 ¿Tuja nugkash wajupa múuntaita
dusha dekamek?
¡Nunú ame dekakmek minash ujatkata!
19 ¿Tuja tsaaptinush
suwejaish tuwi awa?
20 Amek duka dekachu asam
tsaaptinuk emamaitsume,
tuja suweshkam emamaitsume.
21 ¡Nunú aidaun wi najanauwaitag,
nunú tsawantinig eke
akiinchau asam atsuyume!
22 “¡Tuja wisha yujagminash bicha aidaujaish
tuwig ukuaja duka amek waintsume!
23 Nunak maaninamunum
aents pegkegchau aidau suwimak suwaku,
yutumtijatnun ukusan pujugjai.
24 ¿Tuja peem peetish itug weawaki?
duka amek dekatsme.
¿Tuja dasesh etsa
minitaiya nuni dasenkash,
itusaya ashí nugkanash jajutuaki?
duka amek dekatsme.
25 ¿Nugka taimunum
yumi saagama numamtuk
yumin yutumtikna dusha yaita?
tuja ¿yaita aents jintan inaktumaina numamtuk,
ipamat pati wetai jinta inaktinush? duka amek dekatsme.
26 Witjai nuna dutikaunuk,
tuja witjai uwejush aents makichkish atsamunum yutumtikaunuk,
27 wagki nunú yutak nugka tutuptinnash
uchupjati, dutikam chijichig tsapaiti tusan dutikajai.
28 Yumi, nuigtu jegashik aina duka
aents apagtin aina nuninchau ainawai. ¡Witjai nuna najanaunuk!
29 Bicha aidauk, tuja jegashik aidauk
aents dukugtin aina nuninchau ainawai.
¡Witjai nuna najankaunuk!
30 ¡Witjai yuminak bichatin
kaya katsugma iman emaunuk,
tuja nayantsa awankenishkam bichatbikajan katsujam emauwaitjai!
31 “¡Yaya aidau ijumnag ayá duka
ame dutikachuitme!
¡Tuja amechuitme yaya
ijumnaju aidau sutu tutai,
tunim tutai ditash
kanakag aina nunú umikumek!
32 Tuja ¿amekaitam
makichik yaya múun tsawak
etsanjati timawa nunú etsanmitkaum?
Tuja ¿amekaitam yaya ijumnaju aidau
Osa múun tutaya nunú,
Osa yaijuch tutaya nunujai
wantinkatnume tusam iwaidaum?
33 Tuja yaya aidau, nantu aidau,
tikich aidau nayaimpinum ayá dusha ¿wajuk buchitainawaki?
duka amek anentaimsamek ejemaitsume.
¡Nuadui amek nunú aidau etsantug
nugkan tsaaptin ematnume
tusamek tumaitsume!
34 ¿Amesh yumi yujagminmaya
yutak piyagti tusamesh tumainkaitam?
35 ¡Amek chaajip, peem aina duka,
amina inakmejai betek
umigtuktinme tusamek,
tikich yantamnum wetajum
tusamek tumaitsume!
36 ¿Yaita atash ayumpan,
chigki aina nujai tsawantan dekapeak
shinin atinme tusa tiuwa dusha?
37 Wika yachaitag iman asan,
yujagmish wajupa ayawa nunak dekajai.
Tuja witjai yumi yutumtiknunuk.
38 Wi yumi yutumtikag nunak
nugka yukukuntua nunú chupija
achinig katsujam wajasti tusan dutikajai.
39 “¿Amekaitam león aidau
dita uchijin ayuja ututuakti tusam
yutaiji egatka suum?
40 ¡León niina waajin uumak tepes,
nuniachkush dupanum
uumak tepesa, kuntinjin tsekenti
tepejuk maina duka ame dutikatsme!
41 ¡Chuwagka uchiji aidau
yapajainak buutiagtai,
yutaijin mina segatuina
duka amek sumaitsume!”