10
Pastor uwigjijai pachisa augmatbau
1 Nunik Jesús chichaak: “Dekas tajime, uwig pegmatjamu waitijiya nuwi waitsuk yajá waya duka, kasa nuniawai,
2 tujash waitinum wayá duka, pastor uwijá kuitamna nu nuniawai.
3 Nuna waiti kuitamnuk ujatui, nunikmatai uwig aidaushkam nuna chichamen antuinawai; nuniau asamtai makí makichik daajin adaitus untsuawai, dutika jiyawai.
4 Dutika ashí jiijá, ni eemtuk weawai, nunitai uwigshakam saetuinawai wagki niina chichamen antuju asa.
5 Uwijak ni wainchataijinak saetuchu ainawai, ayatak pisag shiminai, wagki chichamen takanchbau antuju asa”, tiuwai.
6 Jesús ju augmatbaun apatuk tiuwa nunak, ditak dekachajui wajintu takua tawa nunak.
Jesusai pastor pegkejak
7 Jesús ataktú chichaak: “Dekas tajime: Witjai uwig aidau waitijinuk.
8 Ashí yaunchuk wi taatsaig kaunawaju aina duka kasa aidau, uwijá yajumin aajakajui; tujash uwig aidauk antugkachajui.
9 Witjai waitinuk, aents minai waidauk uwemjagtin ainawai; nunik uwig wenuken utsanawag jiinag pasto yuwama numamtuk wajagtatui.
10 “Kasak, kasamak kajeg ijina emegkaktatus minawai, tujash wika pujutan jukiag shiig atsumkas batsamsatnume tusan tauwaitjai.
11 Witjai dekas pastor pegkegnuk; pastor pegkejak ni pujutinak uwigji aidaunum tsagkamanmainai;
12 untsu akitaiya duka, pastorchauwai, wagki uwig aina duka niinuchu asamtai, nunin asa ikamyawa minittai wainkug, uwignak ukuak tupikainai; nunikmatai ikamyawashkam uwig aidaunak uwakek ipisiawai.
13 Nunú aentsua duka tupikawai wagki akitai asa, nunin asa uwig aidaunak puyatjatsui.
14 “Witjai pastor pegkegnuk; nunin asan uwig midau aidaunak wainjai, nunisag minash waituinawai.
15 Apag mina waita antsanuk, wishakam Apagnak wainjai, nuniau asan mina pujutjunak uwig aidaunum tsagkamankattajai
16 Nuigtush tikich uwig aidaush ajutuinawai ju pegjamua juiyachu; nunú aidaunashkam yajuakan ikaunmattajai, dutika ai makichkinmag ijunag batsamas mina chichamjun antugtiagtatui, nuigtú pastorchakam makichik atatui.
17 “Nuadui Apajuk anentui, wagki mina uwigjun ayamjakun mantamnan ataktú nantaktin asamtai.
18 Makichkish minak mantumain ainatsui, wika wiki tsagkamankattajai; minak senchig ajutui jakanush ataktú nantamainaitag dushakam. Nunak mina Apag aatus tujutiuwai”.
19 Jesús nu tabaun antukag, judío aidauk ditak tudaiyag, ataktú kanakajui.
20 Kuashat dita aina nuiya chichainak:
—¿Wagka antugjume, Iwanch egkemtuamu asa imaanag tuu wekaga aniaush? tuidau.
21 Tujash tikich chichaidau:
—Makichkish Iwanch egkemtuamuk aajag chichamaitsujama, ¿iwanchish wainmachunash wainmitkamainkaih? tuidau.
Judío aidau Jesusan dakitjagbau
22 Tsetsek tepeau ai, Jerusalén fiestamaidau jega Apajuí ememattai jegamkamua nunú tsawan jegau asamtai.
23 Tuja Jesusak jega Apajuí ememattainum Salomón waiti aagjamunmanini wekagu.
24 Nuniaun judío aidau tenteawag, iniinak:
—¿Wajutiya shiig dekamainush tukagtittame? Ame dekas Cristuitkumek shiig ujajatkakia, tuidau.
25 Tiagtai Jesús ayaak:
—Wika atumnak timajime, tujash dekaskeapi tujuttsugme. Mina Apag dutikata tibaun takaakun paan atumnash iwaintajim nuuwai mina etsegtuja duka;
26 tujash atumek dekaskeapi tujuttsugme, wagki mina uwigjuchu asajum.
27 Mina uwig aidauk mina chichamjun antugtuinawai, wishakam ditanak wainjai, nunú aidau minak saetujuinawai.
28 Wi ditanak pujut tuke atina nunak suwajai, dutikamu asag tuke waittsashtin ainawai. Mina uwejuiyanak makichkish atanjumainchau ainawai.
29 Mina Apag ashí nagkaekagtasua nu minak sujusui. Nunin asamtai Apajú uwejinianak makichkish atanmainchau ainawai.
30 Wika mina Apagjaig makichkitji, tiuwai.
31 Tutai judío aidau ataktushkam kayá jukiag tukutá tuidau.
32 Dutikam Jesús chichaak:
—Wi mina Apagdaun kuashat pegkejan takasan iwaintukmajim duish, ¿tu dutikamunma kayaish tukugta tajume? tau.
33 Tama judío aidau aiinak:
—Pegkeg takasbaunum tukumí tatsujame, amek aentsuitkum Apajuí pegkegchau chichagkum, Apajuiya iman anenmamam dui kayai tukumí taji.
34 Tiagtai Jesús chichaak:
—Atum chicham umiktina nuwi agagbaunum: ¿Wi, atumek Apajuí ainagme tijai tatsuak?
35 Agagbaunum tawa duka dekainaji, nuninchauwai tumaitsui; Apajuik ni chichamen aents aidaun awetiuwa nuig apajuí ainagme tiuwai.
36 Apajuí mina etegtua ju nugka jui awetimtai tau asan: —Wika Apajuí Uchijiyaitjai takuish, wajuk anentaimsagmea Apajuí pegkegchau chichajui tujutjume
37 Wi mina Apag wakega dutiksanuk takaachkuig, dekaskeapi tujutigpa.
38 Mina dekaskeapi tujutchakjumesh, wi takaag nu diisjum dekaskeapi titajum, nuniakjum minai Apag ai, wi Apajuí aja dushakam dekaatajum.
39 Tutai ataktú achikag jukiagta tuidau, imatikainam Jesusak jiinki weuwai.
40 Nunik Jesús wakitki Jordagka amain weuwai, yaunchuk Juan yamijatujakbauwa nui, jegaa pujusui.
41 Kuashat aents jegajuawag:
—Juagkak dekaskenmag aents dutikmainchaunak iwainakag takaschauwai; tujash Juan ju aentsun pachis ashí tiuwa duka dekaske, tuidau.
42 Nuninak kuashat aents nui batsatuk Jesusnak dekaskeapi tiaju.