9
Aents wainmachu akiinaun Jesús etsagagbau
1 Jesús nuiya jiinki wekamá, aents tuke wainmachu akiinaun wainkauwai.
2 Nunikmatai jintintaiji aidau iniinak:
—Maestroh, ¿wagka jusha wainmachush akiinauwaita? ¿Apají nuniachkush dukují tudaujiniash ankauwait atsa niina tudaujinigkiash aanin akiinauwait? tuidau.
3 Tiagtai Jesús ayaak:
—Juka niina tudaujin nuniachkush apají, dukují tudaujinkish ankachui; Ju junin akiinauwa juka, Apajuí ni senchijin iwainaktatus wakegau asamtai aanin akiinauwai.
4 Eke tsawaiya juik, mina awetiu dutikata tujutbauwa nunak takastatjai; kashi wajasmataig, makichkish takamainchau agtatui.
5 Nugkaa pujag juikik, nugká tsaaptinjiyaitjai, tiuwai.
6 Nuna tusa, Jesús nugkaa usukmá, niina sawinjin nugkan bikamkatu ema juki, wainmachu jiin anutukui.
7 Dutika chichajak:
—Yumi ipiagbau Siloé tutaya awi weme nijamita, tiuwai. (“Siloé” tawa nunak, “Awemamu” taku tawai.)
Tima wainmachushkam wee nijamajui, nunik wainmak wakitkiuwai.
8 Nunikmatai wainmachujai ijutkau batsamin aidau nuigtú yaunchuk segamá ekeemnun wainin aidau chichainak:
—¿Juchaukaih ekeemas segamá ekeemnuwe nunú? tuidau.
9 Tiagtai ujumak chichainak:
—Ehé, niiyai, tuinai; tikich chichainak: —Atsa, auchui, nujai betekmamtinai, tiajui.
Tiagtai ni chichaak:
—Witjai, tau.
10 Tutai:
—¿Tujash wajukamea wainmakume? tusag inidau.
11 Tiagtai ni ayaak:
—Makichik aents Jesús daagtina nu, nugkan bikamkatu ema jiijui anutujuk, weme “yumi ipiagbau Siloé tutaya nuwi nijamita”, timatai wenu, nijamin wainmakmajai, tau.
12 Tutai:
—¿Dusha tuwí pujawa?
Tama:
—Achah, tiuwai.
Fariseo aidau wainmachu tsagajun iniasagbau
13 Nunú wainmachu aajakua nuna jukiag fariseo batsatbaunum ejegawajui.
14 Jesús nugkan bikamkatu ema wainmachun wainmitkakua nunak tsawan ayamtai aig dutikau asamtai,
15 fariseo aidau awentsag iniasajui: ¿Wajukamea wainmakume? tusag, tama ni chichaak: —Nugkan bikamkatu ema jiijui adutugkamtai nijamin, yamaik wainmajai, tau.
16 Tutai ujumak fariseo aidau chichainak:
—Nuna dutijama duka Apajuí awemamuk amaitsui, wagki tsawan ayamtaiya nunak ajantus diyatsui, tuidau.
Tiagtai tikich aidau chichainak:
—¿Utugsaya aents tudaugtinush aents dutikmainchaunash iwainamainata?
Tusag ditak kanajajui.
17 Nunikag awaksag wainmachu aajakua nuna iniinak:
—Amesh, amina etsaentamja dusha ¿yayai tame?
Tama: —Duka profetayai, tiuwai.
18 Tujash judío aidauk wainmachu aajakua nuuwap yamai wainmawa tusag dekaskeapi tumainchau dekapedau, nuninak apajin dukujijai untsukajui,
19 dutika iniinak: —¿Jukaih atumi uchijum wainmachu akiinauwai tuina nunú? ¿Utugsaya yamaish wainmawa? tuidau.
20 Tiagtai nuna apají dukujijai chichainak:
—Ju iina uchijí wainmachu akiinauwa duka dekaji,
21 tujash dekatsji wajuk wainmake duka, nuigtushkam yaki wainmitkakmae dusha dekatsji. Nigka muuntai, nigki iniastajum, ni tujamtatui, tiuwai.
22 Nuna, apají dukujijai tiajua nunak, judío aidau, makichkikesh Jesusak Cristui takuig, iina ijuntaijinig jiikmí tusag chichaman umikaju asagmatai ishamainak tiajui.
23 Nuniau asamtai wainmachu apajig dukujijai:
—Nigki iniastajum, nigka muuntai, tiajui.
24 Nuna timatai judío aidau wainmachu aajakun ataktú untsuká itan chichajak:
—Apajuí eemtin dekaskenum tukagtita. Jutiik dekainaji nu aentsua duka tudaugtinai.
25 Tiagtai ni ayaak:
—Tudaugtinashit, dekatsjai. Makichik wajiya nunak dekajai, wainmachu aajakuitkun, yamai wainmag juna, tiuwai.
26 Tutai ataktú iniinak:
—¿Utugtamkame? ¿Utugkaya niimtijamne? tuidau.
27 Tusá iniam: Timajimjamah, tujash antugtatsjume, ¿Wagka awagki tití tusagmesh wakegagme? ¿Atumesh ni nemagkatasajum wakegau asagmek tajum? tiuwai.
28 Tutai pegkegchau chichajuinak:
—Ameakitme nu aentsú jintintaimek, tujash jutiik Moisesa jintintai ainaji.
29 Apajuí Moisesan aujujakua duka dekainaji; tujash au aentsuk tuwiyagkita dusha dekantsui, tiaju.
30 Tama ni chichaak: —Nuuwajamah kamé anentai jegagmainchau, mina wainmitkajiu, atum dekatsji tuwiyaskai tajum nu.
31 Dekainaji Apajuik tudaugtin aidaunak antugtsu nu, tujash Apajuin puyatjus umijuinak, ni wakegamujin takaa nuna antujui.
32 Nagkamtinish antukchamui makichik aentskesh, aents wainmachu akiinaun wainmitkakui tabauk.
33 Au, Apajuí awemam taachuitkug, makichkish aikmaitsui, tau.
34 Tutai dita aiinak:
—Ame akiinkumesh ayatak tudauk akiinauwaitkumek, ¿jutii jintinkagtam? tusag jega ijuntainmayan jiikiajui.
35 Jesús antuku jiikiaje tabaun, nuniau asa wekamá wainak chichajak: —¿Amesh Aentsmaga akiinauwa dusha dekaskeapi tamek? tiuwai.
36 Tama ni ayaak:
—Apuh dusha yaita, wisha niiní dekaskeapi titajai, tau.
37 Tutai Jesús ayaak:
—Amek duka wainme, wi amijai chichag juuwaitjai, tau.
38 Tutai ni ayaak:
—Apuh, dekaskeapi tajai. Tusa tikishmag emematiuwai.
39 Tutai Jesús ayaak:
—Wika ju nugka juig tauwaitjai aents aidau etejatasan, wainmachu aidau wainmaktinme, nunitai wainbau aina nu wainmachu waigtinme tusan.
40 Tutai ujumak fariseo aidau ditajai ijunu, nuna antukag, iniinak:
—¿Jutiish wainmachuk ainag? tuidau.
41 Tiagtai Jesús ayaak:
—Atum wainmachu ainakjumek atumin tudaugminish bakumamainuk atsugtamainai; tujash atum wainbau ainaji tajum dui, tudaugmik ajutjamainawai, tiuwai.