21
Jesús Jerusalén wayamu
(Mr. 11.1-11; Lc. 19.28-40; Jn. 12.12-19)
1 Jerusalén tikiju wajasag Betfagé jegawaju Olivosan mujají awa nui, nunik Jesús ni jintintaijin jimajan awemauwai,
2 dutikak:
—Wetajum au yaakat yaijuch awa awi, nunikjum wainkattagme makichik burra jigkam uchijijai wajau. Nunú atia jukijum itagtuatajum.
3 Nu dutikagmin makichik aentskesh wajinjutpatig, takuish: Apu atsumawai, wamak awagtugmaktatui, tusajum ukuktajum, tiuwai.
4 Jujú junikua duka profeta tibauwa nu uminkauwai, duka:
5 “Yaakat Jerusalén batsamin aina nu titajum:
‘Diistá amina Reyjum minitjamui, imanchauch wajasá,
burronum ekemi, burro tsakat, kuntin kijin takamtiktaiya nuna uchijin’ ”, tawai.
6 Tiajam jintintaiji aidaushkam wegag Jesús tibaunak imatiksag umikaju.
7 Dutikawag burran uchijijai itantag, jaanchji aidaun tuntupen aitkagmatai, Jesús ekebiuwai.
8 Kuashat aents asag, jinta Jesús weamunum jaanchji aidaun aiinak emainai, tikich aidauk dukan tsupig jintá ainag emaidaush aidau.
9 Imatikainak aents eemak weedau, ukunum minidaushkam untsumkag:
—¡Shiig anentsagmi Apu David weantunum akiinauwa nunú! ¡Apu Apajuí awemam miná duka pegkegmai! ¡Apajuishkam emematiagmi! wajaidau.
10 Nunik Jesús Jerusalén wayamtai ashí aents aidauk pampaidau, nuninak:
—¿Jusha yaita? tusag inimaidau.
11 Tiagtai:
—Juka profeta Jesusai, Nazaret, Galilea awa nuiyayai, tuidau.
Jega Apajuí ememattainum aents batsatun Jesús jiigbau
(Mr. 11.15-19; Lc. 19.45-48; Jn. 2.13-22)
12 Jesús jega Apajuí ememattainum wayau, nunik nui sujak batsatun sumau aidaujai ashí agaa jiijú, dutikak kuichki yapajiin aidau mesajinashkam shitaki akaketuk, paumá sujin aidau ekeemtaiji aidaunash dutiksag akaketkau;
13 dutika:
—Agagbau awai: “Mina jegajuk, Apajuí aujku ijuntai tutai atinai” tawai; nuniaig atum kasá batsamtai emaugme, tiuwai.
14 Jega Apajuí ememattainum Jesusan jegajuawajui wainmachu aidau, shutú aidaujai; nunikmatai niishkam etsagakui.
15 Tujash Jesús anentai jegamainchau dutikamun sacerdote apuji aidau, maestro chicham umiktinun jintinkagtin aidaujai wainkag, uchi aidaushkam jega Apajuí ememattainum batsamas untsumainak: “¡Davita uchijí emematiagmi!”, awajuinamun antukag kajekag,
16 Jesusan chichajuinak:
—¿Antamek jujú imataina dusha?, tuidau.
Tiagtai Jesús ayaak:
—Ehé, antajai; tujash ¿atumek tuke ausachuk ainajum: “Uchi tsakat aidau, muntsuaku aidaujai emematjitnume tusam umikume” tawa duka? tiuwai.
17 Nuna tusa yaaktan ukuak jiinki, Betania weuwai, nunik nui kanajui.
Higuera nejechun Jesús yumigjamu
(Mr. 11.12-14, 20-26)
18 Kashikmas yaakat waketak, Jesús yapajuau.
19 Nuniak higuera jintá yantamchijin wajattaman wainak jegantau, tujash nejeg atsau ayatak dukak wajas atai, chichajak:
—¡Amek tuke nejekchatnaitme! tamawaik higuerashkam kukajá wajasú.
20 Nunikun wainkag jintintaiji aidau puyatkajui, nunikag Jesusan iniinak:
—¿Wajukaya higuerash tabauwaikish kukajé?, tuidau.
21 Tiagtai Jesús ayaak:
—Dekas tajime, atum dekaskeapi tabau ajutjamkui utujibaush atsugtamkuig, imá higueran jutikag dukek dutikmainchau ainagme, ju muja jukesh: ¡Jui atsuk nayantsanum wajaata! tamak nunimainai.
22 Ashí atum Apajuí aujkujum, dekaskeapi tabauwai segakjumek, jukittagme, tiuwai.
Sacerdote apuji aidau Jesusan iniasagbau
(Mr. 11.27-33; Lc. 20.1-8)
23 Jesús jega Apajuí ememattainum wayá jintinkagtak wajai, sacerdote apuji aidau nuigtú judío apuji aidaujai tajuntag iniinak:
—¿Aminash ya jintinkagtuata tusash awetamae? ¿Yana chichamenia jusha juniame?, tuidau.
24 Tama Jesús ayaak:
—Wishakam makichik iniastajime, nunú aigkagmin wisha ya aikata tujutkuiya jutikaja nuna titajime.
25 ¿Juagnash ya yamijatjata tiuwaita, Apajuik awemauwait atsa aents aidauk awemauwait?, tau.
Tama ditak pempeentunikiag chichainak: “Juagnak Apajuí awemauwai tajinish, ‘¿tujash wagka dekaskeapi tichau ainagme tujamtatajama?’
26 Tuja aents aidau awemauwai titag takuish, aents aidau ishamaji, Juagnak profetayai tuidau asagmatai”.
27 Nunikag Jesusan aiinak:
—Dekatsji, tuidau.
Tiagtai ni ayaak:
—Wisha tichattajime yana chichamenia jutikaja nunak, tiuwai.
Aents jimag uchigtin pachisa tibau
28 Jesús ditan iniak:
—¿Atumesh jusha wajuk anentaimtagme? Makichik aents jimag uchijí ajujakui, nunú uchijí emkauwa nuna chichajak: “Uchijuh, yamai uva ajakbauwa nui weme takastá”, tiuwai.
29 Tama uchi ayaak: “Maake, wechattajai”, tau. Tiuwaitak anentai yapajia, weuwai.
30 Tikichia nunashkam jegantun dutiksag tiuwai. Tama nu ayaak: “Ayú apuh, wi wetajai”, tiuwai. Tujash wechauwai.
31 ¿Ju jimaja juiyash, tuuwa apají wakegamunash dutikauwaita? Tuinam dita aimainak:
—Dekatkauwa nuuwai, tuidau.
Tiagtai Jesús ayaak:
—Dekas tajime, apú kuichkiji atinun ijumin aidau nuigtú nuwa akiká takatai aina duka, atumek wayasjuminig Apajuí inamtaijinig ditá wainawai.
32 Wagki Juan Yamijatna duka pegkeg takatan jintinjamatatus tauwai, tujash atumek dekaskeapi tichau ainagme; atum nuniagmin apú kuichkiji atinun ijumin aidau nuigtú nuwa akiká takatai aidaushkam dekaskeapi tiajui, tujash atumek ashí nu wainiatkujum tudaujum idaisajum pujutjum yapajiachu ainagme nunikjum niish dekaskeapi tumainaitjum nu, tiuwai.
Takau pegkegchau aidau pachisa tibau
(Mr. 12.1-12; Lc. 20.9-18)
33 “Antuktajum tikich augmatbaushkam: Aajakui makichik aents jeentin, nunú uvan ajakui, dutika tanishig, uva yumiji ijugtinnash umik, wajasá diistinnash torre ajiauwai. Dutika ujumak takau aidaun ukujak tikich nugkanum weuwai.
34 Nunik uva juwaamu jegamtai, ni inake aidaun ishiakui takau aidau batsatbaunum, niinush wajupaita nuna jukitnume tusa.
35 Tujash takau aidau inak awemamu aina nuna achikag, makichkia nuna suimainak tikichia nunak maawag, tikichia nunak kayai tukujajui.
36 Dutikawagmatai nagkamchaku ishiakbauwa nuní kuashat inaken ishitkauwai; tujash nunashkam dutiksag dutikawajui.
37 “Dutikawagmatai inagnamunum niina uchijin awemauwai: ‘Mina uchignak ajantusampap diimain ainawa’, tusa anentaimas.
38 Tujash takau aina nu uchí wainkag ditak pempeentunikiag: ‘Auwai ju aja juna jukitnuk, dekas maa ajapami, dutikaku juka iinu emami’, tuidau.
39 Tusag achiká jukiag uva ajakbaun ukumtikiag maawajui.
40 “Dusha atumesh wajuk anentaimtagme, dekas uva ajagtina nunú minakush, ¿utugmainai tajume takau aina nunash?”
41 Tutai dita aiinak:
—Nunú pegkegchau aina nunak wait anentsuk kajeemainai, dutika tikich takau aidaun idaitumainai uva juut jegamtai juwinak niinu amaina nuna sujustinme tusa.
42 Tiagtai Jesús ditan ayaak:
—¿Atumek Agagbau aina duka tuke ausachuk ainajum, nui:
“Kayá ekenag jegamin aidau, kaya pegkegchauwai tusag dakitjajua nunú yamai dekas jegá ichichkatin kaya apujtutia iman wajasé;
Nunak Apu Apajuí dutikau asamtai jutii diismak anentai ejetumaitsui” tawa duka?
43 “Nuadui tajime, Apajuí atumin inapa nunak idaiyak tikich aentsun inagtinai, midau atin aidaunak dutiksag itagtuatnume tau asa.
44 Nunú kaya nui iyauk, tsainkatnai; untsu kaya aentsnum iyaakug, yuku ematnai”.
45 Nuna Jesús augmattai sacerdote apuji aidau, fariseo aidaujai antukag, ditan pachis tawa nuna dekagmamawaju.
46 Nunikag achiktag tuidau; tujash aents aidaun ishamaidau, Jesusak profetayai tuidau asagmatai.