22
Nuwenku fiestamamu pachisa Jesús augmattsamu
(Lc. 14.15-24)
1 Jesús ditan aujuinak ataktú nagkama augmatbaun pachis tau:
2 “Apajuí inama duka makichik rey uchijí nuwenatin asamtai yutai shiig pegkejan umigkauwa nujai betekmamtinai.
3 Dutika ishiakui inake aidaun, ipaamu aina nuna ujaktinme tusa, tujash ditak nui minitnak dakitjajui.
4 Nunikagmatai ataktú tikich inake aidaun ishimak: ‘Ipak aidau ujaktajum, yumainuk uminkae, mina toro aidaujun, kuntin uduekbau aidaunashkam maatajum tijai; ashí uminkae, nuwenbaunum minitnume, timae titajum’ tusa.
5 Tujash ipaamu aidauk antugkachajui. Nunikag makichik ajajin wegai, tikich wajiijin sujak weuwai,
6 nuniai tikich aina duka, apú inake ishiakbau aina nuna achikag, wai waitkainakuag maawajui.
7 Dutikamun rey antuk kajeká suntaji aidaun ishitkauwai, dutikam wejiag aents magkagtuau aina nuna kajegká, ashí yaaktajinash apejuk ukugkiajui.
8 Nuna dutika inake aidaun chichajak: ‘Nuwenbaunum yuwatnuk uminkae, tujash ipamu aidauk minimainchau ainawai.
9 Wetajum yaaktanum jinta aina nui, nunikjum ashí aents atum wainbauk ipaatajum nuwenbaunum kaunatnume’, tiuwai.
10 Tiajam inak aidaushkam jintanum shiyakag, ashí aents dita wainbaunak ipaawajui pegkeg aidaun, pegkegchau aidaujai. Imatikamu asa jeganmag aentsuk piyakui.
11 “Nunikmatai rey wayau, ipak aidaun diistatus. Nunikmá makichik aents nuwenbaunum weaku nugkutain nugkuagchaun wainkau,
12 nunik: ‘Kumpajuh, ¿wajuk amesh juish wayaume jaanch nuwenbaunum nugkutai nugkutskesh?’ Tamash nigka chichaachu.
13 Nunitai rey ni inake aidaun chichajak: ‘Juka dawenum jigkagjum, uwejinish jigkagjum agaa suwea awi jiiktajum, nui pujus buutak nainak takegtú pujutí’, tiuwai.
14 Wagki untsukbau aidauk kuashtai, tujash etejamu aidauk ujumke”.
Kuichik akikmamu pachisa tibau
(Mr. 12.13-17; Lc. 20.20-26)
15 Timatai fariseo aidau jiinjag chichaman umikaju, Jesús wajintig nunikmatai tsanumjugmi tusag.
16 Nunikag ishiakajui ditá aentsji aina nuiyan ujumak, Herodesan aentsji aina nujai, Jesusan iniastinme tusag, dutikawajam:
—Maestroh, dekainaji amek dekaskea duke tame duka, Apajuí jinti dekaskea duke jintinkagtam dushakam, aents tuina dukesh uyumatsme wagki dita shiig awajkatasam tachau asam.
17 Nuniau asamin tajame: ¿Amesh wajinpa, Cesarash kuichkish akimainkaih atsa akimainchaukaih?, tuidau.
18 Tiagtai Jesús dita pegkegchau anentaiyai tabaun dekaju asa:
—¡Tsanumin aidauwah! ¿Wagka pegkegchaunum dekapjustasagmesh wakejutagme?
19 Iwaintugkakjua kuichik akikmajum nunú, tau. Tama makichik denario ejentuntaju.
20 Dutikam ditan iniak:
—¿Yana niimegaita jusha, tuja yana daajiyaita ju agagbauwa jusha?, tau.
21 Tama dita aiinak:
—Cesardauwai, tuidau.
Tiagtai Jesús ayaak:
—Cesardauwa duka, César susatajum; Apajuinua duka, Apajuí susatajum, tiuwai.
22 Nuna antukag anentai jegagchaju, nunikag ukuinak weajui.
Jakau nantagtin pachisa iniimsamu
(Mr. 12.18-27; Lc. 20.27-40)
23 Nunú tsawantaik saduceo aidaushkam Jesusan wejiaju, ditak jakau aidauk nantagchatnai tinu asag, nunikag iniinak:
24 —Maestroh, Moisés chichaak: “Aents nuwan juki uchin akiitsuk jakamtaig, ni yachintin nuwan juki uchin akiimainai, dutika yachí uchijiya nunin emamainai”, tiuwai.
25 Nuniamunum, jutii ainag juiya siete yachigbau aayi. Nuanuiya nagkamchak nuwenauwa duka uchin akiitsuk jakauwai, nuniak nuwanak yachin ukugkiuwai.
26 Nunikmatai jimaja ju jukishkam nunisag jakauwai, nunisag kampatuma dushakam jakauwai, nuni nuninakua siete aajakajua duka ashí jinawajui.
27 Nu ashí jinawagmatai pujus nuwashkam jakauwai.
28 Nuna nunikajua duish, atak nantamunmash, ¿Siete yachi aajakajua nu ashí nunak nuwatkajua duish, yana nuweg atinaita? tuidau.
29 Tama Jesús ayaak:
—Atumek Agagbau aina duka, nuigtú Apajuí senchijiya dushakam dekachu asajum dewakugme.
30 Atak nantamu atina duik nuwenbauk atsutnai, ángel nayaimpinum batsata nuninuk agtinai.
31 Tujash ¿jakau nantajagtinun pachis Apajuí tibau agagbauwa duka ausachuk ainajum, nuanuig:
32 “ ‘Witjai Abraham, Isaac, Jacob aina nuna Apajuijinuk’ tawa duka? Apajuik jakau aidaun Apajuijichui, iwaaku aina nuna Apajuijiyai”, tiuwai.
33 Aents aidau nuna antukag, Jesús jintinkagtamun anentai jegagchaju.
Chicham umiktin dekas imana nu
(Mr. 12.28-34)
34 Jesús saduceo aidaun itatmitkakbaun fariseo aidau antukag, ijunjaju;
35 nunikbaunum dita aina nuiya makichik maestro chicham umiktinun jintinkagtin, pegkegchau anentaiyai iniak:
36 —Maestroh, ¿chicham umimain dekas imana dusha tuwaita?, tau.
37 Tama Jesús ayaak:
—Amina Apujum Apajuiya nu, ashí amina anentaimjai, ashí amina wakanmijai, ashí amina anentaimtagmijai aneeta, tawai.
38 Juuwai dekas imanuk, nuigtú chicham dekatkau umimaina duka.
39 Tuja tikichia duka jujai betekmamtinai, duka: “Tikich aidaush amek anenmamsam aneeta”, tawai.
40 Ju jimag chicham umiktina juig ashí chicham umiktin aidau nuigtú profeta aidau tibauwa dushakam ainawai, tiuwai.
Cristush yana uchijigkita tibau
(Mr. 12.35-37; Lc. 20.41-44)
41 Fariseo aidau ijunjamutak batsataig, Jesús iniak:
42 —¿Atumesh Cristush wajuk anentaimtagme? ¿Yana uchijiyai tajume?, tau.
Tuinam dita aiinak:
—Davita uchijiyai, tuidau.
43 Tiagtai:
—Nuniaish, ¿wajuk asamtaiya Davitash Wakan ichachiamash Apú tiuwaita?
44 Tau asa:
“Apu mina Apujun chichajak: Ekeemsata mina untsujui,
nunikamin wi amina shiwajum aidaunak ashí idaitustajame”, tiuwai.
45 —David, Apu tawa nuniaish, ¿wajuk asaya Davita uchijish amainaita?, tau.
46 Tutai makichkish aimainchau dekapedau asag, nui nagkamsag makichkish iniaschajui.