46
Apajuík jutijai pujawai
Coré uchiji aidau agajagbau
Juka jaka ukumamunum kantamajakbauwai
1 Apajuíyai iina kuitamjamin,
iina senchimtijamin,
tuja utugchat ataish tuke yaijatin.
2 Nuadui nugka buchittai,
muja aidau yumpunainak,
nayantsanum kakegu
wainkuish ishamaitsuji.
3 Nayants senchi tsukatbau,
kedegtak muja aidaun senchi umuchiak
ishamain wajakuish ishamaitsuji.
4 Namakak nii tsegkeakbaujijai
Apajuí yaaktajin aents batsatun shiig anemtikui,
nunú yaaktak dekas tikich yaakat aidaun nagkaesau
shiig pegkegmai, Apajuí pujutai asa.
5 Apajuík nunú yaakta ejapeen pujawai,
nuadui makichkish tsaimainchau ainawai.
Tuja Apajuí aentsji aidau,
nunú yaaktanum batsatunak kashikiuch nagkamas yayawai.
6 Aents nugka muunnumia aidauk,
nugka múun aidaun apuji aidaujai
Apajuí chichamun antukag
ishamainak senchi pampainawai.
Tuja nugkashkam Apajuí chichatai,
yumpuna tsainak megkaewai.
7 ¡Tuke Pujuu ashí senchigtina duka jutijai pujawai!
¡Jacopan Apajuíjiya nunuwai iina kuitamjamin!
8 Tuke Pujuu ishamain wainchatai aidaun
juju nugkanum iwainajua nunú
taajum diistajum.
9 Maanitak ashí nugkanum atsuti tusa tine.
Nuadui maaniaku flecha akentai aidaunak
nagki aidaujai kupigmayi,
dutikak carro maaniaku jutai aidaunashkam
apeka utsagmayi.
10 ¡Anuig nagkankatajum!
¡Witjai Apajuínuk, nunú dekatajum!
Ashí nugkanmaya aidauk mina umigtukagtatui.
11 ¡Tuke Pujuu ashí senchigtina duka jutijai pujawai!
¡Jacopa Apajuíjiya nunuwai iina kuitamjamnuk!