47
Apajuíyai ashí nugka apujig
Coré uchiji aidau kantamawagbau
1 Ashí aents aidautijum Apajuí uwejum awatitajum.
Tuja nii emematkujum
shiig aneasjum senchi kantamatajum.
2 Wagki Tuke Pujuuwai ishamtai múun, ashí nugka apujiya duka.
3 Aents tikich nugkanmaya aidaun Apajuí depetuk,
atum inagtajum tusa iina idaitugmasui.
4 Apajuí Jacopan aneau asa,
nii wegantu aidautin etegtamjauwai,
dutijama nugka pegkejan
nii anagtabauwa nuna sujamsajui.
Nunú nugka duwi ii eme anenmamji.
5 Tuke Pujuu Apajuík niina aentsji aidau
shiig aneasag senchi kantamainak,
nuigtu uwija kachujin umpuinak
pampainamunum niina pujusa inamtaijin
waya ekemsae.
6 ¡Kantamtai Apajuí kantamjuatajum!
¡Kantamtai iina apuji kantamjuawagmi!
7 Apajuíyai ashí nugkanmaya aidaun apuji,
nuadui shiig aneasjum kantamjuatajum.
8 Apajuík nii pujusa inamtaiji
pegkegma nuwi pujusag,
ashí aents nugkanmaya aidaun inawai.
9 Tuja ashí tikich nugkanmaya
apu eme anentsa diitai aidauk,
Abrahama Apajuíjin ememattatus
nii wegantu aidaujai ijunainawai.
10 Ashí aents nugkanmaya aina duka Apajuínu ainawai.
Nuadui nii ashí inawai.