112
Ba'n cyeri yi e' yi jicyuch te'j cyajtza'kl
1 Kak'e' kak'ajsbil tetz Kajcaw yi kaRyosil.
Ba'n cyeri e' yi na cyak' k'ej Kajcaw, yi e' yi na chixom te yi tetz ca'wl.
2 Na yi chixonl yi e' yi jicyuch te cyajtza'kl, sjalok cyetz chibanl swutz Ryos, nin tz'ak'lok chik'ej tzone'j wuxtx'otx'.
3 Nin yi e'a'tz yi jicyuch te cyajtza'kl, sjalok wi'nin chime'bi'l, nin ilenin chocopon tan quich'eye'n yi e' yi at tajwe'n scyetz.
4 Nin te yi e'chk tiemp yi at tz'o'tz wutzil wi munt sjalok jun cyetz chitxekbil.
Yi e' cyetz na el chik'ajab scye'j yi e' yi at tajwe'n scyetz.
Nin wi'nin xtxaxl cyalma'.
5 Na yi e' balaj, tetz cu'n cyalma' na cyak' c'mo'n. Nin chin jicyuch nin cyajtza'kl te e'chk negos yi na chiban.
6 Cha'stzun te cya'l cunin na chicwe't tul il, nin ilenin sna'wsok cyetz chibi'a'tz.
7 Ej nin qui na chixob cyera'tz te e'chk takle'n yi sbajok ek ca'p na yi cyetz chitxumu'n cho'n ajlij te Kajcaw.
8 Chin quiw nin quitane'n, qui na chixob tetz jun, nin tze'e'n tu' na chiban scye'j e' chicontr.
9 Nin yi e' yi jicyuch te cyajtza'kla'tz, ilenin na cyak' ẍch'eybil cyetz yi e' tal aj rmosuminl. Nin qui'c nin mu'ẍ tal xtx'ixwilil chiwutz cyera'tz.
10 Poro yi e' mal naka'tz, wi'nin na chi'ch nin chic'u'l yi na quil nin chiwutz yi e' balaja'tz. Nin tan paj yi qui'c rmeril tan chixcyewe'n scye'j, na saj jun chin chi'ch c'u'lal tetz cyetz, na quil chicambaj yi cyajbil tan chipo'tze'n yi e' balaj.