113
K'ajsbil tetz Kajcaw
Kak'e' kak'ajsbil tetz Kajcaw yi o' ẍchakum i'.
Kak'e' k'ej yi tetz bi' jalu' nin sbne' opon tunintz.
Cyak'e'u' chik'ajsbilu' tetz yi e'u' yi ate'u' tele'n tzi'n nin toque'n tzi'n.
Na i' ajcaw tibaj cyakil e'chk nación.
Chin wutzile'n nin yi tetz k'ej.
Nin qui'c stzajsbil wi'.
Cya'l jun yi cho'n nink chi tane'n i', na cho'n najlij i' jalen tzi'n tcya'j.
Nin na c'o'e' tzaj i' tan xmaye'n yi tcya'j tu yi wuxtx'otx'.
Yi e' yi qui'c ate' cu'nt, na chije' tzaj ta'n tc'u'l me'ba'il.
Ncha'tz na tak' i' ama'l scyetz tan chic'olewe'n chixlaj yi e' wi'tz ajcaw, yi cyajcawil yi tetz tanum.
Na tak' chik'ej yi e' xna'n yi qui'c cyalbil.
Na yi na el tiemp na jal cyal tan yi tetz porer.
Nin na chitzatzin le cyetz chinajbil.
Kak'e' bin kak'ajsbil tetz i'.