18
Yi bitz yi mbnixnak tan Luwiy tan tyoẍine'n tetz Kataj
1 Kataj na chimpek' te'ju', na ilu' ak'ol inwalor.
2 Ilu' q'uicy'lom wetz.
Ncha'tz ilu' colbil wetz,
na ni'cu'n ilu' tu jun ama'l yi ba'n na incol wib tul.
Ilu' inRyosil, colpinl wetz.
Ncha'tz ni'cu'n ilu' tu jun makbil flech.
Na tan tu' yi teru' poreru', na chinclax.
Ni'cu'n ilu' tu jun c'ub yi nim wutz tkan, yi ba'n wew wib tibaj.
3 Na wak' ink'ajsbil teru' Ta', na at wi'nin k'eju'.
Nin yi na injak ẍch'eybil wetz teru', na ocu' tan inclaxe'n ẍchik'ab yi e' incontr.
4 Ja sotz inc'u'l tan quimichil yi atin cu'n.
Na chi ik yi pak'bil mar nsaj swibaj.
Nin ja chinxob tan yi ẍchamil yi tojkbil a'.
Na nsken chintx'amxij tak'un.
5 Quimichtlen tu' atine't.
Txant nin nopon ẍchixo'l alma'.
6 Me'l tzun intzi' tan jakle'n ẍch'eybil wetz teru' Ta'.
Nin opon yi to'kl walma' kale atite'tu'.
Nin ja tbitu' intzi' inkul.
7 Saje'n tzun jun chin wutzile'n coblajnobtz.
Cyakil yi wuxtx'otx' nyucan ta'n.
Yucan cyakil yi wi munt tan yi ẍchi'chbe'n c'u'l Kataj.
8 Ej nin el tzaj sib le ju' tane'n.
Nin el tzaj k'ak' tu xtxak'ak' le stzi',
yi nxcye' tan stz'e'se'n cyakil e'chk takle'n.
9 Cwe'n tzun rit'ol yi wutz tcya'j, nintzun saj Kataj le cu'nak tzaj.
At jun c'oloj sbak', yi chin k'ek nin tzak' yi tkan.
10 Cho'n tzun je'n tzaj i' tibaj jun querub.
Nintzun saj xicy'intz yi jun queruba'tz.
Saje'n tzun juẍp tul cyek'ek'.
11 Xcon yi tz'o'tz ta'n,
nin xcon yi sbak'a'tz ta'n yi at a' tul,
chi ik jun mantial tetz oyintzi'.
12 Te yi pak'puchal i' el tzaj c'ub a'bal tu xtxak'ak' yi wi'nin lamcane'n.
13 Jilone'n tzun Katajtz, chi na ban k'ancyok yi wi'nin na jincan.
Na i' yi wi'tz Ajcaw tetz yi tcya'j tu yi wuxtx'otx'.
14 Nintzun saj c'oxol e'chk flech, yi xlitz' cu'n.
E' el tunin xit yi tetz contr bene'n tzi'n.
Tircu'n tzun e' contra'tz, e' lo'on ta'n.
15 Ej nin lajluchax yi tx'otx' yi at xe mar.
Ncha'tz ja lajluchax yi mbi at jak' tx'otx'.
Ya'stzun bantz yi toque'n Kataj tan chicawse'n yi e' incontr.
Xew tu' i' xcon ta'n tan chicawse'n.
16 Cwe'n tzaj tzun k'ab Ryos tan inje'n tzaj tul yi mar yi chin xe' nin.
17 Ja chinclax ta'n tk'ab yi wi'tz incontr, yi wi'nin ẍchamil,
nin ja chinclax ta'n ẍchik'ab yi e' yi wi'nin chi'ch chic'u'l swe'j.
Wech na at cu'n mas cyetz chichamil tzinwutz wetz.
18 Ja cho'c tan impile'n te yi atin tul sotz c'u'lal.
Poro yi Wajcaw ja oc tan incolche'n.
19 Ja ne'l liwr ta'n.
Nin ja chin clax ta'n,
tan tu' yi na pek' i' swe'j.
20 Ya'stzun ban i' swe'j.
Xomcyen tu' te yi imbalajil.
Xomcyen tu' te yi skojal walma'.
21 Na ilenin ja chinxom te yi tetz tajbil.
Qui'c jun tir yi jak impaj yi ca'wl i'.
Qui'c jun tir yi jak ne'l xlaj yi tetz be'.
22 At cyakil yi ca'wl i' le inwi'.
Nin ilenin ja chinxom te'j.
23 Ja injoy puntil tan inxome'n te yi tetz tajbil.
Ej nin ilenin ja inmak wib tan banle'n e'chk takle'n cachi'.
24 Ya'stzun yi oy yi ja tak' i' swetz.
Xomcyen tu' te yi imbalajil.
Xomcyen tu' te yi ẍe'n wutane'n swutz i'.
25 Wajcaw, na el k'abu' te yolu', scyetz yi e' yi na el chik'ab te chiyol.
Chumbalaj nin na banu' scyetz yi e' yi ba'n na chiban.
26 At banl talma'u' squibaj yi e' yi qui na chijuch quil.
Ma scyetz yi e' yab, qui'c mu'ẍ tal banlu' scye'j.
27 Ilu' colol cyetz yi e' c'ulutxum.
Ma yi e' yi na cyocsaj quib nim tu cyajtza'kl, na el chik'ej tanu'.
28 Kataj ilu' txekunl tetz imbe'.
Na na oc yi tz'o'tz tanu' tetz tkan skil tzinwutz.
29 Tan tu' yi atu' tan wuch'eye'n, chinxcyek te jun c'oloj incontr.
Na na oc i' tan kacolche'n yi o' yi cho'n k'uklij kac'u'l te'j i'.
30 Chin tz'aknak cu'n cyakil yi na ban Kataj Ryos.
Ba'n k'ukek kac'u'l te yi suki'nt ta'n sketz.
Na na oc i' tan kacolche'n yi o' yi cho'n k'uklij kac'u'l te'j i'.
31 Qui'c junt Ryos at.
Ntin cu'n Kataj Jehová.
Na qui'c junt wutz c'ub at,
tan kaje'n colol quib tibaj, chi tane'n kaRyosil.
32 Tan i' na jal inchamil.
Nin tan i' na no'c tetz tz'aknak cu'n.
33 Tan i' na chintz'itpun chi na ban masat,
yi na el ojkuj xo'lak e'chk wutz yi nim wutz tkan.
34 I' chusul wetz tan oyintzi'.
Nin i' na ak'on ẍchamil ink'ab,
tan kinle'n tzaj yi inc'oxbil flech,
yi chin quiw nin, yi brons cu'n.
35 Wajcaw, ilu' colol wetz,
tz'amij chin tan tzbalu'.
Tan tu' banlu' sjalok wi'nin inxonl.
36 Ilu' nuc'ul tetz imbe', bantz qui inje'n jiẍp.
37 Tan ilu' ja chinxcye' tan chitz'amle'n yi e' incontr.
Yi chilo'one'n cyen wa'n, kalena's tzun ja chimpakxij.
38 Puch'ij cunin nchisaj wa'n.
Nin ja chicyaj jak' wukan.
39 Ilu' mmak'on inwalor tan oyintzi'.
Tan ilu' nchimeje' yi e' incontr tzinwutz.
40 Tan ilu' nche'le't ojk incontr tzinwutz.
Ja chinxcye' tan chisotzaje'n yi e' yi ja chi'ch chic'u'l swe'j.
41 Ja chiẍch'in tan jakle'n ẍch'eybil cyetz, poro cya'l jun mmo'c tan chicolche'n.
Ja chiẍch'in tetz Kataj, poro qui mmo'c i' tan quich'eye'n.
42 Joq'uij cunin nche' wulej,
nin ja chiben tan cyek'ek'.
Ja che'l inmasol chi na ban tz'is.
43 Ilu' nchincolon ẍchik'ab yi e' intanum.
Tan ilu' ja no'c tetz wi'tz chibajxom.
Wi'nin wunak yi qui wajske'n chiwutz, ja cho'c jak inca'wl.
44 Jal cu'n na chiban tane'n yi wetz inca'wl.
E' awer nak, poro na chimeje' tzinwutz.
45 Ja chicotxcax yi e' awer naka'tz.
Wi'nin chilucnewe'n tan xo'w,
yi cyele'n tzaj le chitnumil tan yi chijatxol quib tink'ab.
46 Yi Kataj, yi ketz kaRyosil, itz' nin tera'tz.
Swak'e' tzun k'ej i', na i' q'uicy'lom ketz nin i' colol ketz.
47 Ja ticy'saj c'u'l scye'j e' incontr.
Tan i' ja cho'c yi e'chk tnuma'tz jak' inca'wl.
48 Na tan tu' i' ja chinclax ẍchik'ab incontr.
Nin tan i' ja jale't ink'ej ẍchiwutz.
Ej nin tan tu' i' ja ne'l liwr ẍchik'ab yi e' biyol naka'tz.
49 Kataj, cha'stzun te, tzintxole' yi balajilu' scyetz cyakil jilwutz wunak.
Nin swak'e' ink'ajsbil teru' Ta'.
50 Tan ilu' na tx'acone't yi rey yi je'nak xtxa'olu'.
Na ilenin xomij yi xtxaxl talma'u' swi'baj,
nin xomok scye'j e' inxonl sbne' opon tunintz,
stzun Luwiy bantz tul yi tetz bitz.