19
Cyakil e'chk tx'uml na ẍchaj yi k'ej tu balajil Ryos
1 Cyakil yi at tcya'j na ẍchaj yi k'ej Ryos.
Cyakil yi wutz cya'j na jilon te yi balajil yi tak'un i'.
2 Cyakil nin k'ej na cyal yi balajil Ryos.
Cyakil nin ak'bal na chichaj yi tajtza'kl i'.
3 Qui'c jun jilwutz yol najk xcon cya'n.
Qui'c jun yol na cyal, nin qui na kubit wi' jun.
4 Poro yi xtxolbil yi na chichaj ilijt cya'n cyakil wunak bene'n tzi'n wi munt, jalen te yi najbil yi k'ej.
5 Ej nin yi k'ej chin tzatzin cu'n na el tan xo'n, chi na ban jun aj tx'aconl, nka chi na ban jun yaj yi inak cu'n mo'c txkel.
6 Cho'n na je'ul tele'n tzi'n.
Ej nin na xon jalen yil tz'opon toque'n tzi'n.
Qui'c nin jun e'chk takle'n yi najk tew tib swutz yi stz'a'al.
7 Ncha'tz yi ẍchusu'n Kataj, chin tz'ak nak cu'n.
Na tak' ac'aj itz'ajbil sketz.
Ncha'tz yi ca'wl Kataj, ba'n k'uke' kac'u'l te'j.
Nin yi e' yi qui'c chichusu'n, sjalok cyajtza'kl ta'n.
8 Qui'c mu'ẍ paltil yi yol Kataj.
Nin na tak' tzatzin tetz ketz.
Chin tz'ak nak cu'n yi e'chk ca'wla'tz.
Nin na el pacx wutz kajtza'kl ta'n.
9 Chumbalaj nin kol kek ẍchi' yi yol Kataj, na quil sotz tera'tz.
Chin jicyuch nin te'j yi e'chk ca'wla'tz.
10 Mas tcu'n balaj swutz yi oro, nka yi pwok.
Ej nin mas tcu'n chi' swutz yi cabil wunak txuc.
11 Na xcon tan makle'n kawutz.
Ej nin sjamelank, kol kaban tane'n.
12 Ta', at lo' wil yi qui na chinnachon te'j.
Poro cuyu' impaj.
13 Ej nin ko na wocsaj wib nim, xit cu'nu' yi jun wajtza'kla'tz.
Quil tak'u' ama'l te jun ajtza'kla'tz tan impo'tze'n.
Na ko ya'tz sbanu' Ta', nocopon tzuntz tetz jun yaj yi tz'aknak cu'n.
Nin nelepon liwr tk'ab yi jun yab ajtza'kla'tz.
14 Wajcaw, lok tzatzinu' te yi e'chk yol yi na el le intzi'.
Lok tzatzinu' te yi mbi na icy' tinc'u'l.
Max c'u'lu' Wajcaw, na ilu' lok'ol wetz, nin ilu' colpinl wetz.