23
Yi balaj pstor
1 Yi Wajcaw, i' pstor wetz. Cha'stzun te qui'c tajwe'n swetz.
2 Cho'n na nuje' ta'n xo'l balaj ch'im.
Nin cho'n na chinc'a'chxij ta'n tzi balaj a', yi qui'c mas tojkbil.
3 Yi jun pstor wetza'tz, ya'stzun yi jun yi na oc tan quiwse'n walma'.
Nin i' yi jun yi na oc tan ẍchajle'n swetz yi ẍe'n wulej tan imbnol tane'n yi e'chk takle'n balaj, bantz jale'n k'ej i'.
4 Ej nin qui'c na ban, kol chinxon tul jun chin siwun yi chin tz'o'tz nin, kale wutz cyen quimichil swe'j, na xomij Wajcaw swe'j tan inq'uicy'le'n.
Quil chinxob, na cy'a'n xtx'amij tu ẍcharyon ta'n tan incolche'n.
Cha'stzun te na jal inwalor nin qui na chinxob.
5 Cho'n na tak' inwa' ẍchiwutz cunin yi e' yi na chitzan tan inxuxe'n.
Ncha'tz na koje'n balaj tz'ac'bil tinwi'.
Nin na noj cunin inlak ta'n.
6 Te yi atin tzone'j wi munt, ilenin na xom yi banl tu xtxaxl talma' Wajcaw swe'j.
Ej nin tzantzaj, ẍchin najank xe ca'l i' tetz ben k'ej ben sak.