24
Yi taw cyakil yi at bene'n tzi'n
1 Tetz Kataj cyakil yi at bene'n tzi'n wi munt.
Tetz i' cyakil yi wuxtx'otx'.
Tetz i' cyakil yi e'chk takle'n yi at.
2 I' bnol tetz cyakil.
I' jatxon cu'n yi a' tan jale'n yi wuxtx'otx'.
3 ¿Na' scyetz e' yi ba'n chopon wi ju'wtz kale najle't Kataj?
¿Na' scyetz e' yi ba'n chinaje' le najbil, yi jun yi wi'nin xanil?
4 Ntin cu'n yi e' yi quinin chixconsaj chik'ab tan banle'n takle'n cachi'.
Ntin cu'n yi e' yi skoj cu'n te cyajtza'kl.
Ntin cu'n yi e' yi qui na chilok' yi e'chk takle'n yi banij tu' tane'n.
Ntin cu'n yi e' yi na che'l cu'n te chiyol.
5 Ya'stzun yi e'a'tz yi stk'e' Kataj banl squibaj.
Stk'e' i' chibalajil, na i' colpinl ketz.
Ej nin ya'stzun quitane'n yi e' yi na el cyalma' tan chixome'n te Ryos.
6 Ej nin ya'tz quitane'n yi e' yi na cyaj chopon kale atite't yi Ryosil k'ajtzun kamam Jacow.
7 Ch'uysoken yi wutz tkan yi sawan, yi jun sawana'tz yi at nintz sajle'n tunintz.
Ch'uysoken yi wutz tkan, bantz toque'n yi kaReyil tc'u'l, yi kaReyil yi wi'nin k'ej.
8 ¿Na' tzun scyetz i' yi jun Reya'tz, yi wi'nin k'ej?
I'tz yi Kataj yi wi'nin porer.
I'tz yi Kataj yi at ẍchamil tan oyintzi'.
9 Ch'uysoken yi wutz tkan yi sawan.
Ch'uysoken yi wutz tkan yi jun sawana'tz, yi at nintz sajle'n tunintz, bantz toque'n yi kaReyil, yi kaReyil yi wi'nin k'ej.
10 ¿Na' tzun scyetz i' yi jun Reya'tz, yi wi'nin k'ej?
I'tz yi Kataj yi cya'l na xcye' quen te'j.
I'tz yi wi'tz Ajcaw yi taw yi tcya'j tu yi wuxtx'otx'.