27
Kataj Ryos i' txekbil ketz
1 Kataj Ryos i' yi txekbil wetz.
Nin i' yi colol wetz tzone'j wi munt.
¿Mbi tzun tzinxo'wlej?
Na xomij i' tan inq'uicy'le'n.
Qui tzun chinxob tetz jun.
2 Cyakil yi e' mal nak scyuch' yi e' incontr, ja je' chimolol quib tan imbiyle'n klo'.
Poro e' te'n nin nchibajtz tc'u'l chitxumu'n.
3 Pe nink chimole'n quib jun c'oloj sanlar tan imbiyle'n, quil chinxob scyetz.
Pe nink cho'c tan joyle'n puntil tan welse'n cu'n swutz, quil chimbisun ta'n.
4 Jun ntzi' xtxolbil na waj tetz Kataj.
I'tz: na waj chinxcon xe ca'l i' sbne' opon tunintz, tan tak'le'n k'ej i', nin tan tilwe'n yi tetz balajil.
5 Na yil tz'ul e'chk c'alaj tiemp tzinwutz, k'uklij inc'u'l yi tz'ocopon Wajcaw tan incolche'n tan yi tetz porer xe tetz ca'l.
Ni'cu'nk yi atink xlaj i', nka yi cho'nk atink tib jun chin wutz c'ub yi cya'l jun jepon swe'j.
6 Nin tan i' chinxcyewe't scye'j incontr, nin quil chintx'ixwij ẍchiwutz.
Tan yi xtxolbila'tz tzimpate' intx'ixwatz xe ca'l i'.
Swak'e' ink'ajsbil tetz Wajcaw tan yi tzatzin yi atin cu'nt.
7 Wajcaw, elk bin k'ajabu' swe'j.
Tbite'u' yi intzi' inkul, na na cu' inwutz teru'.
8 Na nternin na el walma' tan joyle'nu'.
Ya'stzun na chintzan tan banle'n jalu'.
9 Qui bin tew tibu' tzinwutz.
Nin tan paj yi ẍchi'chbe'n c'u'lu', quil chin tilcyenu', na cho'n k'uklij inc'u'l te'ju'.
Quil chin til cyenu' inchuc, na ilu' inRyosil nin ilu' colol wetz.
10 Pe nink chin quil cyen intaj intxu', quil chimbisun, na at ninu' swe'j.
11 Wajcaw, ẍchaje'u' yi tajbilu' swetz.
Ẍchaje'u' yi balaj be' swetz na ate' wi'nin incontr.
12 Quil tak'u' ama'l tan chitx'acone'n yi incontr swe'j, na wi'nin la'jil na xcon cya'n tan joyle'n wil.
Nin na chitzan tan xtxumle'n wi'nin e'chk takle'n tan inxo'wse'n.
13 Poro elnak intxum tetz yi tz'ocoponu' tan wuch'eye'n.
Nin stk'e'u' yi banlu' swibaj te yi tiempe'j yi atin tul.
14 Cha'stzun te e'u' intanum quiwit.
Quil kacabej kac'u'l.
K'ukek kac'u'l te Kataj, na jun cu'n ba'n k'uke' kac'u'l te i'.