28
Na tbit Kataj yi katzi' kakul
1 Wajcaw, cho'n na cu' inwutz teru', na ilu' colol wetz.
Quil stew tibu' tzinwutz.
Stza'weju' yi mbi na chintzan tan jakle'n teru', na ko quil stza'weju', ja tzun wi't chinquim tane'n.
2 Cha'stzun te tbite'u', na cho'n na chinẍch'inin teru'.
Nin cho'n na inchaj nin ink'ab kale atit yi ca'lu' tan jakle'n ẍch'eybil wetz.
3 Yil tz'ocu' tan tak'le'n chicaws yi e' incontr, qui'k tak'u' yi wetz incaws.
Na yi e' cyetz, chiwutz tu' chiplaj tu', yi chin balaj nin e'.
Poro chin juntlen nin e' tu cyajtza'kl.
4 Che' cawse'u'.
Tu'k xom cyen tu' te quil yi nchijuch, na wi'nin e'chk il ja baj chibnol.
5 Na siquier nak ul tx'akx ẍchic'u'l yi ilu' bnol tetz cyakil yi e'chk takle'n yi at bene'n tzi'n.
Na yi ilu' teru', ba'n sbanu' jun e'chk takle'n, nin ba'n xit tanu', nin qui't jal junt tir.
6 Ntyoẍ tetz Kataj na ja tbit i' yi intzi' inkul.
7 Na at wi'nin ẍchamil, nin i' yi colol wetz.
Cho'n k'uklij inc'u'l te i', na ja oc tan wuch'eye'n.
Swak'e' bin ink'ajsbil tetz, nin chintyoẍink tetz, na na chintzatzin.
8 At i' tan kuch'eye'n yi o' tetz tanum.
Nin at i' tan ẍch'eye'n nin tan colche'n, yi rey yi txa'ijt ta'n.
9 Ta', che' cole'u' yi e' teru' tanumu'.
Nin tak'u' banlu' squibaj yi e' teru' nitxajilu'.
Che' q'uicy'leju', chi na ban jun pstor tan chiq'uicy'le'n yi e' tawun.
Ilenin che' q'uicy'leju' tan poreru' sbne' opon tunintz.