30
Katyoẍink tetz Kataj
1 Wajcaw, na wak' ink'ajsbil tetz teru', na ja chinclax tanu'.
Nin quinin ntak'u' ama'l scyetz e' incontr tan chitze'ene'n swe'j.
2 Wajcaw, ilu' inRyosil.
Ja injak ẍch'eybil wetz teru' nin ja chin ẍch'eyaju'.
Ja tzun ul yos tanu' swuch'.
3 Na ja chinclax tanu' tk'ab quimichil.
Nin ja tak'u' cobox k'ej swetz tzone'j.
4 Ncha'tz axwok itetz yi k'uklij ic'u'l te Kataj, ak'wok ik'ajsbil tetz i'. Na chin xan nin yi bi' i'.
5 Nin ko na kajuch kil, na saj colpuj wi' i' ske'j tetz jun intzi' tkuj.
Poro yi banl talma' i' qui bajsbe'n tetz.
Ko na kabisun lak'bal, yi na ul skil na katzatzin,
na na oc i' tan kamayse'n.
6 Yi wetz k'uklij inc'u'l, na na no'c tan xtxumle'n yi cya'l jun xcye' swe'j.
7 Ilu' Wajcaw, tan yi balajilu' ja ocu' tan incolche'n.
Poro ilenin ja ne'l jun rat te c'u'lu', na ja klo' chinlo'on.
8 Cha'stzun te Wajcaw, cho'n na cu' inwutz teru' tan jakle'n ẍch'eybil wetz.
9 ¿Mbi ltak' yi kol chinquim?
¿Mbi ltak' kol chinmukxij?
Na yil tz'oc inwankil tetz tx'otx' puklaj, qui'ct rmeril tan toque'n tan tak'le'n k'eju', nin qui't tz'oc tan talche'n yi balajilu'.
10 Wajcaw, tbite'u' intzi' inkul.
Elk k'ajabu' swe'j, nin chin ẍch'eyaju'.
11 Qui't na chimbisun jalu' ma na na chin tzatzin.
Qui't na xcon yi be'ch wetz tetz bis wa'n, ma na, na chintz'itpun tan yi tzatzin yi atin cu'nt, na ja chin ẍch'eyaju'.
12 Cha'stzun te Wajcaw, yi ilu' inRyosil, qui'c rmeril yi qui'k wak' ink'ajsbil teru'.
Tajwe'n chintyoẍin teru'.