31
Yi Kataj i' colol ketz
1 Wajcaw, cho'n k'uklij inc'u'l te'ju'.
Qui bin chin tilcyenu' sbne' opon tunintz.
Chin cole'u', na yi ilu' teru' chin tz'aknak cuninu'.
2 Ajk cuntzaj wi'u' tan tbite'n inyol.
Elk k'ajabu' swe'j. Chin cole'u'.
Oku' tetz jun c'ub kalel tzincolwit wib.
Oku' tetz jun ama'l yi jopij cu'n te'j, kalel tzincolwit wib tan inclaxe'n.
3 Wajcaw, ntin ilu' colol wetz.
Chin cole'u' bin, tan qui inlo'one'n, bantz jale'n k'ej yi bi'u'.
4 Ma jalu' Wajcaw, chin tcy'ajlenu' tzone'j.
Chin cole'u' ẍchik'ab e' incontr, na ilu' colol wetz.
5 ¡Ta'! wabnaj walma' tk'abu'.
Chin cole'u', na ilu' yi Ryos yi bintzinin tetz.
6 Qui na chimpek' scye'j yi e' yi na cho'c tan c'u'laje'n yi e'chk ryos yi banij cuntu', na cho'n k'uklij wetz inc'u'l te'ju'.
7 Ta', na chintzatzin tan yi banl talma'u' yi at swibaj, na ja tilu' yi ja chimbisun, nin ja tilu' yi ja ul sotzaj c'u'lal tzinwutz.
8 Poro quinin ntak'u' ama'l scyetz e' incontr tan cyoque'n tan imbiyle'n.
Ma na ja ne'l liwr tanu' ẍchik'ab.
9 Wajcaw, elk bin k'ajabu' swe'j, na atin tul sotzaj c'u'lal, na ja wi't lo'on inwutz tan bis o'kl.
Nin ncha'tz cyakil inwankil ja wi't lo'on.
10 Tzan imbi'ẍine'n tan yi ẍch'onal cyakil yi e'chk takle'na'tz.
Tzan lo'one'n inwankil tan yi bis o'kl yi atin cu'nt.
11 Ja wi't no'c tetz chitze'lbe'tz e' incontr.
Ja wi't no'c tetz chiyolbe'tz e' inwisin.
Nin tircu'n wunak na chixob swetz.
Nin na che'l ojk yi na quil inwutz.
12 Ja ne'l te chic'u'l chi jun yaj yi quimnakt.
Ni'cu'n in chi jun ẍwok' yi cu'nak much, yi qui'ct xac.
13 Nin na wit yi mbi na chitzan wunak tan xtxumle'n swe'j.
Ja wi't je' chimolol quib chicyakil tan imbiyle'n.
14 Poro Wajcaw, yi in wetz, cho'n k'uklij inc'u'l te'ju'.
Nin na wal: “Ilu' inRyosil.”
15 Cho'n atin tk'abu'.
Chincole'u' bin ẍchik'ab e' incontr, yi na cyaj chinquim cya'n.
16 Elk k'ajabu' swe'j na in ẍchakumu'.
Chin ẍch'eyaju' tan yi banl talma'u'.
17 Wajcaw, cho'n na cu' inwutz teru'.
Qui'k tak'u' ama'l tan tele'n intx'ix.
Ma na ik chitx'ix yi e' pajol ca'wl tz'el tanu'.
Cho'nk chopon tanu' le ama'l yi chin tz'inunin tu' ẍchixo'l alma'.
18 Nink chiquim, bantz makxe'n chitzi' yi e' la'ja'tz, yi na chiyol yi e'chk yol yi chin cachi' nin, nin yi na cho'c tan chisuble'n yi e' balaj wunak.
19 Chumam nin banl talma'u' squibaj yi e' yi na cyak' k'eju'.
Nin na che' colu' chi na ban jun yaj tan colche'n jun c'oloj pu'k yi at xe ca'l.
Nin ẍchiwutz cu'n cyakil wunak, na ocu' tan tak'le'n yi banl talma'u' squibaj yi e' yi cho'n k'uklij chic'u'l te'ju'.
20 Nin na che' ẍch'eyaju' tk'ab e'chk takle'n cachi' yi na chitxum wunak scye'j.
Na na cho'c tanu' xe ca'lu' tan chicolol quib tk'ab yi jisbil cyetz cyak'un chicontr.
21 Ntyoẍ tetz Kataj na tan tu' yi banl talma' i' ja bnix e'chk takle'n balaja'tz swe'j yi mmu'l sotzaj c'u'lal tzinwutz.
22 Wajcaw, tan paj yi il yi atin cu'n sajle'n, ja no'c tan xtxumle'n yi ja ne'l te c'u'lu'.
Poro yi woque'n tan jakle'n ẍch'eybil wetz teru' ja tbitu' intzi' inkul.
23 Cyakil axwok yi na itek ẍchi' Kataj, ak'wok k'ej i', na na oc i' tan quich'eye'n yi e' yi skoj cu'n te cyalma'.
Poro na tak' i' chicaws yi e' yi na cyocsaj quib nim tu cyajtza'kl.
24 Quiwit bin, nimit chic'u'lu', yi e'u' yi cho'n k'uklij chic'u'lu' te yi Kataja'tz.