50
Yi kaRyosil i' yi mero balaj pujul xtisya' yi qui na je k'ab twi' jun
1 Je yol yi Kataj yi wi'tz Ryos.
Na ja che' baj ẍchakol cyakil wunak yi najlche' bene'n tzi'n wi munt.
Ja che' baj ẍchakol cyakil yi e' yi ate' tele'n tzi'n tu cyakil yi e' yi ate' toque'n tzi'n tan ma'le'n cyajtza'kl.
2 Cho'n at i' le yi wi'wtz Sión yi chin yube'n nin.
Nin chin litz'un nin yi pak'puchal i'.
3 Yil tz'ul i' tan cawu'n nk'e'tz ewun cu'n tz'ul, ma na bajxij jun chin wutzile'n k'ak' swutz.
Nin solte'j i' cho'n cunin tane'n chi na ban salchcam.
4 Chu'l molol cyakil wunak tan cyoque'n tetz stiwil yil tz'oc i' tan tak'le'n caws yi tetz tanum.
Chu'l cyakil yi e' yi ate' tcya'j, tu cyakil e' yi ate' wuxtx'otx' tan tilwe'n yi mbi sbajok te yi tetz tanum.
5 Ej nin je yol i'e'j:
“Molwoke' cyakil yi e' yi k'uklij chic'u'l swe'j, yi e' yi chisuknak chiyol yi chixomok swe'j, nin yi ja xcon chitx'ixwatz tetz quiwel chiyol,” stzun Ryos.
6 Nin cyakil yi e' yi ate' tcya'j scyale', yi i' yi mero balaj pujul xtisya' yi qui na je k'ab twi' jun.
7 Ncha'tz na tal i':
“Bitwok tzaj yi axwok xonl Israel, axwok intanum.
Katx'aje' te'j cyakil yi itil, na yi in wetz, in iRyosil.
8 Qui na chintzan tan talche'n tzitetz, yi qui'c xac cyakil yi e'chk itx'ixwatz yi na ipatwok swetz, nka yi qui'c xak cyakil yi e'chk oy yi na itak'wok swetz.
Ba'n atit tircu'n.
9 Poro yi mero bintzi i'tz yi qui tajwe'n swetz.
Qui tajwe'n tan injakol jun ne'ẍ wacẍ nka jun cneru' tzitetz, na wetz cu'n cyakil txuc.
10 Wetz cyakil jilwutz txuc yi at bene'n tzi'n wi munt.
Wetz cyakil smaron txuc tu yi e' txuc tetz awna'n.
11 Wetz cyakil jilwutz txuc yi na chixicy'in tcya'j.
Ncha'tz yi e' yi na chixon wuxtx'otx'.
12 Yi nak waj baj jun wetz wa'n te yi e' txuca'tz qui tajwe'n tan injakol tzitetz, na wetz cyakil yi at wuxtx'otx'.
13 ¿Na pe tzun baj yi e'chk ẍchi'bel yi wacẍ wa'n yi na itoywok swetz?
Nka ¿na pe tzun baj yi ẍch'el yi e'chk chiw wa'n, yi na ibiywok tetz itx'ixwatz? Qui'.
14 Mas balaj yi nink cxtyoẍinwok swetz yi in yi wi'tz Ajcaw, swutz yil tzitak' jun c'oloj itx'ixwatz.
Mas balaj yi nink cxe'lwok cu'n te iyol yi isuknak swetz.
15 Nin yil cxo'cwok swutz il, ba'n tzun tzijakwok ẍch'eybil itetz swetz.
Na list atine't tan ich'eye'n, bantz itoque'n tan tak'le'n ink'ej,” stzun Kataj bantz.
16 Poro ncha'tz stale' i'-tz scyetz yi e' juchul il:
“¿Mbi xac na ital yi xomquix te inca'wl, nin qui na ibanwok tane'n?
Na na italwok yi tajwe'n chixom wunak te yi wetz inchusu'n, poro yi axwok itetz qui na cxomwok te'j.
17 Chumbalaj nin axwok tane'ntz, poro iwutz tu', iplaj tu'.
Na ja cyaj cyen itilol inchusu'n. Nin qui't na cxomwok te'j.
18 Na ilenin axwok alk'om, nin axwok aj xna'ninl.
19 Chin la'j nin axwok, nin chin txumul yol nin axwok.
20 Yi axwok itetz na cu' ichem tan chiyolche'n yi e' wunak.
Nin ncha'tz, pe ik yi mero ititz'un, na cxo'cwok tan xtxumle'n yol te'j, nin tan yolche'n i'.
21 Ya'stzun na ibanwoktz.
Poro i tane'n tziwutzwok, yi quil wak' icaws tan cyakil yi mbi na iban.
Poro nk'e'tz ni'cu'n in chi axwok itetz.
Ma na jun cu'n, swak'e' icaws.
Chin clar cunin na chintzan tan talche'n yi yola'se'j tzitetz.
22 ”Or tzitilwok, quil tz'el inyol te ic'u'l.
Na kol tzitilwok cyen inchusu'n, swak'e' icaws.
Nin cya'l jun tz'ocopon tan icolche'n.
23 Na yi e' yi na cyak' ink'ej, ya'stzun yi e' yi na chityoẍin swetz.
Nin yi e' yi na chiban tane'n inca'wl, ya'stzun yi e' yi nocopon tan chicolpe'n,” stzun Ryos bantz.