51
At rmeril kajak cuybil kapaj swutz Ryos
1 Siwl Ta', elk k'ajabu' swe'j.
Stzajscunu' yi wil tan yi banl talma'u'.
2 Tcy'ajlenu' yi yab ajtza'kl yi cy'a'n wa'n.
Xitcunu' cyakil yi impaj intx'ok'be'na'tz.
3 Wajcaw, na el intxum tetz yi in jun chin wi'tz pajol ca'wl swutzu'.
Nin qui na el yi wil te inc'u'l.
4 Ja injuch wil swutzu' Ta'.
Na ja imban yi e'chk takle'n yi qui na pek'u' te'j.
Nin ba'n atit yi kol tak'u' incaws.
Na yi na tak'u' caws jun, qui na xubsiju' te'j.
5 Ta', na el intxum tetz yi in jun juchul il jetz yi witz'le'nix.
Na te yi atin tzaj le wankil intxu', cy'a'n nin yi ilc'ol wa'n.
6 Poro yi teru' Ta', na tzatzinu' scye'j yi e' yi skoj cu'n te cyalma'.
Nin ja tak'u' katxumu'n tan kabnol yi e'chk takle'n balaj.
7 Chin xansaju' tan hisopo, bantz stzaje'n yi wil.
Xtx'aje'u' te walma' nin skojaxk chi tane'n nok' yi chin stum nin.
8 Tak'u' junt tir yi tzatzin swetz, na na waj yil chintzatzin, ptzun jajk chin cawsaju'.
9 Qui'k tz'ocu' tan xtxumle'n yi wil.
Stzajscunu' cyakil yi impaj.
10 Wajcaw, lok xtx'ixpuju' wajtza'kl.
Na na waj yil jal jun ac'aj wajtza'kl yi jicyuch te'j.
11 Qui'k chin jatxlenu' te'ju'.
Nin qui'k tcy'ajlenu' yi espíritu Sant swe'j.
12 Ma na ẍchaje'u' swetz yi ẍe'nk chintzatzin junt tir, yi ẍe'nk tz'el intxum tetz yi ja chinclax.
Chin ẍch'eyaju' tan yi banl talma'u'.
13 Na yi wajbil i'tz tan inxcone'n tan chichusle'n yi e' pajol ca'wlu', bantz chixome'n te yi teru' tajbilu'.
14 Ta', qui't tak'u' junt tir ama'l swetz tan woque'n tetz biyol nak.
Nin kol tz'ocu' tan wuch'eye'n, swak'e' ink'ajsbil teru', nin tzintxole' yi balajilu'.
15 Wajcaw, ẍchaje'u' puntil swetz tan wuk'ol ink'ajsbil swutzu'.
Na na waj chimbitzin tan tak'le'n k'eju'.
16 Na na el intxum tetz yi qui na taju' e'chk oy, nka e'chk tx'ixwatz yi na kapat swutzu'.
List wutane'n tan tak'le'n e'chk oya'tz teru', poro na el intxum tetz yi qui na pek'u' te'j.
17 Poro yi teru' tajbilu' i'tz yi nink kabisun tan kil, nin yil kocsaj kib juy swutzu'.
Na na cuyu' chipaj yi e' yi nternin na chibisun tan quil, nin yi na chok' tan paj.
18 Wajcaw, elk k'ajabu' te Sión yi tanumu'.
Tan banl talma'u' elk k'ajabu' ske'j.
Tak'u' ama'l tan bnixe'n junt tir yi tapij solte'j yi tnum Jerusalén.
19 Na ko na kabisun tan kil, jun cu'n stzatzinku' te yi koy tu e'chk katx'ixwatz yil kapat swutzu'.
Tzatzinku' te e'chk katx'ixwatza'tz yi na kapat swutzu'.
Nin tzatzinku' te e'chk ne'ẍ wacẍ yi na chiquim ka'n tetz koy.