निर्गम
मोशेनी लिखेल निर्गम
वळख
निर्गमना पुस्तक आब्राहामनी वंशनी गोष्ट मोरे चालाडसं, जे उत्पतीमां सुरु व्हयेल व्हतं. निर्गम हाऊ शब्दना आर्थ “परत” म्हणजे इस्राएल राष्ट्रले मिसर देशमाईन बाहेर येवानंतर जे वचन परमेश्वरनी आब्राहमले कर व्हतं. ज्या विदयवान शेतस त्या आशे समतसं की निर्गमना पुस्तक जास्त करीसनं मोशेनी लिखेल शे, आशे वाटसं की हाई धडामाईन आशी माहीती कयसं, निर्गम 24:4 मां आशे सांगस की मोशेनी हाई पुस्तक काही भागमां कशे लिखेल शे, यहोशवा 8:31 मां हाई निर्गम 20:25 मां आदेश दि टाकाना संदर्भ देयल शे अनी आशे सांगस की “मोशेना पुस्तकमां लिखेल व्हतं.” नवीन करारमां मोशेनी लिखेल पुस्तकना बराचदाव उल्लेख व्हयेल शे, उदाहरण जर दिदा तर जळता झुडूपमां जे व्हयनं त्यानाबारामां सांगमा येस अनी आशे सांगामा येस की “मोशेना पुस्तक” मार्क 12:26 लिखामां येयल व्हतं. मिसरमाईन इस्राएल लोकेसले बाहेर लयी येवानं हाई 1300 इ.स.वी पुर्व मां शक्य व्हयेल व्हतं. 1 राजे 6:1 सांगमा येयल शे की इस्राएल लोकेसले बाहेर लयी जावानं शलमोन राजानी शासनकायमां 4 था वरीसपाईन 480 वरीस आगोदर व्हयेल व्हतं.
निर्गम हाई गोष्टवर जोर देस की परमेश्वरनी आब्राहम, इसहाक अनी याकोब यासले जे वचन दिध व्हतं ते कशा पुरा करी राहींनता. हाई आब्राहमना वंश, इस्राएल राष्ट्रले मिसरनी भुमीपाईन परमेश्वरना सामर्थ्यनी उध्दारनीबारामां सांगमा येयल शे, निर्गम 1:12. तठेन परमेश्वरनी आपला लोकेसले सिनाय पर्वतना खोरामां लि गया जठे त्यानी मोशेले इस्राएलना पालनपोषण कराना नियम सांगात (निर्गम 12-19). आशे नियम सांगमा येयल शेतस की त्यानी कसे काम कराले पाहीजे, त्यासनी बलिदाने कशे करानं अनी तंबू यासना मजारमां परमेश्वना निवास स्थान राहावाले पाहीजे व्हता, (तंबुमां पुजा कराकरता कोश अनी दुसरा साधन, अनी उपासकना ईषेश कपडा (निर्गम 20-31) तयार कराना सुचना देयल शेतस. मंग एक भयानक विद्रोह व्हवानंतर इस्राएलनी वासरुना रुपमां एक सोनानी मुरती बनाडी व्हती, मोशेनी परत परमेश्वरनीसंगे भेट व्हयनी निर्गम 32-33). पुस्तकना शेवटना भागमां आमले वाचामां येस की आगोदर बनाडेल वस्तुसनी निर्मीती कशी व्हयेल शे. (40-33)
रूपरेषा
१. अध्याय 1 मां आमले हाई सांगस की इस्राएल लोकेसले मिसर देशमां कशे गुलाम बनाडेल जायेल व्हतं.
२. अध्याय 2 ते 4 मोशेनी सांगेल शे. मनजे त्याना जीवन कशे व्हतं हाई सांगेल शे.तोपावोत त्याले परमेश्वरना लोकेसले सोडावाले बलायेल नही व्हतं.
३. लेखक सांगस की परमेश्वरनी आपला लोकेसले त्या देशमाईन अनी फारोना सैनिकपाईन वाचाडाकरता मिसर देशमां मोठ मोठला चमत्कार अनी मोठ मोठल्या पिढा निर्मान करात. अध्याय 15: 21-51)
४. आठेन इस्राएल राष्ट्र सिनाय पर्वतपावोत गयात. (अध्याय 19-15)
५. अध्याय 20 ते 31 मां आशे वाचतसं की परमेश्वरनी मोशेले कसे नियम लायी दिदात. मनजे इस्राएल लोकेसले कोनता परकारतीन जगानं अनी आरधना करानी व्हती. यानाबारामां स्पष्ट सांगेल शे.
६. अध्याय 32 मा लिखेल शे की इस्राएल लोकेसनी कशे मोशेना भाऊ अहरोनले सोनाना वासरु बनाडाले राजी करीसनं परमेश्वरना ईरोधमां पाप करं.
७. अध्याय 33 ते 40 मां आशे सांगेल शे की मोशेनी परमेश्वनी महीमा कशी दखी अनी इस्राएलला परमेश्वरना नियमनीबारामा सुचना दिदात अनी सांग की निवासस्थान, कोश उपासना कराकरता दुसरा साधन, तशेच याजकना ईषेश कपडा कशे बनाडानं हाई सांगेल शे.
1
मिसर देशमा इस्त्राएल लोकसना व्हयेल छळ
1 इस्त्राएल म्हणजे याकोबना पोऱ्यासना नावे ज्या आपला कुटूंबना संगे मिसर देशमा जायेल व्हतात, त्या ह्या शेतस
2 रऊबेन, शिमोन, लेवी, यहुदा;
3 इस्साखार, जबुलून, बन्यामिन;
4 दान, नफताली, गाद अनं आशेर,
5 याकोबपाईन व्हयेल एकुण त्या सत्तर जन व्हतात; योसेफ हावु मिसरमाच व्हता.
6 नंतर योसेफ अनं त्याना सर्वा भाऊ अनी त्या पिढीना सर्वाजन मरी गयात.
7 इस्त्राएलना पोऱ्यासले पुत्र व्हयनात अनी अशी त्यासनी संख्या बरीच वाढीसन त्या बलवान व्हयनात अनी त्यासनाघाई पुरा देश भरी गया.
8 तवय, योसेफबद्दल ज्याले माहीती नव्हती असा एक नवा राजा मिसर देशमा वना.
9 तवय तो त्याना लोकसले बोलना, “ह्या इस्त्राएल वंशना लोके आपलापेक्षा शक्तीशाली अनी संख्यातीन बी भलताल वाढेल शेतस.
10 तर चला आपण त्यासनासंगे चालाकितीन वागूत; नहीतर त्यासनी संख्या भलतीच वाढी अनी एखादंदाव युध्दनी परिस्थिती वनी म्हणजे त्या आपला शत्रुसमा सामील व्हतीन अनी कदाचीत आपलासंगे लढाई करतीन अनं या देशमाईन निंघी जातीन.”
11 त्यासनी त्यासनावर भलताच कामना भार टाकीसन त्यासले थकाडानं, असा हेतूतीन त्यासनाकडतीन अतिकष्ट करी लेणारा मुकडदम नेमात; तवय त्यासनी फारोकरता पिथोम अनं रामसेस ह्या नगरं कोठारंसकरता बांधात.
12 पण जस त्यासनी त्यासले तरास दिधा त्या भलताच वाढत गयात अनी त्या चारीमेर पसरी गयात, मंग मिसरी लोकसले इस्त्राएल लोकसनी भिती अनी घृणा वाटू लागनी.
13 म्हणीसन मिसरी लोके इस्त्राएल लोकसकडतीन सक्तीतीन काम करी लेवू लागणात.
14 त्यासनाकडतीन मातीना गारा अनं ईटा बनाडी लेत अनी त्यासले वावर माधला प्रत्येक प्रकारणा कामं कराले लायेत; असा कठीण काममुये त्यासले जीव नकोसा व्हयना; कारण त्यासनाकडतीन ज्या कामे करी ली राहींतात त्या भलताच जबरदस्तीना व्हतात.
15 दोन इब्री सुइणी व्हत्यात, एकनं नाव शिफ्रा अनं दुसरीनं नाव पुवा व्हतं, त्यासले मिसरना राजानी आज्ञा करी की,
16 तुम्हीन इब्री बायासनं बांयतपण करतस, प्रसुती व्हवाना येळले तुम्हीन बठश्यात तर नीट दखा अनी पोऱ्या व्हयना तर त्याले मारी टाका अनी पोर व्हयनी तर तीले जिवत राहू द्या.
17 त्या सुइणी देववर भरोसा ठेवणाऱ्या व्हत्यात म्हणीसन त्यासनी मिसरी राजाना हुकूमप्रमाणे न करता पोऱ्यासले जीवत राहू दिधं.
18 तवय मिसरी राजानी त्या सुइणीसले बलाईन ईचारं, “तुम्हीन हाई काय करी राहीनात, पोऱ्यासले काबरं जीवत राहू दि राहिनात?”
19 त्यासनी उत्तर दिधं, “इब्री बाया काय मिसरी बायासनामायक नहीत; त्या भलत्यास दमवाल्या शेतस, म्हणीसन सुइणी येवाना पहिले त्या मोकळ्या व्हई जातस.”
20 या कामबद्दल देवनी त्या सुइणीसनं कल्याण करं, अनी इस्त्राएल लोके तर भलताच वाढीसन मजबूत व्हयनात.
21 त्या सुइणी देवले भ्याईन वागणाऱ्या व्हत्यात, म्हणीसनी त्यानी त्यासना घरानं बसाडं.
22 तवय फारोनी आपला सर्व लोकसले आज्ञा करी की, इब्री लोकसले व्हतीन तेवढा सर्व पोऱ्या नील नदीमा टाका अनी सर्व पोरीसले जीवत ठेवा.