12
INGKARTel ileyel Moses, aker tyenkerr arlkwetyek Anperarl Alhek “Passover”
1-2 INGKARTel Moses-atherr Aaron-atherr ilek Egypt-itwek, “Aherrety arrpanenhel alkent lyerteny arrantherr iterl-areman, renh itnewem Abib.
3 Mpwel alhenh-atherr Israel-kenh-rnem alakenh-anyem iletyek, ‘Mpwelhenh-arey arlta 10-ek-atwety. Ikwer-penhan warlek-artweyel-rnem aker yep-yep inenherr-arey, rernem yep-yep akely atwetyek apmer amentew-ament.
4 Irrpetyapant apek warl anyentel anem, rernem apek aker yep-yep nthakenh arlkwey-angenharl warl anyent-itwek ywerrelhilemel, irrpetyapelan. Apmwarl alakenhan, rernem anyenterremel arlkwentyan mwerrarl, akngerrelarl atnwenth ywerrelhilemelarl arlkwem.
5 Yep-yep ilek-apeny arrantherr rlwanem wenh, arlkwetyek? Yep-yep ampwerrk aherrety anyentel ilkwerrek irrwey mwerr-angker rlwanetyek, alyelk inngarl. Yep-yep-wenyelan nanikwet irrwey akely rlwanenherr-arey.’ ”
6 INGKARTel renh-atherr ilek, “Yep-yep renh inenty, arrantherr renh arntarnt-aretyek arlta 4-ek-atwety. Ikwer-penhan ingkeny aylpenhentyelan, Israel-kenh-rnem arrantherr aker yep-yep atwetyek-anem inkwarteyel, warl arrpanenh-itwek-anem.
7 Ikwer-penhan arrantherr warl arriw akern-ampeny yep-yep-penh arrngel apernetyek, irrker-atherr-then warl arrpanenh-itwek, warl yep-yeparl arlkwek-penh-rnem-kenhant.
8 Ingwa ikwerel-antey yep-yep rwel ampernetyek. Aker renh arrantherr arlkwetyek, alperr tyekertel-then amern ilperr-ilperr-then.
9 Aker arlety arlkwey-angenh. Kwatyel amperney-angenh arrangkw. Aperrkel arrantherr aker renh ampernetyek, akapwert-then arlaw-atherr akwa-atherr analty-then ingkerrenh-antey.
10 Ingkerrenh arlkwenherr-arey. Ingkeny tyerrelhenhey-alhentyel, aker ampeny apek ayntentyan, arrantherr arlkweyang menty aretyek. Rwewarl iwenh-arey, aker ampeny ingkerrenh-antey ikwentyirremel ampetyek.”
11 INGKARTel renh-atherr ilek, “Alakenh-anyem arrantherr aker arlkwetyekan. Aker arlkwey-alentyel, arnkwel aylpetyek pwetel-then. Irretety inenherr-arey, arrantherr alethel alpetyek. Aker-then amern-then anamerl-antey arlkwenherr-arey wenh. Tyenkerr nhanyem INGKART-kenh arrantherr itnewem Anperarl Alhek ‘Passover’.
12 Ingwa ikwerel-antey ayeng alkerel alhayntem Egypt-angkwarr. Atha alerikw awey arrwekeleny-rnem-then atnwenth irrwey arrwekeleny-rnem-then ingkerrenh atwem Egypt-itwek. Ayeng INGKART innga, arawerrng rlterrk ilkwakert. Egypt-arenyel-rnemarl ingkart-arrpantey-rnem mpwarek apwert-penh arwerl-penh-then, rernem apenteyel kwenirrerl-anemel ikwer-rnem-warl. Atha renh-rnem ywerrelhilem.
13 Arrnga atha arenty arriw-itwek, ayeng anperarl alhem, awey arrekantherrenh arrwekeleny-rnem atha atwey-angenharl. Atha Egypt-areny-rnemant atwem.
14 Rlengk-they arrantherr arlta nhenhek iylpangkerl-ayntetyek. Aherrety arrpanenhel alkent lyerteny Abib irrentyel, arlta impenel, arrantherr kwenty atyeng inkwerelhemel arlkwetyek. Aler-rnem-then arrengey-rnem-then artartey-rnem-then arrekantherrenh rernem inkwerelhemel angkayntetyek atyeng-warl intem-antey.
15 Arrantherr tyenkerr Anperarl Alhek ‘Passover’ arlkwek-penh, kwenty ingwer arrantherr arlkwayntenherr-arey arlta 7-ek-atwety. Amern ilperr-ilperrant arrantherr arlkwerl-ayntem arlta 7-ek-atwety. Amern pikinpat-akert arlkwey-angenh, arrangkw. Arlta arrwekel ikwerel, pikinpat warl-they inemel iwetyek, arlkwey-angenh. Ingwerentyel amern pikinpat-akert arlkwenty arlta 7-ek-atwety, arrantherr renh irrentenherr-arey intem-antey. Atyenh-wenyarl ra.
16 Arlta anyent arrwekel ikwerel-anem arrantherr akarrirretyek, atyeng inkwerelhetyek wenh arlta anyent ingkern 7 ikwerel-then. Arlta atherrel, nthakenh arrantherr warrkirrey-angenh, arrangkw. Warrkant ipmenherr-arey, amernant alhewer ampernemel.
17 Arlta 7-ek-atwety alakenh-anyem arrantherr amern tyenkerr arlkwem, itnan ‘Amern Ilperr-ilperr’. Arrantherr amern ilperr-ilperr arlkwem, arrantherr iterl-arerl-ayntetyek, atharl arrenhantherr Egypt-they atnwenheynem. Rlengk-they aler arrekantherrenh-rnem-then arrengey arrekantherrenh-rnem-then artartey-rnem-then rernem iterl-arayntem, iylpelerrey-angenh arrangkwarl. Arrantherr nhenh-angkwarr apenterl-ayntetyek, atha arrernek-angkwarr. Arrantherr intem-antey kwenty arlkwayntetyek.
18 Aherrety arrpanenhel alkent arrwekel arrantherr itnewem Abib. Abib ra irrentyel, arrantherr anenherr-arey arlta 14-ek-atwety. Mpwelhenh-arey ingkeny aylpenhentyek. Ikwer-penh amern ilperr-ilperrant arlkwenherr-arey. Amern ilperr-ilperr arlkwenherr-arey arlta 7-ek-atwety.
19-20 Pikinpat iwenherr-arey warl-they, amern ilperr-ilperr arlkwey-alenty. Ingwerentyel amern pikinpat-akert arlkwenty, renh irrentenherr-arey, aleth-antey alpetyek. Arlta 7-penh, ingkeny tyerrelhenh-penh arrantherr alhewer amern pikinpat-akert arlkwetyek. Nhenh atha arrekantherr arrernek, arrantherr Israel-kenhel-rnem angka nhenh apentetyek, ingwerel-rnem arrekantherr-itwek aneyel-rnem-then. Apmer ingwerel apek aney-alpenty, amern ilperr-ilperr arlkwetyek-antey arlta impen ikwerel, angka nhenh apentemel.” Alakenh INGKARTel Moses-then Aaron-then ilek.
21 Ikwer-penhan Moses-el artwa thwenek, artwamp Israel-kenh-rnem ingwerl-alpetyek. Moses ra angkek ikwer-rnem, “Anyent ingkerrenhel yep-yep akely anyentarl-anyentarl ineynenh-arey. Atwenherr-arey, aker tyenkerr apmer amentew-ament arrantherr arlkwetyek.
22 Yep-yep atwentyel, arrnga tyampit-warl thelenh-arey. Ikwer-penh alperr tyekert arrnga-warl apelyelem. Arriw-warl apernem akern-ampeny irrker-atherr. Arrantherr anenherr-arey warl kwenel-antey ingwepenhek-atwety. Aketh-warl tyerrelhey-angenh.
23 Ingwel rlengk INGKART ampererrerl-ayntem antyerl atwey-angker-akert. INGKART-then antyerl-then ratherr atwerl-apayntem Egypt-areny-rnem. INGKARTel arrnga arriw-itwek arenty, anper-antey alhem, arrenhantherr atwey-angenh. INGKARTel antyerl atwey-angker artwerelem, arrenhantherr atwekerr.”
24 INGKARTel ilek, “Arrantherr angka nhanyem apentenherr-arey intem-antey. Yep-yep akely arrantherr atwenherr-arey aherrety arrpanenhel, intem-antey. Angka nhenh atha arrernek arrekantherr, aler-rnem-then arrengey-rnem-then artartey-rnem-then, arrantherr apenterl-ayntetyek intem-antey.
25 Arrantherr anerl-ayntetyek apmer wethel, atharl arrenhantherr alhelekel, angka nhenh yep-yep-akert apenterl-ayntenherr-arey intem-antey.
26 Ingwer-inger aler arrekantherrenh alakenh ayernenty, ‘Ilekekarl aker tyenkerr yep-yep anwantherr arlkweyel? Ilekekarl yep-yep anwantherr atweyelan alakenh?’
27 Rernem alakenh-anyem ayernenty, arrantherr alakenh arraty-antey iletyek, ‘Aker tyenkerr anwantherr arlkwem, INGKARTek inkwerelhemel, rarl anwenhantherr Egypt-they atnwenhey-alpek apmer nhenh-warl. Anwantherr Israel-kenh-rnem Egypt-itwek anenh tyayl-areny-apeny. INGKART alkerel alhek, ra Egypt-areny akngerr atwek, alerikw arrwekeleny-rnem ikwer-rnem-kenh atwek. Rap alkerel anper-antey rwaylpenhek warl-rnem anwekantherrenh-rnem-angkwarr. Ra menty arek anwernenhantherr atwey-angenh. Anwernenhantherr ilwekerr atnyenek.’ ” Israel-kenhel-rnem awek-penh, rernem ampwethel arrernelhek kwenerremel, INGKARTek inkwerelhemel.
28 Ikwer-penh rernem apmer-warl-anem alpek. Yep-yep rernem atwek, warl-anem arriw ingkerrenh arrngel aperneynenh, INGKARTel Moses-then Aaron-then ilek-angkwarr-antey.
INGKARTel awey alerikw arrwekeleny-rnem Egypt-areny atweyel
29 Ingwa ampepenyel INGKARTel awey arrwekeleny-rnem ipmek atwek ingkerrenh Egypt-areny-rnem-kenh. Pharaoh-kenh awey alerikw arrwekeleny ipmek atwek, awey alerikw arrwekeleny-rnem warrkenh-rnem-kenh-then ipmek atwek ingkerrenh-antey. Pwelek irrwey arrwekeleny-rnem yep-yep-then ingkerrenh-antey ipmek atwek arrpemarl.
30 Ingwa ikwerel-antey Pharaoh-then warrkenh ikwerenh-rnem-then ingkerrenh Egypt-areny-rnem-then akemerrek warl ingkerrenh-itwek. Aler awey arrwekeleny ikwer-rnem-kenh ingkerrenh ilwek. Rernem ingkerrenh artnalhelirrek aler ikwer-rnem-kenhek.
Israel-kenh-rnem Egypt renh iwerl-alheyel, apmer arlpaw-warl alhemel
31 Ingwa ikwerel-antey INGKARTel awey alerikw arrwekeleny atwek, pwelek-rnem-then, Pharaoh-el warrkenh thwenek, Moses Aaron-then ingwerl-alpetyek, renh awetyek. Ra ikwer-atherr angkek, “Arrantherr Israel-kenh-rnem alpenherr-arey, anwernenhantherr ipmemel. Anwernekantherr-itwek aney-angenh-anem. Apmer arlpaw-warl alhewer alhenherr-arey, INGKARTek tnakemel inkwerelhetyek.
32 Yep-yep-rnem pwelek-rnem-then atnwenheynemel ingkerrenh-antey. Alhenherr-arey ikwer-rnem-akert apmer arlpaw-warl. INGKART-anem ayernenh-atherr, ayenh-then arntarnt-arayntetyek.” Alakenh-anyem Pharaoh-el ilek Moses-atherr Aaron-atherr.
33 Egypt-arenyel-rnem Israel-kenh-rnem ilek, “Arrantherr Egypt-itwel anayntem, anwernantherr ingkerrenh-antey ilwenherrem! Anamerl apmer-they alpenherr-arey!”
34 Israel-kenh-rnem rernem arrwekel-antey arlengarr amern arletyenp-warl kwaty thelek, amern mpwaretyek. Pikinpat arrerney-angenh-antey. Israel-kenh-rnem anyentarl-anyentarl arlengarr amernenp renh arrernek-anem yakweth-warl. Yakweth amernenp renh arertnek anpeth-warl, akngeyn-ayntetyek.
35-36 Moses-el arrwekel-antey Israel-kenh-rnem ilek, rernem Egypt-areny-rnem ayernetyek thilpek gold-ek-then arnkwernemek-then. INGKARTel arrwekel-antey ilek Egypt-areny-rnem, rernem mwerr-angkwarr anetyek Israel-kenh-rnemek. Egypt-areny-rnemel ampwal-rnem arwa alhewer-anem anthek Israel-kenh-rnemek.
37 Israel-kenh-rnem apmer Rameses ikwer-they anperl-alhek, apmer Succoth-warl alhenh. 600,000-pel artwernem ingketyel alperlewenh, arelh-rnem-then ampernem-then.
38 Apmer ingwer-areny-rnem alhek arrpemarl, Israel-kenh-rnemel-arleng. Rernem ingkerrenh-antey alhekan. Yep-yep-rnem pwelek-rnem-then nanikwet-rnem-then akngerr atnwenheynek.
39 Ingwa ampepel-antey rernem aynteyarr-alpek, amern ilperr-ilperr amperneyarr-alpek, pikinpat-weny arrangkw, anamerlarl rernem anpenhew-kety, arlwar rtnelhelenh arrangkwarl.
40 Egypt iwerl-alhey-alenty Israel-kenh-rnem arleng-alenty Egypt-itwek anenh, aherrety 430-ek-atwety rernem anenh.
41 INGKART-kenh-rnem ingkerrenh alperlewek arlta ikwerel Egypt-they.
42 Ingwa ikwerel INGKARTel Israel-kenh-rnem arntarnt-aremel atnwenheynek Egypt-they. Israel-kenhel-rnem ingwa anyent aleth-antey iterl-arem, iylpelerrey-angenh. Rernem ingwa nhenhel atyek-antey arntarnt-arelhetyek aleth-antey. Rernem iterl-arey-areny, INGKARTel arrwekeleny-rnem arntarnt-arek.
43 Ikwer-penhan INGKARTel ilek Moses-atherr Aaron-atherr, “Angka nhenh atha arrekantherr arraty ilem aker tyenkerrek itnan Anperarl Alhek ‘Passover’, arrantherr mwerr-angkwarr apenterl-ayntetyek, tyenkerr atnyenetyek. Israel-kenhel-rnemant alhewer yep-yep nanikwet-then arlkwem. Apmer ingwer-arenyel-rnem nthakenh alakenh arlkwey-angenh.
44 Israel-kenhel apek warrkenh apmer ingwer-areny inem payemeletyek. Kel artwerrenty-penhel warrkenh rap aker tyenkerr alhewer-anem ra arlkwem. Warrkenh ra ampa apek, nthakenh aker tyenkerr arlkwey-angenh, arrangkwarl.
45 Alethang apmer ingwer-areny, warrkenh alyeparl warrkirreyel arrekantherr-itwel, nthakenh ra aker renh arlkwey-angenh arrangkw.”
46 INGKARTel ilek, “Arrantherr Israel-kenhel-rnem aker arlkwenty, warl kwen-itwek anayntetyek. Aketh-warl tyerrelhey-angenh, aker arlkwetyek. Aker ngkwern rlweth-akey-angenh.
47 Israel-kenh-rnem arrantherr ingkerrenhel arlkwenherr-arey.
48 Apmer ingwer-areny ilkelhenty aker tyenkerr renh arlkwetyek, artweweny-antey apek, artwemernt renh mpwaretyek ikwerenh-rnem-then, aker renh arlkwey-alenty. Aker alhewer-anem arlkwetyek ikwer-rnem-itwek. Artweweny ra nthakenh arlkwey-angenh.
49 Angka nhenh Israel-kenh-rnemek ikwerel aneyel-rnemek-then. Arrantherr ingkerrenh angka nhenh mwanty apentetyek.” Alakenh-anyem INGKARTel ilek Moses-atherr Aaron-atherr aker tyenkerrek, itnan Anperarl Alhek “Passover”. Ikwer-penhan Moses-atherr Aaron-atherr ratherr alhek, Israel-kenh-rnem iletyek.
50 Israel-kenh-rnem INGKARTek awelhenh, rarl renh-rnem ilanthek-angkwarr-antey, tyenkerr arlkwetyek.
51 Arlta ikwerelan INGKARTel Israel-kenh-rnem Egypt-they atnwenhek, ingkerrenh-antey.