13
Aler awey arrwekeleny INGKART-kenhant
1-2 INGKART angkek Moses-ek, “Israel-kenh ingkerrenh ila, ‘Artwa arelh-then ratherr awey arrwekeleny INGKARTek anthetyek, warrkirr-ayntetyek ikwer. Pwelek irrwey akely arrwekeleny Israel-kenhel-rnem tyenkerr INGKARTek anthetyek arrpemarl. Yep-yep-then nanikwet-then tangkey-then irrkaty-angkwarr ikwer anthetyek arrpemarl. Arrwekeleny-rnemant INGKART-kenh ingkerrenh, ingwer-rnem mentyarl.’ ”
3 Moses angkek Israel-kenh-rnemek, “Arlta nhenhel arrantherr Egypt-they anperl-alhem. Nhethey-anyem arrantherr iterl-arayntetyek arlta anyent impen nhenh, iylpelerreyang. Arrantherr warrkirrenh tyayl-areny-apeny Egypt-itwek. INGKARTel arrenhantherr atnwenhey-alpek arawerrng rlterrkel. Arlta nhenhelan amern ilperr-ilperrant arrantherr arlkwetyek. Amern pikinpat-akert arlkwey-angenh, mentyarl.
4 Alkent nhenh arrantherr itnewem Abib. Arlta nhenhel arrantherr anperl-alhek Egypt-they.
5 Awank-akerr INGKARTel ilek Abraham-ek, Isaac-ek-then, Jacob-ek-then, arrwekeleny-rnem arrekantherrenhek, apmer Canaan anthetyek arrekantherr. INGKARTel alhelek ikwer-rnem, ‘Ingwer-inger atha apmer nhenh ingkern-penh-rnemek ngkwenh-rnemek anthem. Lyertan apmerel aneyel Canaan-areny-rnem, Hitt-kenh-rnem, Amor-areny-rnem, Hiv-areny-rnem, Jebus-areny-rnem.’ Angka nhenh arraty innga! INGKARTel arrenhantherr amern-angketyarr-warl atwenheyneyenh. Apmer ikwerel aney-alpentyel, arlta impen anyentel renh atnyenetyek aherrety arrpanenhel, arrantherr iterl-arayntetyek. Arrantherr akarrerr-ayntetyek aherrety arrpanenhel, iylpangkerl-ayntetyek, arrantherrarl Egypt-they alpek.
6 Arrantherr akarrerrentyel, amern ilperr-ilperrant arrantherr arlkwetyek arlta 7-ek-atwety. Amern pikinpat-akert arrantherr arlkwey-angenh, mentyarl. Arlta anyent ingkernel 7-el arrantherr kwenty atnyenetyek, INGKARTek inkwerelhemel.
7 Nhenhan arraty. Apmer ikwerel, arlta 7-ek-atwety amern pikinpat-akert nthakenh arlkwey-angenh, mentyarl. Pikinpat iwenherr-arey ingkerrenh-antey.”
8 Moses-el ilek, “Arrantherrarl tyenkerrek akarrirrenty, arrantherr alerikw-rnemek tyenkerr anayntiletyek, rernem iylpangketyek, ‘INGKARTel anwernenhantherr atnwenhey-alpek Egypt-they. Ran anwernenhantherr arntarnt-arek. Alakenh-anyem anwantherr akarrerrirreyel, ikwer iterretyek, amern ilperr-ilperr arlkwetyek.’
9 Arrantherr INGKARTek iterrerl-ayntetyek, rarl arrenhantherr arntarnt-arenh. Arrantherr angka Akngey-kenh arnkwewarl, iytelarr-warl ingkwernem arrernelhemel iltyewarl, akapwert-warl. Alakenh iylpelerrey-angenh anayntetyek, angka ikwerenhek intem-antey awelherl-ayntetyek, arrantherr iterl-arem, rarl arawerrng rlterrkel arrenhantherr Egypt-they atnwenhey-alpek.
10 Atyeng awelhenherr-arey! Aherrety arrpanenhel alkent Abib ikwerel, arrantherr aleth-antey aker tyenkerr-then amern ilperr-ilperr-then arlkwayntetyek.”
11 Moses-el ilek, “INGKARTel arrenhantherr apmer ikwer-warl atnwenhem, apmer Canaan-warl. INGKARTel alhelek, ‘Atha apmer arrekantherr anthetyek.’ Apmer irrkaty ra alhelek arrwekeleny-rnemek, ra apmer ikwer-rnem anthetyek.
12 Apmer ikwerel aney-alpentyel, angka nhenh-angkwarr apenterl-ayntetyek. Awey arrwekeleny-rnem INGKART-kenh ingkerrenh anem. Pwelek irrwey akely arrwekeleny tyenkerr INGKARTek-anem anthetyek, yep-yep-then tangkey-then. Renh-rnem ipmek atwetyek INGKART-kenh-angkwarr, alakenh renh-rnem anthetyek INGKARTek. Irrwey arrwekeleny-rnemant INGKART-kenh ingkerrenh anem.
13 Tangkey irrwey akely arrwekeleny-akert apek, arrantherr arrekantherr atnyen-ayntetyek. Alakenh-anyem mwerr. Tangkey ntwa atnyenentyel, ntwap yep-yeparl atwemel anthetyek INGKARTek. Ikwer-penhan ntwa tangkey yanh ngkwenhant-anem atnyena. Yep-yep atwey-angenhel, tangkey yanh atwa rtemal arternemel INGKARTek, yep-yep mentyarl. Awey arrwekeleny-rnem arrekantherrenh arrantherr INGKART-they angkep payemeletyek.” ...
INGKARTel Israel-kenh-rnem iylparrerneyel, nthenh-angkwarr rernem alhetyek
17 Pharaoh-el Israel-kenh-rnem Egypt-they tyarlewek-penh, Akngeyel renh-rnem atnwenhey-angenh iwerr Philistia-angkwarr. Iwerr Egypt-they arraty-antey aynteyneyel Philistia-angkwarr apmer Canaan-warl. Akngey iterrenh, “Atha Israel-kenh-rnem atnwenhenty iwerr Philistia aynteyel-angkwarr, ahelengkwel-rnem renh-rnem ater-anthekerr, renh-rnem atwey-ayntekerr. Rernem angkep alpekerr Egypt-warl. Menty, iwerr ingwer-angkwarr atha atnwenheynem.” Alakenh-anyem Akngey ra iterrek.
18 Apmer arlpaw-angkwarr ra atnwenhek amperang-amper kwaty ilkwa ingwer-ampeny-warl, itnan alay Apenng-angketyarr. Israel-kenhel-rnem irrtyart-then alkwert-then atnyenenh, rernem atwerretyek.
19 Moses-el Joseph arrewaly ngkwern akngeynenh. Awank-akerr Joseph ra ilwey-alenty, ra awayikw-rnemek angkek alakenh-anyem, “Akngeyel arrenhingkerr arntarnt-arem. Ra arrenhingkerr atnwenheyenh Egypt-they. Arringkerr arraty ayenh alheletyek, ayeng ilwenty, arringkerr arrewaly ngkwern ayenh akngeynetyek apmer Canaan-warl, ikwer-itwek akwernetyek.” Kel alakenh-anyem Joseph renh alhelek awayikw-rnemel.
20 Israel-kenhel-rnem Egypt iwerl-alhek-penh, rernem apmer Succoth-itwek ayntenh. Ikwer-penhan rernem apmer Etham-warl alpek. Etham arrer-antey apmer arlpaw-itwek.
21-22 INGKARTel ikwer-rnem iylparrernek, nthek-angkwarr rernem alhetyek. INGKART ra arrwekel alhenh, iwerr ikwer-rnem arratyilemel, rernem renh arraty apenteyn-ayntetyek. Arltel ra alhenh kwenpay arlpenty-angkwarr. Ingwelan ra kwenpay arlpenty lherrm-akertel yerlirrenh ikwer-rnemek, rernem apentetyek. Iwerr arratyileynenh, rernem apentetyek apmer ikwer-warl. Renh-rnem alakenh-anyem atnwenheynenh ingwa arrpanenhel arlta arrpanenhel, aleth-antey. Renh-rnem iwerl-alhey-angenh.